Hulimahu Hásuumaahu loon Lík akiic homuu 8 - Jola-Kasa

Kanaalaabuku kalambenumuu Yéesu li kúgoomaku koola

¹ Muñeˈe li fiyo jakee, Yéesu li ajow li sísukasu sáamakasu li básukabu batitabu, ajow ayiiŋen ban li awaale bo Hulimahu Hásuumaahu hata Jáyiiyaju jata Ateemit. Kúgoomaku koola kuŋen li kúl̥ubaabuku, li kunab li okila,

² li foof kanaale kakee kan akesoole uyinum wajakut úfu’ li buko, li kan afakene li úsomut: Mali aaneyimuu Mali Madala, an Yéesu akesoomuu uyinum wajakut woono hutok li úl̥uba úfu’ li okila.

³ Saan, anaalaawu ata alokaawu ata Elod, an koonemuu Suusa, Susaan li bukan kukee kameeŋe, kanaake kulambenoo Yéesu li kúgoomaku koola li wahiil.

Bukittenoolum bata an áami li ebet sígul

⁴ Bukanabuku kunaanaak kubilum li ésuk yanooyan boot bata Yéesu. Nan ésukayi ejowe emeeŋumuu, Yéesu li alobiil bukittenoolumabu umbe:

⁵ — Bile baj awaña áfule ajow ebet sígul. Nan alakomuu ebetayi, búgin bakee bata sígulasu li bulo li bútinabu. Esúkayi li ékakul só, basuuwabu bata haatiya li butiñ so.

⁶ Búgin baabu li bulo li etaam yata bagisa. Nan siyaane sil̥iilumuu, li sisay mata etaamayi ébukut.

⁷ Búgin bakee li bulo li etaam yata banuunuken bata úbuja, min bul̥iiloolul li sígulasu sajakumuu, li búgoben só.

⁸ Bale búgin baabu bata sígulasu li bulo li etaam yakonete. Li sil̥iilul min sibuk ŋáa’, min kabas kano kubaj ukake’ woono téemeel. Nan Yéesu alobumuu loon muñowu aban, li afamen butiya aan: — An áakimuu sijan boot bajam, li ajanten jak min ajam.

Wahawu wájimuu Yéesu li álobum li bukittenoolum

⁹ Kúgoomaku umbu bulobe.

¹⁰ Yéesu li aaniil: — Ateemit lakaanuukaan jihaas wahawu wahaasutimuu wata Jáyiiyaju joola. Bale kaabuku fan kújamum wahawu unwu li búkittenolum bájum: «Li kujuke, ban let kujuk, li kujam, ban let kúnaanum.»

Yéesu li akitten bukittenoolumabu bata abetaawu ata sígulasu

¹¹ — Muñeˈe bukittenoolumabu umbu bulobe: sígulasu so sommuu Hulimahu hata Ateemit.

¹² Kagendenaku kata bútinabu, ko kommuu bukanabuku kajamumuu Hulimahu hata Ateemit ban, Sayitaane li abil áfulen hó li uyinumawu wooliil jakum bil kúyinen min kufak.

¹³ Etaamayi yata bagisaabu, yo yommuu bukanabuku kajamumuu Hulimahu hata Ateemit ban, li kuyab ho li ésuumansuum. Bale huyawut kuhaa’ li buko, min kúyinen maa jatit, li kukat bo káyinenaku kooliil nan sílaamasu sibilumuu.

¹⁴ Etaamayi yata banuunukenabu bata úbujaawu, yo yommuu bukanabuku kajamumuu Hulimahu hata Ateemit. Bale li kukat uyinoolawu, li ebajayi li másuumamu mata buloŋabu umbe min úgoben Hulimahu; mó lí múji ebukoolumayi yooliil let yaal.

¹⁵ Etaamayi yajakumuu, yo yommuu bukanabuku kajamumuu Hulimahu hata Ateemit kuban, li kuyab ho li buyinum bajake ban li kul̥egen. Li kuhanken min kútuk káyinenaku kooliil lit yok kubaj ebukoolum.

Bukittenoolum bata ehiitum

¹⁶ — An let ayaben ehiitum aban li aŋa’ éking min áhimen yo, mantee foof li akaan yo kata láala elal. Bale, fan aŋa’ yo akaan li yiil bájum bukan kúnokenulumuu li eluufayi, li kujuk mawuŋeyamu.

¹⁷ Mata bajut wah wayoli waatut ubil ujuki. Ban bajut wah wayolooli, waatut ubil uhaasi min úhiisi li mawuŋe.

