Maak 13 - Jola-Kasa

Yéesu li alob mata kahumowaku kata Eluufayi yata Ateemit

¹ Muñeˈe nan Yéesu alakomuu káfululaku li Eluufayi yata Ateemit, akee li kúgoomaku koola li aanool: — Anahaan, ujuke! Mo kuyitikaku unku kukite kujak! Bateefelabu umbu li bukit bujak majak!

² Yéesu li aanool: — Inti lujuke bateefelabu umbu baluuk muñowu? Let baj maayeet huyitik hano li ko háami li hubil hulemboo li hufaal ho huyitik, ho báhoolulooti.

Sílaam fan jibaj tówum adunaayi eban

³ Muñeˈe Yéesu li ajow abah li huyuuyahu hata unuunukenawu wan koonemuu Olíibiye, ajooŋoo li Eluufayi yata Ateemit. Fiyeel buko li Saak, li Saŋ, li Andele li kulako baleyiil li Yéesu, li kugel̥l̥enool koonool:

⁴ — Ulóboli, nay wahawu unwu wóomi li ubaj? Wáa wóomi li úhiis kaanaku wahawu unwu feh unwu li uban?

⁵ Muñeˈe Yéesu li alakoyiil elob aaniil: — Jíkaanum jakum bil an abuntuul.

⁶ Mata bukan kameeŋe fan kubil min kuŋa’ kajawaku kúmbaam min koonuul buko kommuu Afakenaawu! Ban fan kubunt bukan kameeŋe.

⁷ Nan jommuu li jijam bukanabuku li kulob mata kutiik, li mata koone kata kutiik, jakum jíkoli. Mata wahawu unwu wóotisooti ubaj. Bale let fan lako kabanaku kata adunaayi.

⁸ Esúk fan eyito etiik li ésuk, jáyii li jitiik li jáyii. Etaamayi fan egoloo ban bameeŋe, ban fan baj bamuufaay. Wahawu unwu feh uhinhin unokoo loon húkitum hata sílaam sata anaale li éluŋun.

⁹ «Bale bukuluul humumuul joote jíkaanum. Bukan fan kujokuul kújowetum tilibinaal, ban fan kuŋa’ kukaluwaas min kutekuul li siluufasu sata kal̥awaku. Fan kújowetumuul jijow jítuul hákil kúguubelunaalaku, li kúyiiyaku mata ínje íji, mantee li jilobiil múmbaam.

¹⁰ Hulimahu Hásuumaahu hoote hujand huyiiŋeni li sihetasu feh.

¹¹ Nan kommuu li kujokuul kujowetum bata tilibinaalayi, jakum jiyinoo jíkibben mata kulimaku kan jóotimuu jijow jilob. Bale jilob kulimaku kan Ateemit ammuu li asenuul yaan no unnu. Mata inti li bukuluul kulimaku unku kóomi li kubilumul, bale fan kubilumul li Buyinumabu Banabaabu.

¹² An fan abet atuyool li kuŋen bukan min kumukool, atuuba li abet añoolool li kuŋen bukan min kumukool. Bañiil fan buyito butiik li sibukoolayiil, ban fan kulob bukan min kumukiil.

¹³ Bukanabuku feh fan kulatuul mata ínje íji. Bale an ahankenumuu min átuk lit boot yok li húbanumahu, Ateemit fan afakenool.»

Majakutamu Makajenemuu

¹⁴ Yéesu li afamen aan kúgoomaku: — Fan jijuk «Majakutamu Makajenemuu» li mulako tin mooteenutumuu mulako, (ban an alakomaa kajanga, laate ánaanum jak yo yommuu waa)! No unnu bukanabuku kammuu kulako li etaamayi yata Súde, koote kutey boot li kuyuuyaku.

¹⁵ An alakomuu haatiya eluuf, jakum áwalowul abil kaŋa’ wah li eluufayi yoola átowum atey.

¹⁶ An alakomuu li kal̥aakool, jakum alaañ boot boola ajow kaŋa’ kañool.

¹⁷ Iyéno, kanaalaabuku kammuu kuhalet, li kammuu li kulako kalaahen li kunakaku unku!

