Hulimahu Hásuumaahu loon Lík akiic homuu 4 - Jola-Kasa

Sayitaane li abuntoo Yéesu

¹ Nan Buyinumabu Banabaabu bubilumuu bulako li Yéesu, li álaañumul li katunkaku kaaneyimuu Suuludeŋ. Buyinumabu li bújowetumool boot li kayiinaayaku.

² Nan Yéesu áliiŋumuu li kayiinaayaku, Sayitaane li abuntoolool ló kunak koono kúyii kúl̥uba. Yéesu atiñut wahoowah li kunakaku unku feh. Nan kubanumuu bucaa li bujokool.

³ Muñeˈe Sayitaane li aan Yéesu: — Nokoomuu loon awu ommuu Añiilawu ata Ateemit, ulob huyitikahu unhu min hulaañ húmbuulu.

⁴ Yéesu li aan Sayitaane: — Hulimahu hata Ateemit hoone: «An ayilaat áloŋum húmbuulu bale.»

⁵ Sayitaane li aŋiten Yéesu haŋ máloyi, min áhiisool yan li mano úyiiyawu feh wata etaamayi.

⁶ Ban li aan Yéesu: — Fan iseni sembaasu unsu feh li ebajayi yata úyiiyawu unwu, mata wahawu unwu feh ínje useni, ban liyilo isen wo an an ifañe.

⁷ Kama úkuntuŋumuu hákilom min umanenom, wahawu unwu feh li ulako wooli.

⁸ Yéesu li aanool: — Hulimahu hata Ateemit hoone: «Amaaŋenawu, Ateemitawu uya balewool loote umanen, ban loote ulok boot li akila bale.»

⁹ Muñeˈe Sayitaane li ájowetum Yéesu boot Yeelusalem, min ajow akaanool haatiya tiya Eluufayi yata Ateemit. Nan kúliiŋ dómuu, Sayitaane li aan Yéesu: — Nokoomuu loon awu ommuu Añiilawu ata Ateemit, li ufum boot teetaam, mata Hulimahu hata Ateemit hoone:

¹⁰ «Ateemit fan alob kumalakaaku koola min kufooyi.»

¹¹ Ban foof honsoon: «Fan kuyalleni jakum bil kaati kulo li huyitik.»

¹² Yéesu li aanool: — Hulimahu hata Ateemit honsoon foof: «Jakum ubuntoo Amaaŋenawu, Ateemitawu uya.»

¹³ Muñeˈe nan Sayitaane abanumuu jabuntoolaju jata Yéesu akila bábanulo batuukabu boola feh, li akatool to min ajow boot bil nakee.

Yéesu li átoŋ awaale li etaamayi yata Gálile

¹⁴ Fúlum tó, Yéesu li alaañ boot li etaamayi yata Gálile, sembaasu sata Buyinumabu Banabaabu so li okila. Li kulob moola li halaabahu unhu feh.

¹⁵ Yéesu li anaak aliiken bukanabuku Hulimahu li siluufasu sata kal̥awaku, bukanabuku feh li kunaak kusalool.

Kata Nasalet li kuhoy Yéesu

¹⁶ Muñeˈe, Yéesu li ajow boot Nasalet ban aakenimuu akila añiilawu. Li anoken li eluufayi yata kal̥awaku, loon afiyomuu li akaan. Ban li ayito boot kajanga Hulimahu hata Ateemit.

¹⁷ Muñeˈe li kusenool éliibalayi yata afulofetawu. Li ábooñul yó, li ajuk tan kiicumuu kaanaku:

¹⁸ «Buyinumabu Banabaabu bata Amaaŋenawu bumbu lí ínje, mata lal̥usonl̥us boot kawaale Hulimahu Hásuumaahu kusukateenabuku. Amaaŋenawu láboñulomboñul boot elob mata kafakenaku kata kajokimuu. Min íji káfuumumuu li kulaañ kujuk, boot kákotul kágootenimuu.

¹⁹ Boot kayiiŋen káyiilaku kata kájiyaku kata Amaaŋenawu.»

²⁰ Fúlum tó, Yéesu li abooñ éliibalayi alaañen asen alokaawu ban li abah. Bukanabuku feh kalakomuu li eluufayi yata kal̥awaku li kuŋa’ kúkiliil feh kuya li okila.

²¹ Muñeˈe Yéesu li aaniil: — Síyaatayi inye hulimahu unhe hakiicimuu han jijamumee, hubaje.

²² Bukanabuku feh li súumiil li Yéesu. Li kusego mata kulimaku kásuumaaku kan alobiilumuu. Li koon: — Kama kele inti okila ammuu añiilawu ata Suseef?

²³ Yéesu li aaniil: — Manooman fan jilobom húl̥okuwahu unhe: «Awu ammuu abuntena, ubuntenoolo awu humumi.» Fan foof joonom: «Jijame wahawu feh wan ukaanumuu li ésukayi yata Káfeenawum, muñeˈe ukaan taate li ésukayi yooli wahawu wanolawu.»

