Hulimahu Hásuumaahu loon Lík akiic homuu 23 - Jola-Kasa

Batiibabu bata Yéesu hákil Filat

¹ Bukanabuku feh kalakomuu li hujojahu li kuyito min kuŋa’ Yéesu kújowetum bata Filat.

² Nan kúliiŋumuu, li kútoŋ kúmal kukaan Yéesu koon: — Jitootook ánayinaawu umme okila li kakaan ésukayi égugguloo. Laaniisaan jakum kuhal báhalabu bata áyiiyawu áamakawu, ban li aan okila humumool ammuu Afakenaawu, áyiiyawu ooliil.

³ Muñeˈe Filat li agel̥l̥en Yéesu aanool: — Awu ommuu áyiiyawu ata Kusuwifaku? Yéesu li aan Filat: — Lulobulo mo awu humumi.

⁴ Filat li aan huhaanaahu hata élambaayi li búsukabu: — Injé ijukut wah wan ánayinaawu umme akaane wajakut, waate úji li abaj katek.

⁵ Bale bukanabuku li kuhaŋ malob li sembe koon: — Lakaanekaan ésukayi égugguloo li baliikenelabu boola. Li etaamayi yata Gálile látoŋumulo, álowul li yata Súde. Muñeˈe láliiŋulo taate.

Batiibabu bata Yéesu hákil Elod

⁶ Nan Filat ajamumuu li kúl̥imen etaamayi yata Gálile, li agel̥l̥en aan: — Anáyinaawu ummu an ata etaamayi yata Galile?

⁷ Nan Filat ajamumuu kaanaku Yéesu li etaamayi yan Elod aakenumuu láfulumulo, li aboñool o’ Elod, mata no unnu Elod foof okila li ésukayi yata Yeelusalem.

⁸ Elod li súumool ŋáa’ nan ajukumuu Yéesu, mata lajanjam li kulob moola, ban ló bafiyowe nan afañeenumuu min ajukool. Li afañeen foof min ajuk Yéesu li kakaan wah wájaahaleniye.

⁹ Elod li agel̥l̥en Yéesu kulim kameeŋe, bale Yéesu abagutool.

¹⁰ Huhaanaahu hata élambaayi li kaliikenemuu ésukayi eluwaayi ésukayi eluwaayi yata Móyiis li kuyito to, min kunaak kuhanken min kúmal kuya li Yéesu.

¹¹ Elod li kusollaaliyaku koola li kajakakaay Yéesu, ban li kubesool. Li kukaanool hújufo háyikiye kuban, li kulaañenool bata Filat.

¹² Elod buko li Filat kajamooleenutumuu naanaŋ, li kulaañ kufaalaay hunakahu unhu.

Filat li asen búsukabu Yéesu boot bumuk

¹³ Muñeˈe Filat li ahooñ bajoj huhaanaahu hata élambaayi, kunahaanaku, li ésukayi,

¹⁴ min aaniil: — Jíŋaluloŋŋalul ánayinaawu ummu min joonom lakaanekaan ésukayi égugguloo. Bale ligel̥l̥enoogel̥l̥en hákiluul, ban ijukut li okila butila banooban bájiwuulumuu li jil̥oofool.

¹⁵ Ban Elod foof ajukut li okila butila banooban, mata lálaañenulolaaloolaañenul. Mó mújimuu, ánayinaawu ummu akaanut wah waate újiwool li aket.

¹⁶ Kama boot min ilob min kutekool kuban, li ikatenool.

¹⁷ [Li kagaan kanookan kata Faak, Elod fan ákatenuliil an an kukul̥e.]

¹⁸ Bale búsukabu feh li bulob butiya li mano boon: — Umuk ánayinaawu ummu! Ukátenuloli Balabaas!

¹⁹ (Balabaas lajokijok kul̥ mata búgugguloo bubaje li ésukayi, li mata an an amuke.)

²⁰ Emmuu Filat lafañeene akaten Yéesu, li alaañen alob li búsukabu.

²¹ Bale li kulob butiya koonool: — Ubaaŋool li ekuluwa! Ubaaŋool li ekuluwa!

²² Filat li alaañen alob búhaajut aan: — Kama waa lakaane wajakut? Ijukut li okila wah wajakut wan akaane waate újiwool li áati aket. Muñeˈe kama boot min ilob min kutekool kuban, li ikatenool.

²³ Bale búsukabu li jooŋoo to min buhaŋ mahanken min bulob butiya boon, Yéesu laate abaaŋi li ekuluwa. Húcuhahu hooliil li hulamool.

²⁴ Muñeˈe Filat li alob min kukaan wahawu wan búsukabu boonoolumuu akaan.

²⁵ Mal̥egen li akaten anawu an kufañumuu min ákatenuliil, an kukul̥umuu mata búgugguloo li mata jamuk an, min aseniil Yéesu kujow kukaan loon súumiilumuu.

Li kubaaŋ Yéesu li ekuluwa

²⁶ Nan kusollaaliyaku kulakomuu kájowetumaku kata Yéesu, li kufam li ánayine akee an koone Simoŋ ata ésukayi yaaneyimuu Siilen, okila li élaañumul bata ul̥ibawu. Kusollaaliyaku li kujok Simoŋ min kutuuŋool ateb ekuluwaayi min anab li búsol Yéesu.

²⁷ Búsuk báamak li bunab li Yéesu li foof kanaale kalakowe jíl̥ok li kanaake kul̥okoo mata Yéesu áji.

²⁸ Yéesu li átiiwowul ajooŋoo li kanaalaabuku ban li aaniil: — Kaalaabuke kata Yeelusalem, jakum jil̥okom, bale jil̥ok mata bukuluul humumuul li mata bañooluul.

