Maak 11 - Jola-Kasa

Yéesu li anoken li ésukayi yata Yeelusalem

¹ Muñeˈe Yéesu li kúgoomaku, li kúliiŋ li ésukayi yata Betifaase li yata Betani, tin loon huyuuyahu hata unuunukenawu wan koonemuu Olíibiye. Yéesu li aboñ bukan kúl̥uba li kúgoomaku koola,

² min aaniil: — Jijow boot li ésukayi yammuu hákiluul. Nan jommuu jíliiŋ, fan jiyaan jijuk hulaaha hata asum makoki, han an álakowolut li ho. Jíl̥el̥ul ho jíŋalul boot taate.

³ An agel̥l̥enuulumuu aanuul: «Wáa újiye li joono li kal̥el̥ hulaahaahu unhu?», li joonool: «Amaaŋenawu joke li ho». Fan ayaan akatuul min jíŋalul hó.

⁴ Mal̥egen kúgoomaku kúl̥uba li kujow kúliiŋ, li kujuk hulaaha hata asum tíyaŋ li bútinabu, makoki kooj kámbii. Li kúl̥el̥ul hó.

⁵ Muñeˈe kukee li bukanabuku kalako tomuu, li kugel̥l̥eniil kooniil: — Kama bukuluul waa jikaane li wo? Wáa újiye li joono li kal̥el̥ hulaahaahu hata asumawu?

⁶ Kúgoomaku li kulobiil wahawu wan Yéesu alobumuu. Bukanabuku kalako tomuu li kukat kúgoomaku min kújowetum hulaahaahu hata asumawu.

⁷ Kúgoomaku li kúŋalul hulaahaahu hata asumawu kujow kusen Yéesu, ban li kuŋa’ wañawu wooliil kutal li búsolabu bata ho, min Yéesu abah li ho.

⁸ Muñeˈe bukan kameeŋe li kutal wañawu wooliil li bútinabu. Kaabuku li kúfalenul li bujalabu waan li unuunukenawu, kukaan li bútinabu.

⁹ Bukanabuku kayabumuu Yéesu hákil, li kákibbenoolumuu li kunaak kúwoolen koon: «Hosanna! Ateemit ajow ásooniyen anawu abilummuu li kajawaku kata Amaaŋenawu!

¹⁰ Ateemit ajow ásooniyen jáyiiyaju jammuu li jibil, Jáyiiyaju jata atuubawolaal Dayit! Hosanna haatiya tiya emitayi!»

¹¹ Nan Yéesu áliiŋumuu Yeelusalem, li ajow anoken li eluufayi yata Ateemit. Nan ajukelumuu wahawu feh ajow aban, li ajow boot li ésukayi yan koonemuu Betani li kúgoomaku kuŋen li kúl̥ubaaku ló, mata banakabu bo bajone.

Yéesu li aan bul̥el̥u babukut, let bulaañen bubuk

¹² Li líiŋ hunak hukaten, nan Yéesu li kúgoomaku koola kulakomuu li kúfu’ li ésukayi yata Betani, bucaa li bujokool.

¹³ Muñeˈe li aŋanden bul̥el̥u báwuloole, li ajow boot bata bul̥el̥uwabu min ajuk mantee bubabbaj mutiñaay. Nan áliiŋ tómuu, li ajuk li bul̥el̥uwabu etoj bale, mata let no unnu ul̥el̥uwawu ubukemuu.

¹⁴ Muñeˈe Yéesu li aan bul̥el̥uwabu: — An let alaañen atiñ mutiñaayamu mooli! Kúgoomaku koola kujanjam wahawu wan alobumuu bul̥el̥uwabu.

Yéesu li anoken li eluufayi yata Ateemit

¹⁵ Muñeˈe Yéesu li Kúgoomaku. Nan áliiŋ dómuu, li akesoo bukanabuku kalako lómuu kájulaaku li kalakomuu hunoomahu. Li áhoolul sitaabulasu sata kalakomuu kawecekoolaku kata sídalamasu, li kúbahumaku kata kalakomuu kújulaaku kata síleebaanasu.

