Hulimahu Hásuumaahu loon Lík akiic homuu 7 - Jola-Kasa

Yéesu li afaken aloka ata anahaan ata kusollaali kata Lom

¹ Muñeˈe nan Yéesu abanumuu elob bukanabuku kulimaku unku feh, li ajow boot Káfeenawum.

² Li baj Káfeenawum anahaan ata kusollaali kata Lom abaje aloka an ábooliye ŋáa’. Alokaawu li ásomut boot eket.

³ Nan anahaanawu ajamumuu li kulob mata Yéesu, li aboñ kukee li kunahaanaku kata Kusuwifaku bata Yéesu kujow kuyaakoolool mantee li abil afaken alokaawu oola.

⁴ Kunahaanaku kata Kusuwifaku li kujow kutook Yéesu min kuyaakoolool mayaakoo koonool: — Anáyinaawu ummu latootook min ulambenool.

⁵ Mata lafanfañ bukanabuku koololaal, ban akila ájimuu eluufayi yoololaal yata kal̥awaku li eteefi.

⁶ Muñeˈe Yéesu li anaboo li kunahaanabuku kata Kusuwifaku kuwuj. Nan kulehenumuu eluufayi yata anahaanawu ata kusollaaliyaku kata Lom, li áboñul kufaalool kubil koon Yéesu: — Anahaan jakum uyok, mata itookut min únokenul búmbaam.

⁷ Mó mújimuu, ikaañenut ínje humumom ibil itooki. Bale ulob hulim hano bale, alokaawu úmbaam fan afak.

⁸ Injé humumom libaje kunahaanom, ban libaje kusollaali kan ihine éemi anahaaniil. Eenumuu umme: «Ujow!», li ajow. Li een umma: «Ubil!», li abil. Eenumuu alokaawu úmbaam: «Ukaan wahawu unwe!» li akaan wo.

⁹ Nan Yéesu ajamumuu kulimaku unku kata anahaanawu ata kusollaaliyaku, li asego ŋáa’. Li átiiwowul li aan búsukabu bánabulumuu li okila: — Fan ilobuul, ijukolut híndo Isilayeel an abaje káyinen lí ínje loon ánayinaawu ummu.

¹⁰ Muñeˈe nan bukanabuku kan anahaanawu ata kusollaaliyaku aboñumuu kulaañumuu boot bata eluufayi yoola kúliiŋ, li kutook alokaawu mafake.

Yéesu li ayiten añiil akete ata anaale ahoke áyinool

¹¹ Fúlum tó, Yéesu li ajow li ésukayi yaaneyimuu Nayin. Kúgoomaku koola li kúnabul li okila li búsuk báamak foof.

¹² Nan Yéesu alehenumuu kámbiilaku kata ésukayi, li ajuk bukan bátebulo ehuluŋ boot kahok. Aketaawu, jífu’ jan jaawool ahoke áyinool, abaje bale jo. Li baj bukan kameeŋe kata ésukayi kánabulo li anaalaawu.

¹³ Nan Amaaŋenawu ajukumuu anaalaawu ummu, li áyiyenool ŋáa’. Li aanool: — Jakum ul̥ok!

¹⁴ Nan Yéesu aloboolumuu loon muñaˈa aban, li ajow ago’ buyiiŋabu. Bukanabuku kateb bomuu li kuyiten. Yéesu li aan: — Amay, ínje eeni uyito!

¹⁵ Mal̥egen aketaawu li ayito abah, min alako elob. Yéesu li alaañenool asen jaawool.

¹⁶ Bukanabuku kalako tomuu feh li kúkoli. Li kunaak kusal Ateemit koon: — Afulofet áamak láfululo li alolaal. Li koon foof: — Ateemit labile kalamben bukanool.

¹⁷ Wahawu wan Yéesu akaanumuu, li ujamo fú’ li etaamayi feh yata Súde li sísukasu sakooj yomuu.

