Maak 14 - Jola-Kasa

Huhaanaahu hata élambaayi li hulob mata jamuk Yéesu

¹ Muñeˈe li saŋo kunak kúl̥uba min kagaanaku kata Faakayi, li kata kúmbuuluwaku kakaanutimuu élebiil kúliiŋ. Huhaanaahu hata élambaayi li kaliikenemuu ésukayi eluwaayi ésukayi eluwaayi yata Móyiis, li kulako huŋes bútin mantee li kujok Yéesu an bahaasut kujow kumuk.

² Mata kunaanaak koon: — Uyilaataal ujokaalool li hunakahu hata kagaanaku; mata ujokaalool nomuu, ésukayi fan ékiŋulowul boot li alolaal.

Anaale li aŋa’ eheeñ áyu li húkowahu hata Yéesu

³ Muñeˈe Yéesu li alako li ésukayi yan koonemuu Betani, li eluufayi yata Simoŋ an háhaayee ejoke, lajeˈe abah boot hutiñ, anaale akee li ánokenul. Anaalaawu ateefaay laakene ameeŋe eheeñ yaseele ŋáa’ yan koone naal. Li ahum ateefaayawu, min áyu eheeñayi li húkowahu hata Yéesu.

⁴ Muñeˈe kukee li bukanabuku kalako tomuu súumutiil min koon: — Kama muñowu wáa újimuu li aŋa’ eheeñayi inyu acooc?

⁵ Eheeñayi inyu eyiliyeene éjulayi seel ŋáa’, min sídalam siŋali sen esukateenayi. Muñeˈe li kutalen anaalaawu ŋáa’.

⁶ Bale Yéesu li aaniil: — Jikatool. Wáa újiye li joono li kayoken anaalaawu ummu? Lakankaan wah wajake ŋáa’ boot lí ínje.

⁷ Mata fan jibaj nanoonan esukateen li bukuluul. Jiyilo jikaaniil majake nan jommuu li jifañ, bale ínje let ilako li bukuluul nanoonan.

⁸ Anaalaawu lakankaan wahawu wan ayilimuu akaan. Layansaan aheeñen eniilayi yúmbaam akat to boot bil li kahokaku kúmbaam.

⁹ Li mal̥egenamu fan ilobuul, tanootan tan Hulimahu Hásuumaahu huwaaleyi li adunaayi feh, fan kulob foof wahawu wan anaalaawu ummu akaanumuu, min awayil̥oyi.

Sudaas li aan éehe’ min abet Yéesu li kuŋen kata huhaanaahu hata élambaayi

¹⁰ Muñeˈe Sudaas Isikaaliyot, ammuu akee li kúgoomaku, li ajow ajuk huhaanaahu hata élambaayi mantee li abet Yéesu li kuŋeniil.

¹¹ Mal̥egen li kujanten Sudaas li ésuumansuum ló, ban li koon fan kusenool sídalam. Muñeˈe Sudaas li alako huŋes bútin bajake boot min abet Yéesu li kuŋeniil.

Yéesu li akaan kagaanaku kata Faakayi li kúgoomaku koola ló

¹² Muñeˈe li líiŋ li hunakahu hútinaalahu hata kagaanaku kata kúmbuuluwaku kakaanutimuu élebiil, nan bágalalaanabu bumukeyimuu boot li Faakayi kata Yéesu li kugel̥l̥enool koonool: — Bay lufañe min jijow jilak sinaaŋasu sata kagaanaku kata Faakayi?

¹³ Yéesu li aboñ bukan kúl̥uba li kúgoomaku koola min aaniil: — Jijow boot li ésukayi. Fan jifam li ánayine atebe káyijum kata mal. Jinab li akila.

¹⁴ Ban dán ánayinaawu ammuu li anoken, li joon akilumuu eluufayi: «Anahaanawu laane: “Káfitaku kúmbaam dán ínje li kúgoomaku kúmbaam jommuu li jitiñ sinaaŋasu sata Faakayi, kunkay?”»

¹⁵ Jiloboolumuu loon muñaˈa, fan áhiisuul haatiya eluufayi káfit kawuŋe kafaleyi jak, kabaje wahawu feh wan éetimuu jokolaal li wo. Li káfitaku unku jommuu li jilak sinaaŋasu boot li alolaal.

