Maak 15 - Jola-Kasa

Li kújowetum Yéesu bata Filat

¹ Muñeˈe li líiŋ hunak hukaten yaan li bújom bíb, huhaanaahu hata élambaayi, li kunahaanaku kata ésukayi, li kaliikenemuu ésukayi eluwaayi ésukayi eluwaayi yata Móyiis, kammuu li Huhaanaahu háamakahu hata Kusuwifaku, li kujoj. Nan kujojumuu kuban, li kujok Yéesu kujenk ban, li kújowetumool kujow kusen Filat.

² Muñeˈe Filat li agel̥l̥en Yéesu aanool: — Awu ommuu áyiiyawu ata Kusuwifaku? Yéesu li aanool: — Lulobulo mo awu humumi.

³ Muñeˈe huhaanaahu hata élambaayi li hul̥oof Yéesu hoon lakankaan wah wameeŋe wajakut.

⁴ Filat li alaañen agel̥l̥en Yéesu aanool: — Kama let ubag? Inti lujame wahawu feh wan kulobemuu li wo kuya li awu?

⁵ Bale Yéesu alaañenut abag, gay Filat li asego ŋáa’.

Búsukabu li boon Yéesu abaaŋi li ekuluwa

⁶ Li kagaan kanookan kata Faak, Filat lakatenekaten an akul̥i, an búsukabu bommuu li boonool akaten.

⁷ Li baj no unnu, ánayine akee an kunaake koon Balabaas an kukul̥e li kufaalool ló, mata kúgugguul̥ ésukayi ban li kumuk an.

⁸ Muñeˈe búsukabu li bujow butook Filat min bul̥awool boonool akaan loon lafiyomuu li ukaan boot li buko.

⁹ Filat li agel̥l̥eniil aaniil: — Jifañe min íkatenuluul áyiiyawu ata Kusuwifaku? (

¹⁰ Filat lagel̥l̥eniigel̥l̥en loon muñaˈa mata lahaase jak aan batahaay bújimuu huhaanaahu hata élambaayi li hubet Yéesu li kuŋenool.)

¹¹ Bale huhaanaahu hata élambaayi li hutiken búsukabu min bul̥aw Filat min ákatenuliil Balabaas.

¹² Li alaañen agel̥l̥en búsukabu aaniil: — Kama muñowu buu jifañe min ikaan anawu an joonemuu áyiiyawu ata Kusuwifaku?

¹³ Bukanabuku li kulaañen kubaŋulo koon: — Ubaaŋool li ekuluwa!

¹⁴ Filat li agel̥l̥eniil aaniil: — Kama waa lakaane wajakut? Bale bukanabuku li kuhaŋ mabaŋulo koon: — Ubaaŋool li ekuluwa!

¹⁵ Muñeˈe Filat li afañ akaan búsukabu súum, li ákatenuliil Balabaas. Ban, li alob min kuŋa’ kukaluwaas min kutek Yéesu kuban, li aseniil o’ kujow kubaaŋ li ekuluwa.

Kusollaaliyaku li kuleken Yéesu

¹⁶ Muñeˈe kusollaaliyaku li kújowetum Yéesu boot li ekaakayi yammuu kata láala eluufayi yata águubelunaalawu, ban li kúhooñul húmimahu hata kusollaali kaabuku feh.

¹⁷ Kusollaaliyaku li kukaan Yéesu hújufo hájunke, ban li kuhec kugola kata úbuja kukaan éjambi kukaanool li húkow.

¹⁸ Muñeˈe li kunaak kusaafool koonool: — Jisaafi, áyiiyawu ata Kusuwifaku!

¹⁹ Li kuŋa’ hunuk min kunaak kutekool li húkow, li kunaak kumasenool ban li kúkuntuŋ hákilool min kukaan loon kamanenool kóomi li kó.

²⁰ Nan kulekenoolumuu kuban, li kúfulen hújufowahu hájunkaahu han kukaanoolumuu, min kulaañen kukaanool wañawu woola. Ban li kújowetumool kúfu’ li ésukayi kujow kubaaŋ li ekuluwa.

Kusollaaliyaku li kubaaŋ Yéesu li ekuluwa

²¹ Nan kusollaaliyaku kulakomuu kájowetumaku kata Yéesu, li kufam li ánayine akee an koone Simoŋ ata ésukayi yata Siilen, okila li élaañumul bata ul̥ibawu. Simoŋ okila ammuu atuubaawu ata Alekusandul buko li Lífis. Kusollaaliyaku li kutuuŋ Simoŋ ateb ekuluwaayi yata Yéesu.

²² Muñeˈe li kújowetum Yéesu boot tan koone Goligota, yo yommuu: «Tin tata husend.»

²³ Nan kúliiŋ tómuu, li kusenool bunuk bayawooli li múki’ boot ahob, bale li ahoy bahob.

²⁴ Mal̥egen li kubaaŋ Yéesu li ekuluwa, ban li kuñak kútuken min kuhaas waa anoowan li buko ammuu li aŋa’ li wañawu woola. Muñowu kúgaboolummuu wañawu woola.

²⁵ Nan kubaaŋumuu Yéesu li ekuluwaayi, ewaatuwayi etoken li ebaalikenayi yata li bújom yo báliiŋe.