²⁹ Mata kunakaku kunku li ebil, nan bukanabuku kommuu koon: «Awólo kaalaabuku kayilaatumuu kuhalet, kámusutumuu kujam huhaane, li kámusutumuu kulaahen añiil!»

³⁰ Taŋayi fan ebil éliiŋ nan bukanabuku kommuu koon kuyuuyaku: «Jílowoli téeti!» Li koon kulijaku: «Jíhimenoli!»

³¹ Mata, fan bunuunukenabu baloŋumuu kucooce, naane baketumuu li kubil kukaan bo buu?

³² Li kújowetumoo foof kánayine kúl̥uba kakaane majakut, boot kujow kumukoo to li Yéesu.

³³ Nan kúliiŋumuu tan koonemuu «Husend», li kubaaŋ to Yéesu li ekuluwaayi. Ban li kubaaŋoo to foof li sikuluwa bukan kúl̥uba kakaane majakut, aahu kaŋen Yéesu kúli, aahu kaŋenool kamay.

³⁴ Muñeˈe Yéesu li aan: — Faafa, ubonketiil, mata kuhaasut waa kukaane li wo. Kusollaaliyaku li kuñak kútuken min kugaboo wañawu woola.

³⁵ Muñeˈe ésukayi li eyito to min enaak ejuke. Kunahaanaku kata Kusuwifaku li kulako kanukuto Yéesu min kunaak koon: — Emmuu lafakenfaken kukee, muñowu kama afakenoolo okila humumool, nokoomuu loon akila ammuu mal̥egen Afakenaawu, an Ateemit al̥usumuu!

³⁶ Kusollaaliyaku foof li kulako kanukuto Yéesu. Li kukoojool min kusenool bunuk bahile.

³⁷ Li koonool: — Nokoomuu loon awu ommuu áyiiyawu ata Kusuwifaku, li ufakenoolo awu humumi min jijuk!

³⁸ Li kukiic kulimaku unke kukaan haatiya húkowahu hata Yéesu: «Laale, áyiiyawu ata Kusuwifaku.»

³⁹ Akee li bukanabuku kúl̥uba kajakutumuu kan kabaaŋumuu, li agel Yéesu aanool: — Inti awu ommuu Afakenaawu? Ufakenoolo awu humumi ban li úfakenoli!

⁴⁰ Bale aahu li awataten afaalool aanool: — Ukóliwut Ateemit, awu jabajumuu katekaku kanolaku li okila?

⁴¹ Olola, li mal̥egenamu tottook min ubaja katekaku unke, mata wahawu wan ukaanamuu wajakutumuu újimuu li ubaja katekaku unke. Bale okila akaanut wah wajakut.

⁴² Ban li aan Yéesu: — Yéesu, ban li uwayil̥owom nan ommuu li úlaañul loon áyii.

⁴³ Yéesu li aanool: — Li mal̥egenamu fan ilobi, síyaataye fan ulako lí ínje alijana.

Eketayi yata Yéesu

⁴⁴ Muñeˈe nan tinak alehenumuu kayiten, etaamayi feh li élim boot yok ewaatuwayi éhaajutayi banakabu bakel̥e.

⁴⁵ Nan banakabu búlimenumuu, hufalalahu hata eluufayi yata Ateemit li húhaacowumul li tut.

⁴⁶ Yéesu li akaaw butiya aan: — Faafa, iŋa’ yaalom iseni ooken. Nan Yéesu alobumuu kulimaku unku aban, li aket.

⁴⁷ Nan anahaanawu ata kusollaaliyaku kata Lom, ajukumuu wahawu wabajumuu, li asal Ateemit ban li aan: — Li mal̥egenamu, ánayinaawu ummu lakankaan an acole!

⁴⁸ Búsukabu feh babilumuu bajukabu bata min kommuu li kukaan Yéesu, li bujuk wahawu wabajumuu. Muñeˈe li kulaañ kujow bóot máyiyenoole min kunaak kutek li ugiŋawu wooliil.

⁴⁹ Kubuke Yéesu feh, li kanaalaaku kánabulumuu li okila fin to Gálile, li kulako lóyi min kunaak kujukelul wahawu wabajumuu.

Kahokaku kata Yéesu

⁵⁰ Muñeˈe li baj ánayine akee an koone Suseef áfulumulo li ésuk yakee yata Kusuwifaku yaaneyi Alimate. Suseef li akaan ánayine asúume ban li acol. Li Hujojahu háamakahu hata Kusuwifaku lalakowe.

⁵¹ Afañut wahawu wan kaabuku kunongumuu kakaan, li wan kukaanumuu. Suseef banaak ebilayi yata Jáyiiyaju jata Ateemit lalakowe.

⁵² Muñeˈe li ajow boot bata Filat ajow alobool min asenool ehuluŋayi yata Yéesu.

⁵³ Fúlum tó, li áwalenul ehuluŋayi li ekuluwaayi, ban li aŋa’ kábil min al̥iim yo aban, li aŋa’ yo ajow ahok li huyaak hawoki li hugisa, dán an ámusut ahoki.

⁵⁴ Hunakahu unhu, hunak hata kafaleyaku kata húyiiyaayahu hata Kusuwifaku, ho balakowe li hútoŋ.

⁵⁵ Kanaalaabuku kánabulumuu li Yéesu li etaamayi yata Gálile, li kunab li Suseef min kujuk huyaakahu, li foof buu ehuluŋayi yata Yéesu ehinteni lómuu eeno.

⁵⁶ Fúlum tó, kanaalaabuku li kulaañ bóot li ésukayi kujow kúfalewul múki’ li eheeñ boot li ehuluŋayi. Nan hunakahu hata húyiiyaayahu hata Kusuwifaku húliiŋumuu, kanaalaabuku li kujow kuyool̥o, loon eluwaayi elobumuu.