¹⁸ «Kama jíkaanum buu jijantenemuu eeno! Mata an abajumuu wah, Ateemit fan afamenool. Bale an abajutumuu wahoowah, maayeet jatitaju jan ayinoomuu li aan jo labaje, Ateemit fan ayab jo.»

Kutuyaku kata Yéesu li jaawool

¹⁹ Muñeˈe kutuyaku kata Yéesu li jaawool li kubilool bajuk, bale kuyilaatool kukooj mata búsukabu búji.

²⁰ Bukanabuku li koon Yéesu: — Jaawi li kutuyi kumbuku tíyaŋ mayitowe, ban kufañe kujuki.

²¹ Bale Yéesu li aaniil: — Jaawom li kutuyom buko koonomuu bukanabuku kajantenemuu Hulimahu hata Ateemit ban li kukaan loon hulobumuu.

Yéesu li ayeelen búlus

²² Li bil líiŋ hunak hakee, Yéesu li ájufo li busaana li kúgoomaku koola ló ban li aaniil: — Ulimbaal boot kageb kaaka húwajahu. Mal̥egen li kujow.

²³ Nan kulakomuu kalimbaku, Yéesu li ámooli. Búlus báamak li buyaan bútekul li húwajahu. Busaanaabu li búyij min bulako li buyooko.

²⁴ Kúgoomaku li kukooj Yéesu min kúliwool ban li koonool: — Anahaan, Anahaan ummuwaal li újimaal! Nan Yéesu áliwomuu, li anuuloo búlusabu li kulambajaku, li yeelen. Li lulenoo lul.

²⁵ Muñeˈe Yéesu li aan kúgoomaku koola: — Káyinenaku kooluul kunkay? Bale kúgoomaku li kúkoli ŋáa’, ban li kusego. Li kunaak kugel̥l̥enoo koon: — Kama ánayinaawu ummu fíle okila ammuu ayi, an emmuu alobumuu maayeet li élusayi li étuulool, li malamu li mútuulool?

Yéesu li akesoo uyinum wajakut úfu’ li ánayine an újufoye

²⁶ Muñeˈe Yéesu li kúgoomaku koola li kuya busaanaabu booliil li etaamayi yata kata Gelasa, bújooŋoo etaamayi yata Gálile.

²⁷ Nan Yéesu áwalowumulomuu li busaanaabu, ánayine akee áfulumulo li ésukayi, an uyinum wajakut újufoye li abil kufam. Fiyofiyo ŋáa’ nan ánayinaawu ummu akate kakaano wañ, ban akinut li eluuf, bale li ajow akin li kuyaak kawoki li kugisa.

²⁸ Nan ánayinaawu ajukumuu Yéesu, li akaaw butiya ban li ákuntuŋ hákilool min alob li sembe aan: — Waa lufañe lí ínje, Yéesu, Añiil ata Ateemit ata Haatiya? Liyaaki, jakum ulillimenom.

²⁹ Lalollob loon muñaˈa mata Yéesu lanuuloonuuloo buyinum bajakutumuu min búfu’ li ánayinaawu. Buyinumabu bajakutaabu bujokewoojok ñameeŋe, min bukanabuku kuŋa’ useel min kujenk kuŋenaku li kootaku kata ánayinaawu kuyiliwum kufooyool. Bale fan anaak acac useelawu, min buyinumabu bajakutaabu bújowetumool boot ban an akinut.

³⁰ Yéesu li agel̥l̥en ánayinaawu aanool: — Kajawi buu? Anáyinaawu li aanool: — Kajawom «Jameeŋ». Li mal̥egenamu, uyinum wajakut wameeŋe újufowool.

³¹ Uyinumawu wajakutumuu li uyaakoo Yéesu woonool jakum aan wo ujow boot li sambun.

³² Muñeˈe li baj to li huyuuyahu bumat báamak bata sifulugun balakowe kahoof. Uyinumawu wajakutumuu li uyaakoo Yéesu mantee li akat wo min újufo sifulugunasu. Mal̥egen Yéesu li akat wo min újufo so.

³³ Muñeˈe li uyaan úfulul li ánayinaawu ujow újufo sifulugunasu. Bumatabu foof bo feh li búwubbenoolumul haatiya kagebaku kata hulijahu, buliiŋowul bubil bulo li húwajahu min bújim ló.

³⁴ Nan kumataabuku kata sifulugunasu kujukumuu wahawu wabajumuu, li kutey kujow kúhebul kakinumuu li ésukayi li kakinumuu kuloh yo.

³⁵ Bukanabuku li kúfulul kubil bajukabu bata wahawu wabajumuu. Nan kúliiŋulumuu tan Yéesu alakomuu, li kujuk ánayinaawu an uyinum wajakutumuu úfulummuu li okila, mabahe li kootaku kata Yéesu ban li akaano wañ, ban okila mágiilowe. Ekole li ejokiil.

