Máciya 10 - Jola-Kasa

Kufootalaku kuŋen li kúl̥ubaaku kata Yéesu

¹ Yéesu li áhooñul kuŋen li kúl̥ubaaku kammuu kúgoomaku koola, min aseniil kayile kata kakesoo uyinumawu wajakutumuu úfu’ li bukanabuku kan újufomuu, li kayile kata kafaken kásomut kanookan, li jilum janoojan.

² Ujawawu wata bukanabuku kuŋen li kúl̥ubaaku kammuu kufootalaku buko li Saŋ kata Sebede;

³ Fílib li Baatilime, Toma li Máciya ammuu áyababuhal ata Alife li Tade,

⁴ Simoŋ ammuu li hujojahu haaneyimuu Selot li Sudaas Isikaaliyot abetumuu Yéesu li kuŋen kata bukan.

Yéesu li aboñ kúgoomaku koola

⁵ Yéesu li aboñ kúgoomaku koola kuŋen li kúl̥ubaaku, min aaniil: — Jakum jinoken li sísukasu sata bukanabuku kákaanumutumuu li Ateemit balewool. Jakum foof jinoken li ésuk yata Samali.

⁶ Bale jijow boot bata bukanabuku kata Isilayeel kanokoomuu li kúgalalaan kájime.

⁷ Jilakomuu ejowayi li jinaak jiwaale joon: «Jáyiiyaju jata Ateemit jíkoojulo!»

⁸ Jifaken kásomutumuu. Jiyiten kaketumuu. Jifaken bukanabuku kan háhaayee ejokumuu. Jikesoo uyinumawu wajakutaawu úfu’ li bukanabuku kan újufomuu. Jiyayyab bacaamut, jisen bagel̥l̥enut bacaam.

⁹ Jilakomuu li jijow jakum jiŋa’ éwulus, mantee ehaaliis, mantee foof sídalam sata fálam jikaan li kusinjawumaku kooluul jíjowetum.

¹⁰ Jakum foof jiŋa’ kaboote kata kañaahoo. Jakum jiŋa’ wañ úl̥uba, mantee foof sidalla. Jakum jooken hunuk, mata aloka laate ayab hutiñool.

¹¹ «Jíliiŋumuu li ésuk élunlumaay mantee foof li ésuk yanooyan, jiŋes min jihaas mantee baj dó an ayilo ayabuul, min jilako boola boot yok nan jommuu jijow.

¹² Jilakomuu kanoken li eluufayi, li jisaaf kakin dómuu.

¹³ Bukanabuku kakinumuu li eluufayi kuyabuulumuu jak, kásuumaayaku kooluul kujow kulako li buko. Bale kuyabutuulumuu jak, kásuumaayaku kujow kúlaañul boot li bukuluul.

¹⁴ Bajutumuu an li eluuf mantee li ésuk ayabuul, mantee foof an ajantene kulimaku kooluul, jihank kafolaku kata kootaku kooluul, min jífu’ li eluufayi inyu mantee foof li ésukayi inyu.

¹⁵ Li mal̥egenamu fan ilobuul, li hunakahu nan Ateemit ammuu li atiib bukanabuku, katekaku kata bukanabuku kata ésukayi inyu fan kuhaŋ másengi kata bukanabuku kata Sodom li kata Gomool.

Sílaamasu san égoomayi yata Yéesu kommuu li kubaj

¹⁶ — Jijanten! Boot min iboñuul loon kúgalalaan boot li tut sijangibujal. Mó mújimuu, ban di jijij loon sinuukayila, li jíjoobi uyinum loon síleebaan.

¹⁷ Jíkaanum bukanabuku, mata fan kújowetumuul ban tiibemuu, ban li kuŋa’ kuul̥ min kutekuul li siluufasu sata kal̥awaku.

¹⁸ Fan kujokuul kújowetum hákil kunahaanabuku kata ésukayi li bata kúyiiyaku mata ínje íji, min jíbajum tó bútin min jilob múmbaam hákil bukanabuku, li hákil kákaanumutumuu li Ateemit balewool.

¹⁹ Bale nan kommuu kujokuul kújowetum bata tilibinaalayi, jakum jiyinoo waa jommuu li jilob, mantee foof buu jommuu li jilob wo eeno. Kulimaku kan jommuu li jilob, fan jiyab ko yaan no.

²⁰ Mata kulimaku kan jommuu li jilob let kubilum li bukuluul, bale fan kubilumul li Buyinumabu bata Atuubawuul.

