Hulimahu Hásuumaahu loon Lík akiic homuu 3 - Jola-Kasa

Saŋ Batiis afulofet

¹ Muñeˈe li emitayi ekaatenayi yata Jáyiiyaju jata áyiiyawu áamakawu Tibeel, nan Fons Filat alako nomuu águubelunaalawu ata etaamayi yata Súde, Elod li alako anahaanawu ata etaamayi yata Gálile. Atuyool Fílib li alako anahaanawu ata etaamayi yata Itúle li yata Talakonit. Lisaniyaas li alako anahaanawu ata etaamayi yata Abilen.

² Aan buko li Kayif li kulako no kúlambaaku káamakaku. Ateemit li asen hulimahu hoola Saŋ ata Sakali, li kayiinaayaku.

³ Saŋ li añaahoo li etaamayi feh yakoojumuu katunkaku kaneyimuu Suuludeŋ, min anaak awaale aan: — Jítiiwo jiŋa’ buloŋ buwunkul, min jíbatiiseyi mantee Ateemit li abonket uhoofoolawu wooluul.

⁴ Muñowu kulimaku kan afulofetawu alobumuu kúbajummuu, kan akiicumuu li éliibalayi yoola mata Saŋ, aan: «Laale hulimahu hata anawu abaŋulowemuu li kayiinaayaku aan: “Jíhosul bútinabu boot li Amaaŋenawu, jikaanool útin wacole!

⁵ Buwokaay banooban fan bul̥iyi, Huyuuy li hulij hanoohan fan húliili, Utínawu wáŋondikoomuu fan ucoleni, Utínawu wajakutumuu fan umemeni.

⁶ Ban bukanabuku feh fan kujuk koon Ateemit lafañe afakeniil”.»

⁷ Muñeˈe Saŋ li aan búsukabu babilumuu boot min ábatiiseyiil: — Sil̥aal̥akase! Ayimaa abuntuluul aanuul jíbatiisemuu li jifak li katekaku kaanomuu li kubil kata etindihuuñayi yata Ateemit?

⁸ Muñeˈe kama jikaan majake, min jíhiis kaanaku jibabbaj buloŋ buwunkul. Ban jakum jibuntoolo min joon: «Abulaham ammuu átuubawoli ahaan.» Mata fan ilobuul kaanaku Ateemit layilo áfunnumul li kuyitikaku unku bañiil bata Abulaham!

⁹ Jíkaanum, hufiikumahu hukaani huban tin huhaalahu hata unuunukenawu boot kafalen. Kama bunuunuken banooban baatutumuu bubaj ebukoolum yajake fan bufaleni beten li sambun.

¹⁰ Búsukabu li bugel̥l̥en Saŋ boonool: — Kama waa joote jikaan?

¹¹ Saŋ li aaniil: — An abajumuu újufo úl̥uba li asen kaaku an abajut kájufo. An foof abajumuu atiñ, li asen an abajut atiñ.

¹² Kúyababuhal li kubil foof boot min Saŋ ábatiiseyiil, kúliiŋul li kugel̥l̥enool koonool: — Anahaan waa joote jikaan?

¹³ Saŋ li aaniil: — Jakum jilob bukanabuku min kuhal haŋ wahawu wan eluwaayi elobumuu.

¹⁴ Kusollaali li kugel̥l̥enool foof koonool: — Olóli waa joote jikaan? Saŋ li aaniil: — Jakum jilam sídalam an, jakum jímal jiya li an, jijok to li bacaamabu booluul.

¹⁵ Muñeˈe ésukayi li elako banaak li kákangum ló. Anoowan li buko li anaak ayinoo li aan nakee Saŋ ammuu Afakenaawu.

¹⁶ Saŋ li aaniil foofiil feh: — Injé li mal li bátiisewumuul, bale an ummu li ebil ahaŋom sembe. Itookut min il̥el̥ uneewawu wata sidallaasu soola. Akila fan ábatiisewuul li Buyinumabu Banabaabu, li sambun.