²⁴ Fúlum tó, Yéesu li afamen aaniil: — Li mal̥egenamu, boot min ilobuul, bajut afulofet ayabi jak li ésukool.

²⁵ Li mal̥egenamu, boot min ilobuul, bajeene Isilayeel kanaale kameeŋe kahoke kúyiniil nan afulofetawu Elí alako to nomuu; nan emitayi elaalutumuu simit síhaaji li kúl̥eeñ hutok li hano, min bamuufaay báamak bulako li ésukayi feh.

²⁶ Bale Ateemit aboñut Elí bata akee li buko. Bata anaale akee bale laboñool, ahoke áyinool ban li akin Salefita li etaamayi yata Sidoŋ.

²⁷ Bajeene foof Isilayeel bukan kameeŋe kata háhaayee. No unnu, afulofetawu Elíise o’ li buloŋ. Imban Elíise afakenut anoowan li buko. Naamaŋ bale áfulumulomuu li etaamayi yata Siili, lafakenumuu.

²⁸ Bukanabuku feh kalakomuu li eluufayi yata kal̥awaku, etindihuuñ yáamak li ejokiil nan kujamumuu kulimaku unku.

²⁹ Li kuyito kujok Yéesu kúfulen tíyaŋ ésukayi. Ban li kujow li okila boot haatiya huyuuyahu dán ésukayi yooliil eteefimuu, min kufañeen kúhalabumulool ló.

³⁰ Bale Yéesu li ájowumiil li tut ajow bútinool.

Yéesu li akesoo buyinum bajakut búfu’ li ánayine akee

³¹ Muñeˈe Yéesu li ajow boot Káfeenawum yammuu ésuk yata etaamayi yata Gálile, min anaak aliiken bo bukanabuku Hulimahu hata Ateemit li kúyiiyaayaku kata Kusuwifaku.

³² Baliikenelabu bata Yéesu li bukaan bukanabuku kalakomuu bajantenabu boola kusego ŋáa’, mata lanaanaak alob li sembe ló.

³³ Li baj li eluufayi yata kal̥awaku ánayine an buyinum bajakut bújufoye, anaake akaaw butiya aan:

³⁴ — Aah! Yéesu ata Nasalet, waa lookoolaale? Waa lubiibil boot kájimenoli? Lihaase awu ommuu ayi: Awu ommuu Anawu anabaawu an Ateemit aboñulomuu.

³⁵ Yéesu li anuuloo buyinumabu bajakutumuu li sembe aan: — Ulu ban li úfu’ li ánayinaawu ummu! Buyinumabu bajakutumuu li bubet ánayinaawu teetaam hákil ésukayi feh, min búfu’ li akila, bakaanutool majakut.

³⁶ Bukanabuku feh li kúkoli min kunaak kugel̥l̥enoo koon: — Kama laalu hulim buu, unhu? Anuuloo uyinumawu wajakutaawu li sembe li kakaañen ló, li úfu’!

³⁷ Yéesu li ajamo aban básukabu feh bakoojumuu ésukayi yata Káfeenawum.

Yéesu li afaken bukan kameeŋe kásomute

³⁸ Muñeˈe Yéesu li áfulumul li eluufayi yata kal̥awaku. Li áliiŋ, li atook al̥ol Simoŋ aale bújuusa báamak babetelool. Li kuyaakoo Yéesu mantee li afakenool.

³⁹ Yéesu li ásiten ajooŋoo li anaalaawu min anuuloo bújuusaabu li sembe. Li búfu’ li okila, min anaalaawu ayaan ayito alakoyiil kakaan kutiñ.

⁴⁰ Nan banakabu bulomuu, bukanabuku feh kabajumuu booliil kúsomuta kata jilum janoojan, li kubil li buko boot bata Yéesu. Yéesu li awalen kuŋenool li húkow hata ásomuta anoowan min afakeniil.

⁴¹ Uyinum wajakut li úfu’ foof li bukan kameeŋe kan újufoyeenumuu. Li unaak ukaaw, wo li káfulaku woon: — Awu ommuu Añiilawu ata Ateemit! Bale Yéesu li anuuloo wo ban akatut wo min ulob, mata wo uhaase woon okila ammuu Afakenaawu.

Yéesu li ájowum Káfeenawum boot Súde

⁴² Nan banakabu bukatenumuu, Yéesu li áfu’ li ésukayi ajow boot tan wayitowe. Búsuk li bulakowool huŋes. Nan búsukabu bujukoolumuu, li bufañ bútukool jakum bil ajow akatiil to.

⁴³ Bale Yéesu li aaniil: — Leete foof ilob Hulimahu Hásuumaahu hata Jáyiiyaju jata Ateemit li sísuk saasu. Mata wahawu unwu újimuu Ateemit li aboñulom.

⁴⁴ Muñeˈe Yéesu li anaak awaale li siluufasu sata kal̥awaku sata etaamayi yata Súde.