Saŋ Batiis li aboñ bukan boot bata Yéesu

¹⁸ Muñeˈe kúgoomaku kata Saŋ li kukittenool wahawu unwu feh wan Yéesu akaanumuu. Saŋ Batiis li áhooñul kúl̥uba li buko,

¹⁹ min aboñiil bata Amaaŋenawu kujow kugel̥l̥enool koonool: — Mantee awu ommuu anawu áatimuu abil, mantee joote jinaak akee ábuto?

²⁰ Nan kúgoomaku kata Saŋ kúliiŋumuu bata Yéesu, li koon: — Saŋ Batiis áboñuloli boot kagel̥l̥eni: «Mantee awu ommuu anawu áatimuu abil, mantee joote jinaak akee ábuto?»

²¹ Yaan no unnu, Yéesu li afaken bukan kameeŋe li úsomutawu wooliil, li jilumaju jooliil. Li afaken bukan kan uyinum wajakut újufoye, ban li akaan bukan kameeŋe káfuume kujuk.

²² Ban li aan bukanabuku kan Saŋ áboñulumuu: — Jijow jikitten Saŋ wahawu wan jijukumuu li wan jijamumuu: bukanabuku káfuumumuu kujuke, kakajumuu kujowe jak, bukanabuku kan háhaayee ejokeenumuu kufake, kásokomuu kujame, kaketumuu kuyitowe, ban Hulimahu Hásuumaahu huwaaleyiwaale esukateenayi.

²³ Awólo, anawu an bakaanelabu búmbaam bootutumuu búji li akat bo káyinenaku koola lí ínje.

²⁴ Muñeˈe nan bukanabuku kan Saŋ Batiis áboñulumuu kulaañumuu, Yéesu li alako elob búsukabu mata Saŋ aaniil: — Waa jijowe jijukul li kayiinaayaku? Waa, kacaac kan élusayi élilliŋene? A’aa’!

²⁵ Kama waa jijowe jijukul? Waa, ánayine akaanowe wañ wáyikiye? Jiwayil̥o joon kakaanowemuu wañ watiineniye ban li kóomi li májiihe, li siluufasu sata kúyiiyaku koom.

²⁶ Kama waa sum jijowe jijukul? Waa, afulofet? Eéhe’, ban lahaŋe afulofet.

²⁷ Mata Saŋ okila Hulimahu unhe hata Ateemit hakiicimuu hulobumuu moola hoon: «Fan íboñul an an íhebenulo ayabi hákil, ammuu li ateŋen bútinabu boot li ebilayi yooli.»

²⁸ Yéesu li afamen aan: — Fan ilobuul, bajut an, an anaale abuke ahaŋe Saŋ Batiis. Bale anawu ahaŋumuu feh matiti li Jáyiiyaju jata Ateemit, lahaŋe Saŋ.

²⁹ Nan ésukayi feh, boot li kúyababuhalabu ló, ejamumuu Saŋ li alob loon muñaˈa, li ehaas yoon Ateemit lacoccol, min ebil ábatiiseyiil.

³⁰ Bale Kufaaliisiyeŋaku li kaliikenemuu ésukayi eluwaayi ésukayi eluwaayi yata Móyiis, kafañutumuu min Saŋ ábatiiseyiil, kuhoohoy wahawu wan Ateemit afañumuu boot li buko.

³¹ Yéesu li alaañen aan: — Li ayi leete ikittenoolum bukanabuku kata muñeˈe? Li bukay kunokoole?

³² Kunokoonokoo li bañiil bajowe bubah li kaayeen min kunaak kuhonkoo kufaaliil kooniil: «Jil̥okuul̥ok húl̥oon, jimagut! Lí jíkituluul ukijen wájoobiye wata kuhuluŋ, jil̥okut.»

³³ Mata Saŋ Batiis labiibil, ban anaakut atiñ, anaakut ahob bunuk, li joon: «Saŋ an laam, an buyinum bajakut bújufoye!»