¹⁶ Ban akatut an min aŋa’ wah min ájowum li eluufayi yata Ateemit áfu’ baaba.

¹⁷ Fú’ tó, li alob bukanabuku aaniil: — Kama inti Hulimahu hata Ateemit honsoon: «Eluufayi yúmbaam fan ehooñi eluuf yata kal̥aw boot li sihetasu feh!» Bale bukuluul li jilaañen yo elako hugoog hata ékuu.

¹⁸ Muñeˈe nan huhaanaahu hata élambaayi li kaliikenemuu ésukayi eluwaayi yata Móyiis kujamumuu loon muñaˈa, li kulako huŋes bútin mantee li kumuk Yéesu. Bale li mal̥egenamu kúkolikoli Yéesu, mata baliikenelabu boola bugoggo’ búsukabu feh ŋáa’.

¹⁹ Muñeˈe nan banakabu bútiimomuu, Yéesu li kúgoomaku koola li kúfu’ li ésukayi.

Sembaasu sata káyinen

²⁰ Muñeˈe li líiŋ li bújomabu, kúgoomaku li kulako ejow li bútinabu, li kujuk bul̥el̥uwabu masaye boot li kuhaalaku kata bo ló.

²¹ Muñeˈe Fiyeel li awayil̥o buu jówoolummuu, li aan Yéesu: — Anahaan, ujuke, bul̥el̥uwabu ban oonumuu an let alaañen atiñ mutiñaayamu mata bo, busaye.

²² Yéesu li ájowum tó alob kúgoomaku koola aaniil: — Jíyinen li Ateemit.

²³ Li mal̥egenamu fan ilobuul, an aanumuu huyuuyahu unhu: «Uyinno taatu ujow ulo li husamuwahu», ban áwettoolut li buyinumool, min áyinen kaanaku wahawu wan alobumuu fan ubaj, manooman fan ubaj.

²⁴ Wahawu unwu újimuu boot min eenuul: Wahoowah feh wan jil̥awe Ateemit, jíyinen joon jibaj wo jiban, fan ulako wooluul.

²⁵ Nan jommuu jiyito boot kal̥aw wah Ateemit, nokoomuu loon babbaj an an jibajoole, jibonket anawu ummu kayitee Atuubawuul ammuu li emitayi li abonket foof uhoofoolawu wooluul.

²⁶ [Bale jibonketutumuu kafetumuu li bukuluul, Atuubawuul ammuu li emitayi let foof abonketuul uhoofoolawu wooluul.]

Kakaañenaku kata Yéesu

²⁷ Muñeˈe Yéesu li kúgoomaku, huhaanaahu hata élambaayi, li kaliikenemuu ésukayi eluwaayi ésukayi eluwaayi yata Móyiis, li kunahaanaku kata ésukayi, li kubil kúkoojulool.

²⁸ Muñeˈe li kugel̥l̥enool koonool: — Kama awu li kakaañen kay lúkaanume wahawu unwu? Ban ayi aseni kakaañenaku unku min ukaan wo?

²⁹ Yéesu li aaniil: — Injé foof boot min igel̥l̥enuul hulim hano bale. Jilobom homuu, ínje foof fan ilobuul li kakaañen kay líkaanume wahawu unwu.

³⁰ Jilobom. Mantee kábatiisaaku kan Saŋ anaake ábatiisemuu bukanabuku, li Ateemit kubilumulo mantee li bukan?

³¹ Muñeˈe li kulako to búwonnoo min koon: — Oonaalumuu: «Li Ateemit kubilumulo», fan aanolaal: «Kama wáa újimuu jíyinenut li Saŋ?»

³² Li bil oonaalool: «Li bukan kubilume…», let jow. (Kúkolikoli búsukabu, mata bukanabuku feh kujoojok Saŋ loon afulofet ata mal̥egen.)

³³ Muñeˈe li koon Yéesu: — Jihaasut. Yéesu foof li aaniil: — Seeh, kama ínje foof let ilobuul li kakaañen kay líkaanume wahawu unwu.