Maak 10 - Jola-Kasa

Yéesu li alob mata búyabo li mata kaban búyabo

¹ Muñeˈe nan Yéesu áfulum tómuu, li ajow boot li etaamayi yata Súde, kageb kaaka katunkaku kaaneyimuu Suuludeŋ. Búsukabu li bumit buwonnoo tan Yéesu alakomuu, li alako kaliiken bukanabuku Hulimahu hata Ateemit loon akaanemuu.

² Muñeˈe Kufaaliisiyeŋaku li kufañ kubuutoo Yéesu, li kúkoojulool min kugel̥l̥enool koonool: — Mantee eluwaayi yonsoon ánayine layilo aan aseekool ábalo?

³ Muñeˈe Yéesu li aaniil: — Kama waa Móyiis aanuul jikaan?

⁴ Li koonool: — Móyiis laane ánayinaawu laate akiic eleetal yata kakatoo asen aseekool ban li aanool ábalo.

⁵ Bale Yéesu li aaniil: — Mal̥aal̥amu mata uyinumawu wooluul mújimuu Móyiis li akiic hulimahu unhu boot li bukuluul.

⁶ Bale li húkitumahu, nan Ateemit ajuul̥umuu wahawu feh, «láwuwenwuwen ánayine li anaale.»

⁷ Wahawu unwu újimuu ánayinaawu fan áfu’ bata atuubawool li jaawool, min ajow kukin li aseekool,

⁸ min buko kúl̥uba kalaañ kulako an ano. Min lako muñeˈe kulet bukan kúl̥uba, bale an ano.

⁹ Kama jakum an ayiis bukan kan Ateemit áginnoole.

¹⁰ Muñeˈe nan kúbalowulumuu kúliiŋul li eluufayi, kúgoomaku li kulaañen kugel̥l̥en Yéesu mata kabanaku kata búyabowabu.

¹¹ Yéesu li aaniil: — Anáyine aanumuu aseekool ábalo, ban li áyabul anaale akee, hákil anaalaawu átinaalawu, ánayinaawu ummu lahintenhinten anaale alet oola.

¹² Li bil nokoo loon anaale ajoke min ábalo bata áyinool, min ajow ayabo li ánayine akee, hákil ánayinaawu átinaalawu, anaalaawu ummu lahintohinto li ánayine alet oola.

Yéesu li ásooniyen bañiilabu batitabu

¹³ Muñeˈe bukan li kúŋalul bañiil boot bata Yéesu, mantee li aŋa’ kuŋenool awalen li buko min ásooniyeniil. Bale kúgoomaku li kutalen bukanabuku káŋalulumuu bañiilabu.

¹⁴ Nan Yéesu ajukumuu kúgoomaku li kukaan loon muñaˈa, súumutool min aaniil: — Jikat bañiilabu min bubil boot búmbaam. Jakum jíhiliil kubilum. Mata Jáyiiyaju jata Ateemit jata bukanabuku kanokoomuu li buko.

¹⁵ Li mal̥egenamu fan ilobuul, an ayabutumuu Jáyiiyaju jata Ateemit loon añiil atit, anawu ummu let ánoken dó maayeet.

¹⁶ Muñeˈe Yéesu li atebiil, ban li aŋa’ kuŋenool awalen li buko ban li ásooniyeniil.

Yéesu li alob buu ebaj ákoyileniwummuu

¹⁷ Muñeˈe Yéesu li alako li ajow, ánayine akee li áteyul áliiŋul li ákuntuŋ hákilool min agel̥l̥enool aanool: — Anahaan ajake, waa leete ikaan min ibaj buloŋabu bábaneliitumuu?

¹⁸ Yéesu li agel̥l̥enool aanool: — Wáa újiye li uhooñom anahaan ajake? Bajut an ajake, Ateemit bale ajake.

¹⁹ Luhaase kulimaku kan eluwaayi yata Móyiis elobumuu: «Jakum umuk an. Jakum uhinto li anaale mantee li ánayine alet ooli. Jakum úkuwet. Jakum úmal uya li an. Jakum ukaan an súumaatiwool. Uluuken atuubayi li jaawi.»

