Hulimahu Hásuumaahu loon Lík akiic homuu 19 - Jola-Kasa

Saase li afañ min ajuk Yéesu

¹ Yéesu li anoken li ésukayi yan koonemuu Séliko, min ájowum dó áfu’ baaba.

² Muñeˈe li baj to ánayine akee aaneyi Saase, alakowe anahaanawu ata kayabemuu búhalabu, ban li akaan an abaje.

³ Saase li alako huŋes mantee li ajuk ayi ammuu Yéesu. Bale emmuu lakankaan an atit, búsukabu li búji ayilaat ajuk Yéesu.

⁴ Saase li atey ayab kayooŋ, ajow aŋito li bunuunuken ban koone busikomool, balakowe tan Yéesu ammuu li ájowum, mantee li ajukool.

⁵ Nan Yéesu áliiŋulumuu tan bunuunukenabu, li ateb kúkilool li ajuk Saase, li aanool: — Saase, úwalowul cab, mata leete ilako síyaat booli.

⁶ Mal̥egen Saase li áwalowul cab, min ayab Yéesu li ésuumansuum ló.

⁷ Nan bukanabuku feh kalako tomuu kujukumuu loon muñaˈa, súumutiil min koon: — Anáyinaawu ummu lajowe alako bata ahoofoola!

⁸ Saase li ayito hákil Amaaŋenawu, min aanool: Ujanten, Anahaan, boot min íkej ebajayi yúmbaam li tut isen kusukateenabuku. Ban nokoomuu loon libumbunt an min iŋa’ joola, fan ilaañenool jo ñoono ñabakii.

⁹ Yéesu li aan Saase: — Ateemit lafakene butoŋabu umbe síyaat, mata ánayinaawu umme foof bubukoolum Abulaham.

¹⁰ Mata Añool-An labiibil huŋes li kafaken bukanabuku kájimumuu.

Bukittenoolum bata an aŋale ebajayi yoola asen kulokawool kookenool

¹¹ Nan bukanabuku kulakomuu bajantenabu bata kulimaku unku, Yéesu li alaañen alobiil bukittenoolum. No unnu, okila balehene Yeelusalem, ban bukanabuku li kunaak kuyinoo li koon mantee Jáyiiyaju jata Ateemit junju li jiyaan jibil.

¹² Muñeˈe Yéesu li aaniil: — Bile baj ánayine akee abuki li butoŋ bata áyii, alakowe ejow boot li etaam yáloyiye jow kusenool bo jáyii, min álaañul.

¹³ Nan ánayinaawu alakomuu li ajow, li áhooñul kulokaaku koola kuŋen, min aseniil anoowan ehanjal yata éwulus ban li aaniil: «Jiŋa’ sídalamasu unsu min jilok li so boot yok nan emmuu ílaañul.»

¹⁴ Bale bukanabuku kata etaamayi ban akinumuu li kuhoyool. Muñeˈe li kuboñ bukan kunabenool kujow koonool: «Olóli jifañut min ánayinaawu ummu alako áyiiyawu óololi.»

¹⁵ «Nan bile kusenumuu ánayinaawu jáyiiyaju kuban, li álaañul boot li etaamayi yoola. Nan áliiŋulumuu, li áhooñul kulokaabuku koola, kan asenumuu sídalamasu min kulok, boot min ahaas butum buu kubaje li so.

¹⁶ Alokaawu átinaalawu li abil áliiŋul li aan: “Anahaan, sihanjal sata éwulus soono kuŋen líbajume li yanolayi yan usenommuu.”

¹⁷ Ayíiyawu li aanool: “Jaajak, lukankaan aloka ajake. Emmuu lukankaan jak li wahawu watitawu wan eenimuu ukaan, muñeˈe boot min ikaani ulako anahaan ata sísuk soono kuŋen.”

¹⁸ Alokaawu ál̥ubutawu li abil áliiŋul li aan: “Anahaan, sihanjal sata éwulus soono hutok líbajume li yanolayi yan usenommuu.”

¹⁹ Ayíiyawu li aanool: “Awu, fan ikaani ulako anahaan ata sísuk soono hutok.”

²⁰ Muñeˈe aloka akee li abil áliiŋul li aan: “Anahaan, ehanjalayi yooli yunye. Liŋaŋŋa’ yo ikaan li kal̥aac ijow iyog,

²¹ mata líkoliyikoli. Lukankaan ánayine átaañiye. Luŋaleŋa’ wah wan ulokut, ban li unaak ucac tan uwañut.”

²² Ayíiyawu li aanool: “Awu aloka ájakaatiye. Boot min itiibumi li kulimaku kooli humum ko. Kama luhaasumuu oon ínje ánayine átaañiye, liŋaleŋa’ wah wan ilokut, licacecac tan iwañut?

²³ Wáa lí úji uŋalut kama sídalamasu súmbaam ujow ukaan li bank, ibilum ílaañul, li ijow íŋalul só ló, famen to san sibukoomuu?”

²⁴ Muñeˈe áyiiyawu li aan bukanabuku kayito tomuu: “Jiyab li okila ehanjalayi yata éwulusayi yan aakumuu jisen abajumuu soono kuŋenayi.”