³⁴ Añool-An li abil ban li anaak atiñ, li ahob, li joon: «Fan jijuke, ánayinaawu ummu hutiñ li ehob bunuk bale layinoole, okila ammuu abukaawu ata kúyababuhalabu li ata bukan kukee kajakut!»

³⁵ Bale bukanabuku kanabumuu li bújallowabu bata Ateemit, kuhaase koon bujaajak.

Yéesu li abonket anaale akaane ahoofoola

³⁶ Muñeˈe afaaliisiyeŋ li ahooñ Yéesu kujow hutiñ. Yéesu li ajow bata afaaliisiyeŋawu ajow abah min kutiñ.

³⁷ Li baj li ésukayi inyu anaale ata buloŋ bajakut. Nan ajamumuu kaanaku Yéesu ummu li hutiñ li eluufayi yata afaaliisiyeŋawu, li áŋalul ateefaay ajake mameeŋe eheeñ.

³⁸ Nan áliiŋulumuu, li alako kata búsol Yéesu, bata kootool. Li alako jíl̥ok, min anaak aŋa’ muhuuwamu moola min anecen kootaku kata Yéesu, ban li aŋa’ walawu woola min átil̥ kó. Li anaak áfoon kó, ban li áyu lí kó eheeñayi.

³⁹ Nan afaaliisiyeŋawu ahooñumuu Yéesu boot boola, ajukumuu loon muñaˈa, li aan li buyinumool: «Anáyinaawu ummu alakoweenumuu li mal̥egen afulofet, fan ahaaseen anaalaawu ummu agolemuu loo, okila ammuu ayi. Fan ahaaseen aan laalu anaale ata buloŋ bajakut.»

⁴⁰ Yéesu li aŋa’ hulimahu, li aan afaaliisiyeŋawu: — Simoŋ, libaje wah wan éemi li ilobi. Afaaliisiyeŋawu li aanool: — Ulóbul, Anahaan.

⁴¹ Yéesu li aan: — Bile baj ánayine acaagene sídalam bukan kúl̥uba. Atínaalawu li aakenool sihanjal sata sídalam soono téemeel, ál̥ubutawu soono kúyii kúl̥uba li kuŋen.

⁴² Emmuu bajut an li buko kúl̥uba ayilo alaañen ecaagenayi, ata sídalamasu li akat bo. Muñowu ayi li buko kúl̥uba aate ahaŋ mafañ ánayinaawu ummu?

⁴³ Simoŋ li aan Yéesu: — Lenseen anawu an ecaagenayi yoola ehaŋumuu maluuk. Yéesu li aanool: — Lukooŋe.

⁴⁴ Muñeˈe Yéesu li átiiwo ajooŋoo li anaalaawu, ban li aan Simoŋ: — Lujuke anaalaawu umme? Nan ínokenulomuu booli usenutom mal min ifos kootom. Bale okila muhuwool láfosummuu kootom, ban li átil̥um kó li walawu woola.

⁴⁵ Nan ínokenulumuu uyabumutom li kúfoon, bale okila akatut káfoon kootaku kúmbaam nan ínokenulomuu boot muñeˈe.

⁴⁶ Uŋalut éduulij úyuwom li húkow, bale okila eheeñ láyumuu li kootom.

⁴⁷ Mó mújimuu boot eeni: Uhoofoolawu woola wameeŋaawu ubonketibonket. Mata láhiisenhiisen húbooli háamak. Bale an, an kubonkete jatit, húbooli hatit laate áhiis.

⁴⁸ Ban, Yéesu li aan anaalaawu: — Uhoofoolawu wooli ubonketibonket.

⁴⁹ Muñeˈe bukanabuku kalakomuu hutiñahu li Yéesu li kunaak koon li uyinumiil: «Anáyinaawu ummu okila ammuu ayi, abajumuu kakaañen kata kabonket uhoofoo?»

⁵⁰ Bale Yéesu li aan anaalaawu: — Káyinenaku kooli kufakenifaken, ujow li kásuumaay.