¹⁶ Mal̥egen kúgoomaku li kujow kúliiŋ li ésukayi, li kujuk wahawu feh loon Yéesu alobiilumuu, min kulak sinaaŋasu sata Faakayi.

¹⁷ Muñeˈe li bil líiŋ kátiimaku, Yéesu li áliiŋul li kúgoomaku koola kuŋen di kúl̥ubaaku ló.

¹⁸ Nan kubahumuu min kulako hutiñahu, Yéesu li aaniil: — Li mal̥egenamu fan ilobuul, akee li bukuluul áamimee hutiñ dín dáno lí ínje, fan abetom li kuŋen bukan.

¹⁹ Muñeˈe kúgoomaku li jokiil ŋáa’, min kunaak kugel̥l̥enool ano li ano koonool: — Waa fíle, ínje?

²⁰ Yéesu li aaniil: — Laalu akee li bukuluul kuŋen li kúl̥ubaaku. Anawu álu’muu kaŋenool li buyinjaayabu li mano lí ínje, akilamuu.

²¹ Mal̥egen, Añool-An fan aket loon Bakiicelabu bulobumuu buya li akila, bale katek kujow kulako li anawu ammuu li abetool li kuŋen bukan. Haŋeene majak jakum anawu ummu abuki.

Húmbuulu li ejunk boot kawayil̥en

²² Muñeˈe nan kulakomuu hutiñahu, Yéesu li aŋa’ húmbuulu min asal Ateemit aban, li amuncul ho asen kúgoomaku koola ban li aaniil: — Jiŋa’, laalu eniilayi yúmbaam.

²³ Yéesu li alaañen aŋa’ ejunk yata ébiiñ, min asal Ateemit aban, li aseniil yo kuhoboo foofiil feh.

²⁴ Muñeˈe li aaniil: — Laalu húsimahu húmbaam, húsimahu halitenumuu húfaalumahu han Ateemit ajokumuu bukanabuku, háyuwimuu boot li bukan kameeŋe.

²⁵ Li mal̥egenamu fan ilobuul, kale let imit ilaañen ihob ébiiñ boot yok hunakahu nan emmuu ihob ébiiñ ewunkul li Jáyiiyaju jata Ateemit.

²⁶ Muñeˈe nan Yéesu alobumuu loon muñaˈa aban, li kukijen ukijenawu wata kasal Ateemit, li kúfu’ kujow boot bata Huyuuyahu hata unuunukenawu waaneyimuu Olíibiye.

Yéesu li alob aan Fiyeel fan abil aceeŋ aan lahaasool

²⁷ Nan kúliiŋumuu bata huyuuyahu hata unuunukenawu waaneyimuu Olíibiye, Yéesu li aan kúgoomaku koola: — Bukuluul foofuul feh fan jikat bo káyinenaku kan jibajumuu lí ínje, mata kikkiic kaanaku: «Fan itek amataawu imuk, min kúgalalaanaku kata bumatabu kuyiisoo.»

²⁸ Bale nan emmuu li iyitowumul li eketayi, fan ijow ló ijow ikobuul Gálile.

²⁹ Fiyeel li aanool: — Manoo kaabuku feh kukat bo káyinenaku kan kubajumuu li awu, ínje let ikaan mo.

³⁰ Yéesu li aanool: — Li mal̥egenamu fan ilobi, li ehukaayi unye humum yo yata síyaat, awu humumi fan uceeŋ ñoono ñáhaaji oon luhaasonhaas, tówum káyin kul̥ok búl̥ubut.

³¹ Bale Fiyeel li ahaŋ malob li sembe aan: — Maayeet min eete iket inaboo li awu, bale let iceeŋ een lihaasihaas. Kúgoomaku feh li kulob manolamu.

Yéesu li al̥aw tan koonemuu Getisemane

³² Muñeˈe Yéesu li kúgoomaku koola li kujow boot tan koone Getisemane, kúliiŋ li aaniil: — Jibah taate mín ínje ijow il̥aw.

³³ Yéesu li aŋa’ Fiyeel buko li Saak, li Saŋ, ájowetum. Li tóŋ kaanool buyina li kákoli.

³⁴ Muñeˈe Yéesu li aaniil: — Buyina báamak bookom bayilo bumukom. Jilako taate ban jakum jímooli.

³⁵ Yéesu li ayinno bo lóyi jakee, li ákuntuŋ min aŋa’ buulool aya teetaam, min al̥aw kaanaku nokoomuu loon kayiliyeenuma, ewaatuwayi inyu yata sílaamasu li ewuj wah bakaanutool.

