Maak 16 - Jola-Kasa

Yéesu li ayitowumul li eketayi

¹ Muñeˈe nan húyiiyaayahu hata Kusuwifaku hubanumuu, Mali ata ésukayi yata Madala, li Salome, li Mali jaaw ata Saak, li kúnoomul éki’ yaciiŋowe bájum li kuŋa’ yo kujow kúki’ ehuluŋayi yata Yéesu.

² Li líiŋ hunak hukaten húyiiyaayahu hata Kusuwifaku, li hanakahu hútinaalahu hata esimenayi, kanaalaabuku li kujow bajuk huyaakahu li bújom banakabu bayitowulo.

³ Muñeˈe li kunaak kugel̥l̥enoo to koon: — Ayi fíle áami li aban di abakkenolaal hugisaahu hata kánoonumaku kata huyaakahu?

⁴ Bale nan kulehenumuu li kujuke li kujuk kaanaku hugisaahu hubakkenibakken kaan li kakaŋ, ban huluuluuk ŋáa’.

⁵ Muñeˈe kanaalaabuku li kunoken li huyaakahu kúliiŋ, li kujuk ló áfu’ mabahe kaŋen kúli, ban li akaano húsabadoo hahiite. Li kúkoli ŋáa’.

⁶ Bale ánayinaawu li aaniil: — Sákoluul! Yéesu ata Nasalet an kubaaŋumuu li ekuluwaayi, jiŋese li akila? Layitowuuyitowul li eketayi. Alet taate. Jijuke, taate kukaanoolumuu.

⁷ Muñeˈe jijow joon kúgoomaku koola li Fiyeel foof: «Yéesu lajowe ló ajow akobuul Gálile. Bo jommuu li jijukool loon afinumuu min alobuul.»

⁸ Muñeˈe nan kanaalaabuku kúfululumuu li huyaakahu, li kutey mateelene li masegowe kúloyi ho. Bale kulobut an wah mata kúkolikoli.

Yéesu li áfu’ Mali ata ésukayi yata Madala

⁹ [Muñeˈe li bújom bíb, nan Yéesu ayitowumulomuu li eketayi hunak hukaten húyiiyaayahu hata Kusuwifaku, li ajand áfu’ Mali ata ésukayi yata Madala. Okila Yéesu akesoomuu uyinumawu hutok li úl̥ubaawu wajakutumuu úfu’ li akila.

¹⁰ Mali li ajow alob mo kúgoomaku kata Yéesu. No unnu buko baloŋe li jokiil ŋáa’ min kulako jíl̥ok.

¹¹ Bale nan kujamumuu Mali li aan Yéesu layitowuuyitowul li eketayi ban lajukoojuk, kúyinenut Mali.

Yéesu li áfu’ kúgoom kúl̥uba

¹² Fúlum tó, Yéesu li áfu’ li kambu kábute, kúgoomaku kúl̥uba kalakowe ejow boot li bujal.

¹³ Buko foof li kúlaañul kubil kuheb kúgoom kaabuku. Bale kumitut kúyineniil.

Yéesu li áfu’ kúgoomaku kuŋen li anolawu

¹⁴ Li húbanumahu, Yéesu li afu’ kúgoomaku kuŋen li ano, buko li hutiñ. Li awateteniil min kubajutumuu káyinen, li min kul̥aal̥umuu uyinum, mata kúyinenut li bukanabuku kajukoolumuu nan ayitowulomuu li eketayi.

¹⁵ Muñeˈe Yéesu li aaniil: — Jijow li adunaayi feh jijow jiwaale Hulimahu Hásuumaahu bukanabuku feh.

¹⁶ An áyinenumuu li Hulimahu Hásuumaahu ban li ábatiiseyi, fan afak; bale an áyinenutumuu, fan ajow li sambun.

¹⁷ Bújaahalenumabu umbe káyinenumuu lí ínje kommuu li kukaan: — Fan kukesoo uyinumawu wajakutumuu li kajawaku kúmbaam. Fan kulob silob sábuto li sooliil.

¹⁸ Kujokumuu sinuukayila li kuŋeniil, mantee foof li kuhob busik bamuke, wahoowah let ukaaniil. Kuŋalumuu kuŋeniil kuwalen li bukan kásomute, kúsontaaku umbuku fan kufak.

Yéesu li alaañ boot bata Ateemit

¹⁹ Nan Amaaŋenawu Yéesu alobiilumuu kulimaku unku aban, Ateemit li aŋalool ájowetum boot li emitayi, ajow akaanool abah kaŋenool kúli.

²⁰ Mal̥egen kúgoomaku li kujow kuwaale Hulimahu Hásuumaahu tanootan. Amaaŋenawu li álokum li buko, min áhiis kaanaku kulimaku kan kulobemuu mal̥egen, li búhiisenum bájaahaleniye banaake bunaboo li ko.]