Hulimahu Hásuumaahu loon Lík akiic homuu 16 - Jola-Kasa

Bukittenoolum bata an, an kusene ebaj aaken

¹ Yéesu li alaañen aan kúgoomaku koola: — Bile baj ánayine akee abaje, li aŋa’ ebajayi yoola asen alokawool aakenool. Bukan li kubil koon ánayinaawu abajaawu, alokaawu ummu li kafasiken ebajayi yoola.

² Muñeˈe anahaanawu li áhooñul alokaawu min aanool: «Kama wahawu wan ijamumee bukanabuku li kulob kuya li awu, buu? Uhíisom buu lukaane bulokabu eeno, mata let iyili ikati min ooken ebajayi yúmbaam.»

³ Alokaawu li ayinoo li aan: «Anahaanawu úmbaam fan áfulenom li bulokabu búmbaam. Kama muñowu boot min ikaan buu? Ibajut sembe boot ewañ, ban fan isuu bajow kal̥aw.

⁴ Yoo! Lihaase buu léemi li ikaan eeno, mantee bukanabuku li kuyabom booliil, nan anahaanawu úmbaam ammuu áfulenom li bulokabu búmbaam.»

⁵ Muñeˈe alokaawu li áhooñul ano li ano bukanabuku feh kaakumuu ecaagen anahaanawu oola. Li aan átinaalawu: «Butum buu looke anahaanawu úmbaam?»

⁶ Anáyinaawu átinaalawu li aanool: «Leekool kúbalik kata éduuliin koono téemeel.» Alokaawu li aanool: «Kaayiitaku kooli kunke, ubah min usommen ukiic ló kúyii kúl̥uba li kuŋen.»

⁷ Ban li aan aahu: «Awu butumbuu lookool?» Li anool: «Kusaaku koono téemeel kata edenfeteŋ.» Alokaawu li aanool: «Kaayiitaku kooli kunke. Ukiic ló kúyii kubakii.»

⁸ Muñeˈe anahaanawu li asal alokaawu ummu ajakutumuu, mata min akaanumuu majakut li butuuko ló. Mata bukanabuku kata adunaayi inye kuhaŋe matuuko li wahiil, bukanabuku kaanomuu li mawuŋaamu.

⁹ Yéesu li afamen aan: — Injé fan eenuul: jíŋesum li ebajayi yajakutumuu yata adunaayi inye kubuke boot li bukuluul, bájum nan jootutumuu jibaj wah, li kuyabuul li buloŋabu bábaneliitumuu.

¹⁰ An átukumuu jak wah watit, fan átuk foof jak wah wáamak. An átukutumuu jak wah watit, let átuk foof jak wah wáamak.

¹¹ Kama jijokutumuu jak ebajayi yata adunaayi inye, ayi li ayili asenuul ebajayi yaanomuu yata mal̥egen jooken?

¹² Ban nokoomuu loon jijokut jak wah wata an, ayi aate asenuul wahawu wooluul jooken?

¹³ «An ayilaat alako aloka ata kunahaan kúl̥uba li mano, mata fan alat akee min afañ aahu, mantee foof fan átuul akee min abes aahu. Jiyilaat jilako li mano emiikeel yata Ateemit li yata foof sídalam.»

Yéesu li awataten kufaaliisiyeŋaku

¹⁴ Muñeˈe Kufaaliisiyeŋaku li kujam kulimaku unku feh, li kulako kajakakaay Yéesu, mata kukankaan bukan kafañe sídalam.

¹⁵ Yéesu li aaniil: — Bukuluul jikankaan bukan kajokoolowe loon bukan kacole joom hákil ésukayi, bale Ateemit lahaase waa wóomi li uyinumuul. Mata wahawu wan bukanabuku kuluukenumuu, Ateemit afañut wo maayeet.

¹⁶ «Wahawu wakiicimuu li Eluwaayi hunhu li kawaaleyi, ban anoowan li aŋa’ sembewool min anoken li Jáyiiyaju.

¹⁷ Bale emitayi li etaamayi fan ehaŋ másuum kábuj jano li jikiicaju jahaŋumuu matiti li eluwaayi yata Móyiis.

¹⁸ «Anáyine aanumuu aseekool ábalo ban li áyabul anaale akee, ánayinaawu ummu lahintenhinten anaale alet oola, anaalaawu li ahinto li ánayine alet oola. Li bil nokoo loon ánayine ayabe anaale ábalowe bata áyinool, lahintenhinten anaale alet oola, anaalaawu li ahinto li ánayine alet oola.

Bukittenoolum bata an abaje li Laasaal agayimuu

¹⁹ — Bile baj ánayine akee abaje anaake akaano wañawu wahaŋumuu máyiki li wahaŋumuu maseel, ban hunakoohunak li akaan kagaan káamak kásuume.

²⁰ Li baj ánayine akee agaye an koone Laasaal, an eniilayi yoola feh ebaje basonta, ajowe ahinto hákil kámbiilaku kata ánayinaawu abajaawu.

²¹ Laasaal li afañeen anaak atiñ bafoyabu banaake búlowumulumuu li buyinjaayabu bata ánayinaawu abajaawu. Maayeet sijangiyasu li sinaak sibil simeesen basontaabu boola.

²² Muneˈe Laasaal li aket, kumalakaaku li emitayi. Anáyinaawu abajumuu li aket foof, li ahoki.

²³ Anáyinaawu abajaawu li alako sílaam sáamak, ban kaketumuu kommuu. Li ateb kúkilool, li aŋanden Abulaham buko li Laasaal tin tano.

²⁴ Muñeˈe ánayinaawu abajaawu li alob butiya aan: «Faafa Abulaham, úyiyenom! Uboñ Laasaal ajow aŋa’ élawulayi yata husiikool ágolul mal, abil asenom íbuken húlellufom, mata ínje umme li sílaam sáamak li sambunasu unse.»

²⁵ Bale Abulaham li aanool: «Añoolom, uwayil̥o oon lubabbaj wah wameeŋe wásuume awu li buloŋ, Laasaal okila li alako no li sílaam. Muñeˈe akila ummu baabe li kásuumaay min awu oono li sílaam.

²⁶ Ban fiimaa, babbaj buwokaay básenkiye báamiwolaal li tut, bájimuu bukan kufañumuu kubilumul ban áloli jommee boot ban bukuluul jommuu, let kuyili kujow. Mantee foof bukan kufañumuu kubilumul ban bukuluul jommuu boot ban áloli jommee, let kuyili kubil.»

²⁷ Anáyinaawu abajumuu li aan: «Kama liyaaki faafa Abulaham, uboñ Laasaal ajow bata eluufayi yata atuubawom,

²⁸ mata libabbaj bo kutuyaay koono hutok. Ajow alobiil akat to jakum bil buko foof kubil dáade dán sílaamase sommee.»

²⁹ Abulaham li aanool: «Kutuyi kubaje kulimaku kakiicimuu kata Móyiis li kufulofetaku, kujanga ko ban li kukaan loon kulobumuu.»

³⁰ Anáyinaawu abajumuu li aan: «Faafa Abulaham, wahawu unwu bale ufitut. Nokoomuu loon an li kaketumuu ajowe alobiil, fan kubet búsol buloŋiil buhaan bajakutumuu min kútiiwo kuŋa’ buloŋ buwunkul.»

³¹ Bale Abulaham li aanool: «Kutuyi kujantenutumuu Móyiis li kufulofetaku, maayeet min an li kaketumuu ayitowulo min alobiil manooman mantee li kúyinen, bale let kúyinen.»