²⁰ Anáyinaawu li aan Yéesu: — Anahaan, likankaan wahawu unwu feh loon eluwaayi inyu elobumuu yaan no ínje baloŋe áfu’.

²¹ Muñeˈe Yéesu li ajuke ánayinaawu li súumool, li aanool: — Wah wano bale usaŋoyi kakaan: Ujow újula wahawu feh wan ubajumuu, ban li uŋa’ sídalamasu ugaben esukateenayi. Ukaan momuu, fan ubaj hubaj li emitayi. Banumuu, li ubil únabul lí ínje.

²² Bale nan ánayinaawu ajamumuu kulimaku unku, buulool li búlim min áyiyenoo ábalo, mata lakankaan usaanum wáamak.

²³ Yéesu li ajuke bukanabuku káguutoolumuu ban li aan kúgoomaku koola: — Mo kite séngi min kusaanumaku kunoken li Jáyiiyaju jata Ateemit!

²⁴ Muñeˈe kúgoomaku li kusego ŋáa’ mata kulimaku kan Yéesu alobumuu. Yéesu li afamen aaniil: — Kuñoolom, mo kanoken li Jáyiiyaju jata Ateemit kukite kúsengi!

²⁵ Séngisengi min eñonkom énokenum li ésuuh yata ekikum, bale haŋ másengi ŋáa’ min usaanum unoken li Jáyiiyaju jata Ateemit.

²⁶ Muñeˈe kúgoomaku li kuhaŋ masego feh min kunaak kugel̥l̥enoo koon: — Kama muñowu ayimaa ayilo afakeni?

²⁷ Yéesu li ajukeliil ban li aan: — Li bukanabuku, an ayilaat afakenoolo, bale inti li Ateemit, mata bajut wah wayilo uheek Ateemit kakaan.

²⁸ Muñeˈe Fiyeel li aan Yéesu: — Fan ujanten! Alóli jíkatuukatul bo wáholi feh min jínabul li awu.

²⁹ Yéesu li aanool: — Li mal̥egenamu fan ilobuul, an ákatul bomuu eluufool, mantee kutuyool, mantee kúliinool, mantee jaawool, mantee atuubawool, mantee kuñoolool, li etaamool mata ínje íji li Hulimahu Hásuumaahu hata Ateemit,

³⁰ fan abaj muñeˈe li taŋayi inye ñoono éteemeel, siluuf, li kutuyaay, li kúliinaay, li sijaawaay, li bañiil, li ul̥aak. Bale bukanabuku fan kúlaatenool, ban fan abil abaj buloŋabu bábaneliitumuu li taŋayi yabilemaa.

³¹ Bale kameeŋe li kútinaalabuku fan kulako kúsola. Kameeŋe li kúsolaabuku fan kulako kútinaa.

Yéesu li alaañen alob mata eketayi yoola li kayitowulaku koola li eketayi

³² Muñeˈe Yéesu li kanabumuu li akila li kulako ejow boot Yeelusalem, Yéesu li ayabiil kayooŋ. Kúgoomaku kúfu’ jooliil, min alakoyiil elob mata wahawu wammuu li ubajool.

³³ Li aaniil: — Jijanten! Alolaal ummuwaal li ejow boot Yeelusalem ban Añool-An ammuu li abeti li kuŋen kata huhaanaahu hata élambaayi, li kata kaliikenemuu ésukayi eluwaayi ésukayi eluwaayi yata Móyiis. Fan koon lafeefet min lako boot min aket, ban fan kuŋalool kubet li kuŋen kata bukanabuku kákaanumutumuu li Ateemit balewool.

³⁴ Buko umbuku fan kulekenool, li kumasenool, ban li kaŋa’ kukaluwaas min kutekool, ban li kumukool. Bale fan baj kunak kúhaaji, li ayitowumul li eketayi.