²¹ «An fan abet atuyool li kuŋen bukan min kumukool. Atuuba fan akaan manolamu añoolool. Bañiilabu fan buyito butiiken sibukoolayiil, ban li bubetiil li kuŋen bukan min kumukiil.

²² Bukanabuku feh fan kuhoyuul mata ínje íji. Bale an átukumuu káyinenaku koola lí ínje lit boot yok li húbanumahu, fan afak.

²³ Kúlaatenuulumuu li ésuk, li jitey boot li ésuk yaayu. Li mal̥egenamu fan ilobuul, let jiban sísukasu feh sata Isilayeel kaŋoloo, tówum Añool-An álaañul.

²⁴ «Agóom ahaŋut anahaanawu oola. Aloka foof ahaŋut anahaanawu oola.

²⁵ Jaajak min ágoom alako loon anahaanawu oola, min foof aloka alako loon anahaanawu oola. Anahaanawu ata butoŋabu afane ahooñi Bélusebul, naane háŋum kata butoŋabu humumiil.

Anawu an jóotimuu jíkoli

²⁶ — Mó mújimuu, jakum jíkoli bukanabuku kalobemuu majakut kuya li bukuluul. Bajut wah wáhimeni waatut ubil úhimuli. Bajut foof wah wayolooli waatut ubil uhaasi.

²⁷ Wahawu wan ilobuulumuu li élim, jilob wo tihunak. Wahawu wan kubuyunooluumuu li ejan, jijow jilob wo butiya li kaayeen.

²⁸ Jakum jíkoli bukanabuku kayilimuu kumuk eñiilayi, ban kuyilaat kumuk yaalayi. Bale jíkoli Ateemit ayilimuu ásu’ eniilayi li yaalayi li sambunasu sáhokoweliitumuu.

²⁹ Inti édalam yano enoomemuu bánfahutuuŋ búl̥uba? Bale maayeet ano li bo let aket, ló balakowut húfañum hata Ateemit Atuubawuul.

³⁰ Bukuluul humumuul, maayeet walawu wooluul humum wo feh, ucobicob.

³¹ Mó mújimuu sákoluul. Ateemit lahaŋe maluukenuul bánfahutuuŋ bameeŋe!

Hufañ Yéesu mantee kahoy Yéesu

³² — An aanumuu hákil ésukayi feh: «Yéesu akilom», ínje foof fan ibil een hákil Atuubawom ata haatiya: «Ummu ínje ikilool.»

³³ Bale an aanumuu hákil ésukayi feh: «Yéesu akilutom», ínje foof fan ibil een hákil Atuubawom ata haatiya: «Ummu inti ínje ikilool.»

Yéesu li áji katiiloo li kubaj li bukanabuku

³⁴ — Jakum jiyinoo li joon libiibil boot káŋalul kásuumaay li etaamayi. Ibilut boot káŋalul kásuumaay. Bale kabaay líŋalulo.

³⁵ Mata libiibil min íji áfu’ li kutiiloo li atuubawool, ásungute li kutiiloo li jaawool, anaale li kutiiloo li asunfaafool aale.

³⁶ Kulatoola kata an, fan kulako bukanabuku kata butoŋabu boola.

³⁷ «An afañumuu atuubawool mantee jaawool haŋ min afañommuu, áliiŋut min aani úmbaam. An li abil afañ añoolool áyine mantee añoolool aale haŋ min afañommuu, áliiŋut min aani úmbaam.

³⁸ An atebutumuu ekuluwaayi yoola tan ayilimuu aket, min ánabul lí ínje, áliiŋut min aani úmbaam.

³⁹ An afañumuu min afaken buloŋabu boola, let abil abaj buloŋ bábaneliit. Bale an aketumuu mata ínje íji, fan abil abaj buloŋ bábaneliit.»

An ayabumuu égoomayi yata Yéesu, akila layabe

⁴⁰ — An ayabuulumuu jak, ínje layabe jak, ban an ayabommuu jak, anawu áboñulommuu layabe jak.

⁴¹ An li ayab jak afulofet, mata min ammuu afulofet, fan ayab bacaam bata afulofet. Ban an ayabumuu jak an anabe li Hulimahu hata Ateemit, mata lanabenab li Hulimahu hata Ateemit, fan ayab bacaam bata an anabe li Hulimahu hata Ateemit.

⁴² Li mal̥egenamu fan ilobuul, an asenumuu maayeet efot yano yata mal májoobiye akee li bukanabuku umbuku kan káyinenaku kooliil lí ínje kulitutumuu ahob, mata ágoomom laam, akaal̥owut mata manooman Ateemit fan acaamool.