¹⁸ Jil̥aw Ateemit jakum bil huteyahu hooluul hulako li taŋayi yata kutontaku.

¹⁹ Mata no unnu, bukanabuku fan kúlaam sílaam sáamak sabajulelut nan Ateemit ajuul̥umuu adunaayi boot yok muñeˈe. Ban let bil laañen baj sílaam loon unsu.

²⁰ Ban Amaaŋenawu Ateemit ajokeenutumuu min áyaakul kunakaku unku, an let aloŋ; bale láyaakuuyaakul kó humum hata bukanabuku kan al̥usumuu kulako koola.

²¹ Muñeˈe an aanuulumuu: «Jijuke, Afakenaawu ummu taate!», mantee foof li aanuul: «Jijuke, ummu taata!», jakum jíyinen li akila.

²² Mata bukan kámale koon buko kufakena koom, li bukan kámale koon buko kufulofet koom, fan kubil kúfulul. Fan kunaak kukaan búhiisenum li bújaahalenum mata min kuyiliyeen, li kubunt bukanabuku kan Ateemit al̥usumuu kulako koola.

²³ Muñeˈe bukuluul jíkaanum! Lilobuulobumuu wahawu feh ikat to.

Eláañulayi yata Añool-An

²⁴ — Bale nan sílaamasu sata kunakaku unku sommuu li siban, banakabu fan búlimen. Hul̥eeñahu fan hukat kawuŋen.

²⁵ Bawuutabu fan búlowumul li emitayi. Ateemit fan ákatenul sembaasu feh sammuu li emitayi.

²⁶ Muñeˈe bukanabuku fan kujuk Añool-An li abilumul li ufaalawu wata emitayi, li sembe sáamak li máyiineni máamak ló.

²⁷ No unnu, Añool-An fan áboñul kumalakaaku koola kujow boot tanootan li etaamayi, kujow kúwomenul bukanabuku kan al̥usumuu, kítum li hulej haahe hata etaamayi boot li haaha.

Bukittenoolum bata bul̥el̥u

²⁸ — Jiŋa’ bul̥el̥u jikaan bukittenoolum min jíhaasum to wah. Jowumuu waanawu wata bo únih, ban etojayi yata bo li éyawul, li jihaas joon húl̥iyahu húkoojulo.

²⁹ Li manolamu, bukuluul foof nan jommuu li jijuk wahawu unwu li ubaj, jihaas joon Añool-An lálehenulo, lákoojulo li mal̥egen.

³⁰ Li mal̥egenamu fan ilobuul, bukanabuku kata muñeˈe let kuket foofiil feh, tówum wahawu unwu feh ubaj.

³¹ Emitayi fan ebil ébujo, etaamayi foof fan ebil ébujo, bale kulimaku kúmbaam let kuniilo maayeet.

Ateemit balewool ahaase nay adunaayi yommuu li eban

³² — Bale bajut an ahaase nay hunakahu unhu hommuu li húliiŋ, li nay ewaatuwayi inyu yommuu li éliiŋ. Kumalakaaku kammuu li emitayi kuhaasut, Añiilawu ahaasut. Atuubaawu bale ahaase.

³³ Jíkaanum, jakum jímooli, mata jihaasut nay taŋayi inyu yommuu li éliiŋul.

³⁴ Eláañulayi yata Añool-An fan ekittenoolumi li ánayine alakowe li ajow kañaahoo, li akat kulokaaku koola eluufayi yoola kooken. Ban, li asen anoowan li buko bulok ban ammuu li akaan. Muñeˈe li aan ánayinaawu afooyumuu kámbiilaku ajuke to jakum abil ámooli.

³⁵ Kama jakum jímooli, mata jihaasut nay anahaanawu ata eluufayi ammuu li álaañul. Nikee fan álaañul kátiim, mantee hukahu balite, nikee li álaañul úyinawu bal̥oke, mantee foof li bújom.

³⁶ Anáyinaawu ata eluufayi álaañulumuu li mahile, jakum atookuul mámooliye.

³⁷ Wahawu wan ilobemuu li bukuluul li wo, bukanabuku feh lilob womuu: Jakum jímooli.