³⁶ Li aan: — Faafa, Atuubawom, bajut wah wayilo uheeki kakaan. Ulóyiyen ejunkayi inyu yata sílaamasu téetiwom. Bale jakum kaan loon ínje ifañumuu, bale loon awu ufañumuu.

³⁷ Nan Yéesu abanumuu kal̥awaku, li álaañul boot tan kúgoomaku koola kúhaaji kulakomuu áŋejul, li atookiil buko li kámooli. Muñeˈe li agel̥l̥en Fiyeel aanool: — Simoŋ, waa kámooli? Ubanut uban bayili ulako to ewaatu yano awu bámooliwut?

³⁸ Jakum jímooli. Jil̥aw jakum bil jilo li jabunt. Buyinumabu bufañe, bale eniilayi égootogooto.

³⁹ Muñeˈe Yéesu li alaañen akat to kúgoomaku min ayinno bo áliiŋ, li alaañen al̥aw li kulimaku kanolaku.

⁴⁰ Nan abanumuu kal̥awaku, li amit álaañul áliiŋul, li atook kúgoomaku buko li kámooli, mata kámooliyaku kujokiijok ŋáa’ gay kuyilaat kuluuj. Kuhaasut buu kóomi li kulobool.

⁴¹ Muñeˈe nan Yéesu álaañulumuu búhaajutabu, li aaniil: — Kama jiloŋe li jímooli min jiyool̥o? Muñeˈe fite! Ewaatuwayi éliiŋe. Añool-An kubetool kuban li kuŋen kata kuhoofoola.

⁴² Jiyito ujowaal. Jijuke! Anawu ammuu li abetom li kuŋen bukan láliiŋulo.

Kunahaanaku kata Kusuwifaku li kujok Yéesu

⁴³ Muñeˈe nan alakomuu elobayi, Sudaas alakomuu akee li kúgoomaku li ayaan áliiŋul. Li ánaboolul li búsuk bajunkowulo síkundu li sigol. Bukanabuku umbuku huhaanaahu hata élambaayi, li kaliikenemuu ésukayi eluwaayi ésukayi eluwaayi yata Móyiis, li kunahaanaku kata ésukayi kúboñuliil.

⁴⁴ Sudaas ammuu li abet Yéesu li kuŋen bukanabuku umbuku, lalobiilob buu láatimuu akaan min kuhaasool. Laaniisaan: «Anawu an emmuu igaab kuŋenom, okilamuu. Jijokool jíjowetum, ban li jifooyool jak.»

⁴⁵ Muñeˈe nan Sudaas ayaane áliiŋulumuu, li ajow boot tan Yéesu alakomuu áliiŋ li aanool: — Anahaan! Ban li agaabool.

⁴⁶ Muñeˈe bukanabuku li kubil kujok Yéesu.

⁴⁷ Akee li bukanabuku kalako tomuu li Yéesu li áhoonul ékunduwayi yoola atek alokaawu ata anahaanawu ata élambaayi, afalen kanuu.

⁴⁸ Muñeˈe Yéesu li alobiil aaniil: — Waa, jibil boot kajokom li síkundu li sigol ló loon eenimuu ínje ákuu?

⁴⁹ Hunakoohunak li bukuluul linaake ilako li eluufayi yata Ateemit, min inaak iliiken bukanabuku mata Ateemit, ban jijokutom. Bale wahawu unwu boot min ubaj min kulimaku kan Bakiicelabu bulobumuu kubaj.

⁵⁰ Muñeˈe kúgoomaku feh li kukat to Yéesu min kutey kuwuj.

⁵¹ Li baj áfu’ akee águuyoolume hulaal bale, anaake anab li Yéesu. Kukee li kánayinaaku kalako tomuu li kufañeen kujok áfulawu,

⁵² bale li akaten hulaalahu min atey maayiiñool awuj.

Li kújowetum Yéesu hákil huhaanaahu hata Kusuwifaku

⁵³ Bukanabuku kajokumuu Yéesu, li kújowetumool boot bata anahaanawu ata élambaayi ban huhaanaahu hata élambaayi feh, li kunahaanaku kata ésukayi, li kaliikenemuu ésukayi eluwaayi yata Móyiis, kuwoogumuu.

