Hulimahu Hásuumaahu loon Lík akiic homuu 17 - Jola-Kasa

Yéesu li alob mata kahoofoo li mata kabonket

¹ Yéesu li aan kúgoomaku koola: — Fan baj nanoonan wah waate úji bukanabuku li kulo li kahoofoo. Bale íyeno, anawu ájimuu bukanabuku li kuhoofoo.

² Anawu ummu kóyumool min kukok kaneew li enuy kul̥oofool li ekondo’, ban li kuŋalool kujow kubeten li hal min akeel ló, akila bájiye akee li umbuku kakitemuu li kúyinen, li alo li kahoofoo.

³ Jíkaanum bukuluul humumuul! «Nokoomuu loon atuyi akaane kahoofoo, ujow ujukool min uwatatenool li mal̥egen. Ajokumuu li ehaaseen, ubonketool.

⁴ Li bil nokoo loon atuyi afete li awu ñooño ñatok li ñál̥uba li etihunakaayi, ban li abil ñooño ñatok li ñál̥uba li etihunakaayi aani: “Lijoke li ehaaseen min ifetumuu li awu,” loote ubonketool.»

Sembe sata káyinen li Yéesu

⁵ Kufootalaku: — Ufamen káyinenaku kan jibajumuu li awu.

⁶ Amaaŋenawu li aaniil: — Nokoomuu loon káyinenaku kooluul kutitiyeene loon jikool jata anuunukenawu aaneyimuu mutaad, fan joon bunuunukenabu umbu báamakabu baaneyimuu búmiiliye: «Uluuco min ujow ul̥ukoolo li husamuwahu», fan bukaan loon jilob bomuu.

Wahawu wan aloka áatimuu anaak akaan

⁷ — Ayi li bukuluul aate abaj aloka ajowe ewañ, mantee humat kúgalalaan, li ajuk alokaawu li álaañumul bata bul̥ibabu boola li ayaan aanool: «Usómmenul uyaan ubil ubah min utiñ?»

⁸ Inti fan aanool: «Ujow ulakom, ubanumuu li ukaano wañ ukee min ukaanom itiñ, li usenom ihob. Ibanumuu, awu li ukit uhin utiñ, li uhob.»

⁹ Mantee alokaawu latooke kasal min akaanumuu wahawu wan koonoolumuu akaan? Atookut kasal maayeet!

¹⁰ Muñowu foof nokoomuu li bukuluul. Jikaanumuu wahawu feh wan koonuulumuu jikaan jiban, li joon: «Olóli hin kuloka joom bale; jikankaan wahawu wan jóotimuu jikaan.»

Yéesu li afaken bukan kata háhaayee koono kuŋen

¹¹ Muñeˈe Yéesu li alako ejow boot li ésukayi yata Yeelusalem, li ajow anab li élingaayi yata etaamayi yata Samali li yata Gálile.

¹² Nan Yéesu anokenumuu li ésuk yakee, bukan koono kuŋen kan háhaayee ejoke li kubil kufam li akila. Li kuyito lóyi,

¹³ min kunaak kubaŋulo koon: — Yéesu, Anahaan, úyiyenoli!

¹⁴ Nan Yéesu ajukiilumuu li aaniil: — Jijow kúlambaaku kujukeluul. Nan kulakomuu ejowayi boot bata kúlambaaku, li kufak.

¹⁵ Muñeˈe akee li buko, nan ajukumuu aan lafake, li álaañul boot bata Yéesu, mo lasalemaa Ateemit butiya.

¹⁶ Li áliiŋul, li ákuntuŋ tin kootaku kata Yéesu, min aŋa’ buulool aya teetaam min alakowool kasal. Anáyinaawu ummu álaañulumuu, an ata Samali.

¹⁷ Muñeˈe Yéesu li aan: — Inti buko foofiil feh kuŋen kufaafak? Kama hutok li kubakiilaku kaabuku kumbukay?

¹⁸ Kama muñowu li buko feh, ummu ammuu ajawoola bale álaañulumuu abil asal Ateemit?

¹⁹ Muñeˈe Yéesu li aanool: — Uyito ujow, káyinenaku kooli kufakeni.

Ebilayi yata Jáyiiyaju jata Ateemit

²⁰ Muñeˈe Kufaaliisiyeŋaku jommuu li jibil. Yéesu li aaniil: — Jáyiiyaju jata Ateemit let jibil loon wah wan an ayilo ajuk.

²¹ An let abil aan: «Jáyiiyaju junju taate» mantee foof: «Junju taata». Mata li mal̥egenamu, Jáyiiyaju jata Ateemit junju li tutuul.

²² Fúlum tó, li aan kúgoomaku koola: — Fan líiŋ nakee nan jommuu li jifañ jimaat maayeet hano li kunakaku kata Añool-An, bale let jimaat ho.

²³ Bukan fan koonuul: «Jijuke taata!», mantee foof: «Jijuke taate!» Bale jakum jijow bo. Jakum jinab li bukanabuku umbuku.

²⁴ Mata loon kawiwijenaku kata emitayi kuwuŋenemuu kageb kaake kata yo boot li kaaka, mo foof emmuu li bil nokoo li hunakahu nan Añool-An ammuu abil.

²⁵ Bale Añool-An laate ajand álaam ŋáa’, min bukanabuku kata muñeˈe kuhoyool.

²⁶ Wahawu wabaj nomuu li taŋayi yata Nówe, wo foof wommuu li ubaj nan Añool-An ammuu li álaañul.

²⁷ Bukanabuku kunaanaak kutiñ li kuhob, li kunaak kuyab li kukaan bañooliil baale buyabo, boot yok hunakahu nan Nówe anokenumuu li busaanaabu báamakabu. Muñeˈe li baj mal máamak mameeŋene etaamayi feh, min muniilen bukanabuku feh.

²⁸ Fan foof nokoo loon wahawu wabaj nomuu li taŋayi yata Lot. Bukanabuku kunaanaak kutiñ li kuhob, li kúnoomul, li kújula, li kul̥uk, li kuteef.

²⁹ Bale hunakahu nan Lot áfululumuu Sodom, Ateemit li ábetenumul li emitayi sambun li batolok básoyiye ŋáa’ sibil simuk bukanabuku feh.

³⁰ Muñaˈa foof emmuu bil nokoo li hunakahu nan Añool-An ammuu álaŋul.

³¹ «Li hunakahu unhu, an alakomuu haatiya eluuf, jakum áwalowul abil kaŋa’ wah li eluufayi yoola. Manolamu, an alakomuu li kal̥aakool, jakum alaañ boot boola.

³² Jiwayil̥o wahawu wabajumuu anaalaawu ata Lot.

³³ An aŋesumuu kafaken buloŋool, buloŋabu bábaneliitumuu fan bufakool. Bale an buloŋool bufakoolumuu, fan abil abaj buloŋ bábaneliit.

³⁴ Fan ilobuul, li ehukaayi inyu, bukan kúl̥uba kulakomuu li elal yano, ano fan aŋali min aahu akati to.

³⁵ Kanaale kúl̥uba kulakomuu ehumen, ano fan aŋali min aahu akati to. [

³⁶ Kánayine kúl̥uba kulakomuu li kal̥aak, ano fan aŋali min aahu akati to.]»

³⁷ Kúgoomaku li koon Yéesu: — Anahaan, kama bay wahawu unwu wóomi li ubaj? Yéesu li aaniil: — Tanootan tan wah wakete woom, síkosumasu fan sifam to.