²⁶ Li kababbaluwaku dán kiicumuu wahawu wájimuu li kumukool, kulimaku unke kukiic lómuu: «Ayíiyawu ata kusuwifaku.»

²⁷ Kusollaaliyaku li kubaaŋ li sikuluwa kúkuu kúl̥uba kukaan aahu kaŋen Yéesu káli, aahu kaŋenool kamay.

²⁸ [Muñowu hulimahu han Bakiicelabu bulobumuu húbajummuu, haanumuu: «Lacoboolicoboo li kúkaanikoolaaku.»]

²⁹ Muñeˈe bukanabuku kanaake kújowum tómuu li kunaak kutek kúkowiil ban li kugel Yéesu, min kunaak koon: — Jéh! Awu jaanumuu luyilo uhum eluufayi yata Ateemit, ban li uŋa’ kunak kúhaaji min ulaañen yo uteef,

³⁰ ufakenoolo awu humumi ban li úwalowul li ekuluwaayi!

³¹ Manolamu, huhaanaahu hata élambaayi, li kaliikenemuu ésukayi eluwaayi yata Móyiis, li kulako foof kaleken Yéesu min kunaak koon: — Lafakenfaken bukan kukee, ban akitut ayili afakenoolo okila humumool.

³² Inti okila ammuu Afakenaawu, Ayíiyawu ata Isilayeel? Muñeˈe áwalowul li ekuluwaayi min ujukaal, li úyinenaal li akila. Bukanabuku kan kubaaŋumuu li sikuluwaasu kooj Yéesu, li kugelool foof.

Eketayi yata Yéesu

³³ Nan banakabu buyitenumuu, etaamayi feh li élim boot yok ewaatuwayi éhaajutayi banakabu bakel̥e.

³⁴ Nan ewaatuwayi éhaajutayi elehenumuu, Yéesu li akaaw butiya aan: «Elí, Elí, lema sabachthani?» Yo yommuu, «Ateemitom, Ateemitom, wáa újiye li ubetenom?»

³⁵ Muñeˈe kukee li bukanabuku kalako tomuu li kujamool li akaaw, li koon: — Jijanten, lahooñe Elí.

³⁶ Muñeˈe akee li buko li atey ajow áŋalul hufalen hata efons ayooken li bunuk bacabe hujow huhob, li akok ho li hunuk añuu Yéesu boot ahob. Ban li aan: — Jikob min ujukaal mantee Elí fan abil áwalenulool li ekuluwaayi.

³⁷ Bale Yéesu li akaaw butiya, ban li aket.

³⁸ Muñeˈe no unnu, hufalalahu halakomuu li Eluufayi yata Ateemit li húhaacowumul haatiya boot li etaam hukaan ubey úl̥uba.

³⁹ Muñeˈe anahaanawu ata kusollaali téemeel alako tomuu hákil Yéesu, li ajuk buu laketumuu eeno, li aan: — Li mal̥egenamu ánayinaawu ummu lalakolako Añiil ata Ateemit.

⁴⁰ Li baj foof kanaale kalakowe lóyi min kunaak kúŋandenul. Li kanaalaabuku umbuku, Mali ata ésukayi yata Madala, li Mali jaaw ata Saak Atitawu buko Sóose, li Salome, to kulakowe.

⁴¹ Nan Yéesu alakomuu li etaamayi yata Gálile, kanaalaabuku umbuku li kúnabul li akila, min kunaak kugoloolool. Li baj to foof kanaale kukee kameeŋe kanabe li Yéesu boot yok Yeelusalem.

Kahokaku kata Yéesu

⁴² Muñeˈe emmuu banakabu bo bayaane bútiimo, ban hunakahu unhu hommuu hata bugoloolabu bata kagaanaku, han emmuu li tikaten, húyiiyaayahu hata Kusuwifaku li húliiŋ,

⁴³ Suseef ata ésukayi yata Alimate, li áliiŋul. Lakankaan an áamak li Hujojahu háamakahu hata Kusuwifaku, ban li alako banaak nan Jáyiiyaju jata Ateemit jommuu li jílaŋul. Muñeˈe li abaj kakaañen min ajow boot bata Filat ajow alobool min asenool ehuluŋayi yata Yéesu.

⁴⁴ Bale Filat li asego nan ajamumuu kaanaku Yéesu layaane aket. Li aboñ kujow kúhooñul anahaanawu ata kusollaaliyaku téemeel, min agel̥l̥enool mantee fiyowe nan Yéesu akete.

⁴⁵ Nan anahaanawu ata kusollaaliyaku anoolumuu Yéesu lakeeket, Filat li akat Suseef min ajow aŋa’ ehuluŋayi yoola.

⁴⁶ Muñeˈe Suseef li ánoomul kábil kahiite. Ban, li áwalenul ehuluŋayi yata Yéesu li ekuluwaayi, min aŋa’ kábil min al̥iim yo aban, li aŋa’ yo ajow ahok li huyaak hawoki li hugisa. Ban, li abakken húlankiin háamak hujow húfib kánoonumaku kata huyaakahu.

⁴⁷ Mali ata ésukayi yata Madala, li Mali jaaw ata Sóose li kujuke min kujuk tan Yéesu ahokimuu.