³⁶ Bukanabuku kamaatumuu wahawu wabajumuu, li kukitten kaabuku buu Yéesu afakenumuu ánayinaawu an uyinumawu wajakutumuu újufoweenumuu.

³⁷ Muñeˈe bukanabuku feh kakinumuu li etaamayi yata ésukayi yata Gelasa li koon Yéesu áfu’ booliil, mata kúkolikoli ŋáa’. Mal̥egen Yéesu li ájufo li busaanaabu min átiiwo alaañ.

³⁸ Anáyinaawu an uyinumawu wajakutumuu úfulummuu li okila, li ayaakoo Yéesu mantee li akatool min anab li akila. Bale Yéesu li alaañenool ban li aanool:

³⁹ — Ulaañ úbalo, ujow ukitten wahawu feh wan Ateemit akaanimuu. Mal̥egen ánayinaawu li ajow ayiiŋen li ésukayi feh wahawu feh wan Yéesu akaanumuu boot li akila.

Yéesu li ayiten ásungute akete ban li afaken anaale ásomute

⁴⁰ Nan Yéesu alaañumuu boot kageb kaaka húwajahu, búsukabu li buyabool, mata bukanabuku feh okila kulakowe kakob.

⁴¹ Muñeˈe ánayine akee an koone Jáyilis li áliiŋul. Okila alakomuu anahaanawu ata eluufayi yata kal̥awaku yata ésukayi. Li ákuntuŋ hákil Yéesu min ayaakoolool aanool abil boot boola.

⁴² Mata lababbaj jiñiil jano jaale, jayilo jibaj simit kuŋen li síl̥uba, jásomute boot eket. Nan Yéesu alakomuu ejowayi boot bata Jáyilis, búsukabu li bunaak buñuññool.

⁴³ Muñeˈe li baj to anaale akee áfululo huña ban afosowut ho jow baj simit soono kuŋen li síl̥uba. Anaalaawu li aban wahool feh bata kubuntenaabuku, bale an li buko ayilaatool afaken.

⁴⁴ Anaalaawu li álohul Yéesu kata búsol min ago’ kabeyaku kata kañaku koola. Huñaahu hoola li huyaan huban to.

⁴⁵ Muñeˈe Yéesu li agel̥l̥en aan: — Ayimaa agolom? Bukanabuku feh li koon inti buko. Fiyeel li aan Yéesu: — Anahaan, lujuke buu búsukabu búwooñenimuu, ban li bunaak buñuññuli.

⁴⁶ Bale Yéesu li aan: — Akee lagolongo’, mata lihahhaas een sembe sífuffu’ lí ínje.

⁴⁷ Nan anaalaawu ahaasumuu aan wahawu wan akaanumuu uhaasihaas, li abil mateelenemaa ákuntuŋ hákil Yéesu. Li akitten Yéesu hákil ésukayi feh wahawu wájiwoolumuu li agolool li buu layaane afakumuu.

⁴⁸ Yéesu li aanool: — Añoolom, káyinenaku kooli kufakeni. Ujow li kásuumaay.

⁴⁹ Nan Yéesu alakomuu elobayi, akee li áfulumul bata Jáyilis ammuu anahaanawu ata eluufayi yata kal̥awaku, abil aanool: — Jáyilis, jísungutaaju jooli jikete. Jakum umit uyoken Anahaanawu.

⁵⁰ Bale nan Yéesu ajamumuu loon muñowu, li aan Jáyilis: — Sákoli, úyinen bale, añooli fan afak.

⁵¹ Muñeˈe nan Yéesu áliiŋumuu bata Jáyilis, akatut an min anoken li eluufayi ábuti li Fiyeel, Saŋ, Saak li atuubaawu li jaaw ata jísungutaaju.

⁵² Bukanabuku feh li kulako búluulen li jíl̥okoo mata añiilawu. Yéesu li aaniil: — Jakum jil̥ok. Jísungutaaju jiketut, bale jímoolimooli.

⁵³ Muñeˈe bukanabuku li kulako kajakakaay Yéesu, mata kuhaase koon jísungutaaju jikeeket.

⁵⁴ Bale Yéesu li átukool li kaŋen, ban li alob li sembe aan: — Añoolom, uyito!

⁵⁵ Mal̥egen jísungutaaju li jíliwo, min jiyaan jiyito. Yéesu li aaniil kusen añiilawu atiñ.

⁵⁶ Sibukoolaasu sata jísungutaaju li sisego ŋáa’. Bale Yéesu li aaniil jakum kulob an wahawu wabajumuu.