²⁵ Bale li koon áyiiyawu: “Anahaan, okila ummu min afane áaki sihanjal soono kuŋen!”

²⁶ Ayíiyawu li aaniil: “Boot min eenuul, an abajumuu wah, Ateemit fan afamenool. Bale an abajutumuu wahoowah, maayeet jatitaju jan abajumuu, Ateemit fan ayab jo.

²⁷ Muñeˈe kulatoolawom, kafañutumuu min ilako áyiiyawu ooliil, jíŋaluliil taate, min jimukiil hákilom.”»

Yéesu li ajow boot Yeelusalem

²⁸ Nan Yéesu alobumuu kulimaku unku aban, li ayab hákil búsukabu min ajow boot Yeelusalem.

²⁹ Nan alehenumuu ésukayi yata Betifaase li yata Betani tin loon huyuuyahu hata unuunukenawu wan koonemuu Olíibiye, li aboñ kúl̥uba li kúgoomaku koola aaniil:

³⁰ — Jijow boot li ésukayi yammuu hákiluul. Nan jommuu jíliiŋ, fan jijuk hulaaha hata asum makoki, han an alemboololut li ho. Jíl̥el̥ul hó jíŋalul boot taate.

³¹ An agel̥l̥enulumuu aanuul: «Wáa újiye li jil̥el̥ hulaahaahu hata asumawu?», li joonool: «Amaaŋenawu joke li ho.»

³² Mal̥egen kúgoomaku kúl̥uba kan aboñumuu li kujow kúliiŋ, ban li kujuk wahawu feh loon Yéesu alobiilumuu.

³³ Nan kúgoomaku kulakomuu kal̥el̥aku kata hulaahaahu hata asumawu, kakil homuu li kooniil: — Wáa újiye li joono li kal̥el̥ hulaahaahu hata asumawu?

³⁴ Kúgoomaku li kooniil: — Amaaŋenawu joke li ho.

³⁵ Ban li kuŋa’ ho kújowetum Yéesu. Li kuŋa’ kújufowaku kooliil kulemben li búsolabu bata hulaahaahu hata asumawu, ban li kukaan Yéesu alemboo li ho.

³⁶ Muñeˈe mo Yéesu ajowemaa, mo bukanabuku kuŋalemaa kújufowaku kooliil kutal li bútinabu.

³⁷ Nan Yéesu alehenumuu Yeelusalem, li bútinabu báwalowumulomuu li huyuuyahu hata unuunukenawu wan koonemuu Olíibiye, búsukabu bata kúgoomaku koola ésuumansuum li elako li buko, min kútoŋ kusal Ateemit ban li kumanenool butiya, mata wahawu feh wájaahalenimuu wan kujukumuu.

³⁸ Li kunaak koon: «Ateemit ajow ásooniyen áyiiyawu, abilummuu li kajawaku kata Amaaŋenawu! Kásuumaay kujow kubaj li emitayi, ban máyiineniyamu li mulako li Ateemit, haatiya tiya emitayi!»

³⁹ Muñeˈe kufaaliisiyeŋ kukee kalakowe li búsukabu li koon Yéesu: — Anahaan, ulob kúgoomaku kooli min kulu.

⁴⁰ Yéesu li aaniil: — Fan ilobuul, kulumuu, kuyitikaku fan kúlobul butiya.

Yéesu li al̥ok mata Yeelusalem

⁴¹ Nan Yéesu alehenumuu Yeelusalem, ajow aŋanden yo, li al̥ok mata yo,

⁴² aan: — Uhaaseenemmuu maayeet síyaat, waa uyilimuu useni kásuumaay! Bale muñeˈe uyilaat ujuk wo.

⁴³ Mata fan bil baj kunak nan kulatoolayi kommuu kubil kúkinki kúwooñen, li kubahi ban li kúgoggolenumuli li ugebawu feh.

⁴⁴ Fan kúbuji foofi feh, awu li bukanabuku kakinumuu li awu; ban let kukat maayeet huyitik hano min hulemboo li hufaal ho. Mata uhaasut taŋayi nan Ateemit abilumuu boot kafakeni.

Yéesu li akesoo kújulawaaku li eluufayi yata Ateemit

⁴⁵ Yéesu li anoken li eluufayi yata Ateemit áliiŋ, li akesoo bukanabuku kalako dómuu kájulaaku.

⁴⁶ Li aaniil: — Hulimahu hata Ateemit hoone: «Eluufayi yúmbaam fan elako eluuf yata kal̥aw.» Yéesu li afamen aan: — Bale bukuluul li jilaañen yo elako kawokaay kata ékuu!

⁴⁷ Yéesu li anaak aliiken bukanabuku Hulimahu hata Ateemit hunakoohunak li eluufayi yata Ateemit. Bale huhaanaahu hata élambaayi, li kaliikenemuu ésukayi eluwaayi ésukayi eluwaayi yata Móyiis, li kunahaanaku kata ésukayi li kuŋes min kumuk Yéesu.

⁴⁸ Bale kuhaasut buu kóomi li kukaan eeno, mata ésukayi feh enaanaak ejantenool ŋáa’.