⁵⁴ Fiyeel li alako lóyi min anaak ánabul li Yéesu, boot yok li ekaakayi yata eluufayi yata anahaanawu ata élambaayi. Nan áliiŋ dómuu, li abah áginnoo li kufooyaaku min alako kayiiño sambun.

⁵⁵ Muñeˈe huhaanaahu hata élambaayi li huhaanaahu feh hata Kusuwifaku, li kulako huŋes bukan kayilo kúmal kuya li Yéesu bájum li kuyili kumukool. Bale kubajut an.

⁵⁶ Bukan kameeŋe li kunaak kúmal kuya li Yéesu, bale kulimaku kooliil kunaakut kunaboo.

⁵⁷ Muñeˈe kukee li kuyito kúmal kuya li akila koon:

⁵⁸ — Jijamoojam li alob aan: «Injé fan ihum eluufayi inyu yata Ateemit, yan bukan kuteefumuu, ban li iŋa’ kunak kúhaaji min ilaañen iteef yakee yan kuŋen bukan kulet li kuteef.»

⁵⁹ Bale maayeet min bukanabuku umbuku kulobumuu loon muñaˈa, kulimaku kooliil kunaboolut.

⁶⁰ Muñeˈe anahaanawu ata élambaayi li ayito hákil bukanabuku feh, min agel̥l̥en Yéesu aanool: — Kama waa, ulet li ubag? Kama wahawu wan bukanabuku umbuku kulobemuu li wo kuya li awu, buu?

⁶¹ Bale Yéesu abagut. Alámbaawu ahaanawu li alaañen agel̥l̥enool aanool: — Awu ommuu Afakenaawu, Añiilawu ata Ateemit asaleyimuu?

⁶² Yéesu li aanool: — Eéhe’, ínje emmuu Afakenaawu. Ban fan jibil jijuk Añool-An mabahe kaŋen kúli Ateemit ata Sembe, li abil li ufaalawu wata emitayi.

⁶³ Nan Yéesu alobumuu loon muñaˈa, anahaanawu ata élambaayi li ahaacul wañawu woola wan akila humumool aakenumuu, aban li aan: — Laañut jokolaal min bukan kulobolaal kulim kuya li akila.

⁶⁴ Bukuluul humumuul jijame min agelumuu Ateemit. Buu jiyinoole? Bukanabuku feh li koon tootook min aket.

⁶⁵ Muñeˈe kukee li buko li kútoŋ kumasenool, li kúmibool kúkil, min kutekool sínuka ban li koonool: — Uhéboli ayi atekimuu. Muñeˈe kufooyaabuku li kunaak kutekool siheejen.

Fiyeel li aceeŋ aan lahaase Yéesu

⁶⁶ Muñeˈe no unnu, Fiyeel okila teetaam li ekaakayi, akee li kugoloolaaku kata anahaanawu ata élambaayi li abil.

⁶⁷ Nan agoloolaawu áliiŋulumuu, li ajuk Fiyeel okila li kayiiño. Li ajukelool jow fit, li aanool: — Awu foof lunaanaak unaboo li Yéesu ata ésukayi yata Nasalet.

⁶⁸ Muñeˈe Fiyeel li aceeŋ min aan: — Ihaasut ban ínaanumut foof waa lulobe li wo. Nan alobumuu loon muñaˈa aban, li áfu’ ajow alako li hugulubahu hata ekaakayi. No unnu káyin li kul̥ok.

⁶⁹ Agoloolaawu li ajukool, li alaañen aan bukanabuku kalako tomuu: — Anáyinaawu ummu foof buko kunaake kunabumuu li Yéesu.

⁷⁰ Fiyeel li alaañen aceeŋ. Fiyowut, bukanabuku kalako tomuu li kulaañen koonool: — Mal̥egen, awu foof bukuluulumuu, mata awu an ata etaamayi yata Gálile.

⁷¹ Muñeˈe Fiyeel li anuu wah wajakut aya li okila humumool aan: — Ihaasut ánayinaawu ummu an jilobemuu li akila.

⁷² Nan alobumuu loon muñaˈa, káyin li kuyaan kul̥ok búl̥ubut. Muñeˈe li awayil̥o hulimahu han Yéesu alobool nomuu aanool: «Fan uceeŋ ñoono ñáhaaji oon luhaasonhaas tówum káyin kul̥ok búl̥ubut.» Muñeˈe Fiyeel li alako to jíl̥ok.