¹⁷ Káweyumaku koola kunku li kaŋenool. Fan awuu ekaakayi yoola ejow éfu’ kis, li aheefen edenfeteŋayi, ban li awuu yo ahahen li bulaŋen. Bale búhulabu fan ásu’ bó li sambun sáhokoweliit.

¹⁸ Saŋ li alaañen awankulen ésukayi li wah wameeŋe, ban li alobiil Hulimahu Hásuumaahu.

¹⁹ Bale Saŋ Batiis li awataten águubelunaalawu Elod mata layayyab Elodiyaas, anaalaawu ata atuyool Fílib, Fílib okila li buloŋ, mata lakankaan foof wah wameeŋe wajakut afamen to.

²⁰ Elod li amit ajok Saŋ akul̥ afamen to li wah waawu feh wan akaanumuu.

Saŋ li ábatiise Yéesu

²¹ Nan Saŋ Batiis ábatiisemuu ésukayi feh aban, li ábatiise foof Yéesu. Nan Yéesu alakomuu kal̥awaku, emitayi li ébabulo.

²² Muñeˈe Buyinumabu Banabaabu li búwalowul li kambu kata éleebaan bubil bulako li akila. Hulim li hujami li emitayi haane: — Awu ommuu Añoolom an íboolimuu ŋáa’. Buyinumom feh li awu li kaan bo.

Kalandaku kata Yéesu Kilisita

²³ Nan Yéesu alehenumuu simit áyii li kuŋen, li átoŋ awaale ésukayi Hulimahu Hásuumaahu. Loon bukanabuku kunaake kuyinoomuu, Yéesu añiil ata Suseef ata Héli.

²⁴ Héli ata Matat, Matat ata Lebi, Lebi ata Meliki, Meliki ata Janay, Janay ata Suseef,

²⁵ Suseef ata Matatiyaas, Matatiyaas ata Amos, Amos ata Náhum, Náhum ata Esili, Esili ata Nagay,

²⁶ Nagay ata Maat, Maat ata Matatiyaas, Matatiyaas ata Semeyin, Semeyin ata Sosek, Sosek ata Soda,

²⁷ Soda ata Sowanan, Sowanan ata Lesa, Lesa ata Solobabel, Solobabel ata Salaasiyel, Salaasiyel ata Neli,

²⁸ Neli ata Meliki, Meliki ata Adi, Adi ata Kosam, Kosam ata Elimadam, Elimadam ata Eel,

²⁹ Eel ata Yéesu, Yéesu ata Eliyeseel, Eliyeseel ata Soolim, Soolim ata Matat, Matat ata Lebi,

³⁰ Lebi ata Simiyoŋ, Simiyoŋ ata Súda, Súda ata Suseef, Suseef ata Sonam, Sonam ata Eliyakim,

³¹ Eliyakim ata Meleya, Meleya ata Menna, Menna ata Mataata, Mataata ata Natan, Natan ata Dayit,

³² Dayit ata Isay, Isay ata Sobed, Sobed ata Bóos, Bóos ata Sala, Sala ata Naasoŋ,

³³ Naasoŋ ata Aminadab, Aminadab ata Adimin, Adimin ata Alini, Alini ata Esilom, Esilom ata Falees, Falees ata Súda,

³⁴ Súda ata Sakob, Sakob ata Isaak, Isaak ata Abulaham, Abulaham ata Taala, Taala ata Nakool,

³⁵ Nakool ata Séeluk, Séeluk ata Lágo, Lágo ata Falek, Falek ata Ebeel, Ebeel ata Sala,

³⁶ Sala ata Kayinam, Kayinam ata Alifasad, Alifasad ata Sem, Sem ata Nówe, Nówe ata Lamek,

³⁷ Lamek ata Matusala, Matusala ata Enok, Enok ata Saaled, Saaled ata Maleleel, Maleleel ata Kayinan,

³⁸ Kayinan ata Enos, Enos ata Set, Set ata Adam, Adam ata Ateemit.