Bañiilabu bata Sebede li kul̥aw wah Yéesu

³⁵ Muñeˈe Saak buko li Saŋ, kammuu bañiilabu bata Sebede, li kúkoojul Yéesu min koonool: — Anahaan, jifañe min úkaanoli wahawu wan jommuu li jil̥awi.

³⁶ Yéesu li aaniil: — Waa jifañe min ikaan boot li bukuluul?

³⁷ Li koonool: — Jifañe nan ommuu li ulako li máyiineniyamu mooli, li úkaanoli jibah, aahu kaŋeni kúli, aahu kaŋeni kamay.

³⁸ Yéesu li aaniil: — Bukuluul jihaasut waa jil̥awe li wo. Mantee jiyilo jihob ejunkayi yata sílaamasu yan ínje emmuu li ihob, mantee jiyilo jíbatiiseyi li sílaam loon ínje emmuu li íbatiiseyi li sílaam?

³⁹ Li koon Yéesu: — Olóli jiyilo. Yéesu li aaniil: — Li mal̥egenamu, fan jihob ejunkayi yan ínje emmuu li ihob, ban fan jíbatiiseyi foof loon ínje emmuu li íbatiiseyi.

⁴⁰ Bale mata kabah kaŋenom káli mantee foof kaŋenom kamay, inti lí ínje éemi li bilumul. Bale kúbahumaku unku Ateemit fan asen ko bukanabuku kan akaan ko tomuu boot.

⁴¹ Nan kúgoomaku kuŋenayi kaabuku kujamumuu loon muñowu, súumutiil li Saak li Saŋ.

⁴² Muñeˈe Yéesu li áhooñuliil foofiil feh min aaniil: — Jihaase joon kajokimuu loon kunahaan kata ésukayi, kutuuŋetuuŋ bukanabuku kukaan wahawu wan buko kufañumuu, ban bukanabuku káamakaku li kúhiisiil kaanaku sembe kooke.

⁴³ Wahawu unwu wootut ubaj li bukuluul. Bale an afañumuu min alako an áamak li bukuluul, laate alako alokaawu ooluul.

⁴⁴ Ban an li bukuluul afañumuu min alako átinaa, alako amiikeelawu ooluul feh.

⁴⁵ Mata Añool-An abilut boot min abaj emiikeel, bale boot min akila humumool alako amiikeel. Ban li asen buloŋabu boola bulako búhal boot li bukan kameeŋe.

Yéesu li afaken Baatime, áfuumumuu

⁴⁶ Muñeˈe Yéesu li kúgoomaku koola li kujow boot li ésukayi yata Séliko. Nan kulakomuu li kúfu’ li ésukayi, li kúfuloo li búsuk báamak ló. Li baj an áfuume an koone Baatime, añool Time, abahe li kagendenaku kata bútinabu min alako kal̥aw wah bukanabuku.

⁴⁷ Muñeˈe Baatime li ajam kaanaku Yéesu ata ésukayi yata Nasalet áami li ejow, li abaŋulo aan: — Yéesu, Añiil ata Dayit, úyiyenom!

⁴⁸ Bukan kameeŋe li kuhabool mantee li alu. Bale akila li ahaŋ mabaŋulo aan: — Añiil ata Dayit, úyiyenom!

⁴⁹ Yéesu li ayiten ban li aan bukanabuku: — Jíhooñulool. Mal̥egen bukanabuku li kúhooñul ánayinaawu áfuumumuu min koonool: — Sákoli, uyito, Yéesu lahooñi.

⁵⁰ Anáyinaawu áfuumumuu li abeten hújufowahu hoola, min ayaan ayito háak, ban li ajow boot bata Yéesu.

⁵¹ Yéesu li agel̥l̥en ánayinaawu aanool: — Waa lufañe min ikaan boot li awu? Anáyinaawu li aanool: — Anahaan, ukaanom min ilaañen ijuk.

⁵² Yéesu li aanool: — Ujow. Káyinenaku kooli kufakeni. Anáyinaawu li ayaan ajuk, ban li ajow anab li Yéesu.