Hulimahu Hásuumaahu loon Lík akiic homuu 15 - Jola-Kasa

Bukittenoolum bata húgalalaan hájime ban li hujuki

¹ Muñeˈe li líiŋ hunak hukee, kúyababuhal li bukan kukee kajakut li kúlohul Yéesu foofiil feh boot bajantenool.

² Kufaaliisiyeŋaku li kaliikenemuu ésukayi eluwaayi ésukayi eluwaayi yata Móyiis súumutiil. Li kunaak koon: — Anáyinaawu ummu layabeyab jak kuhoofoola, ban li anaak atiñ dín dáno li buko.

³ Bale Yéesu li alobiil bukittenoolumabu umbe:

⁴ — Nokoomuu loon an li bukuluul abaje kúgalalaan koono téemeel, ban hano li ko li hújim, mantee let afan akat kúgalalaan kaaku kúyii kubakii li kaat li kubakii li kayiinaayaku, min ajow aŋes húgalalaanahu hájimumuu, ajow ayok ajuk ho?

⁵ Muñeˈe nan ammuu ajuk ho, fan súumool ŋáa’ min ateb ho agalo,

⁶ min ajow ábalo áliiŋ, li áhooñul kufaalool li kukinoolool min aaniil: «Esúumansuum elako li alolaal, mata lijukulo húgalalaanahu húmbaam hájimeenumuu.»

⁷ Boot ilobuul, li manolamu, fan bil baj ésuumansuum yáamak li emitayi, ahoofoola ano bátiiwoye aŋa’ buloŋ buwunkul. Esúumansuumayi inyu fan ehaŋ yammuu li ebaj, mata bukan kúyii kubakii li kaat li kubakii kacole, kan jokut min kútiiwo kuŋa’ buloŋ buwunkul.

Bukittenoolum bata ehanjal yano yata édalam yájime ban li ejuki

⁸ — Mantee foof, nokoomuu loon anaale abaje sihanjal sata sídalam soono kuŋen, ban yakee li so li éjim, inti fan ayaben ehiitum min awuu eluufayi ban li aŋes jak boot yok nan ammuu ajuk ehanjalayi yata édalamayi?

⁹ Muñeˈe nan ammuu ajuk yo, li áhooñul kufaalool li kukinoolool min aaniil: «Esúumansuum elako li ololaal, mata lijuke ehanjalayi yata édalamayi yájimeenumuu.»

¹⁰ Boot ilobuul, li manolamu, fan baj ésuumansuum li kumalakaaku kata Ateemit, ahoofoola ano bátiiwoye aŋa’ buloŋ buwunkul.

Bukittenoolum bata añiil ájimeene ban li ajuki

¹¹ Yéesu li afamen aan: — Bile baj ánayine akee abaje kuñiil káyine kúl̥uba.

¹² Añiilawu ahaŋumuu mañiilo, li aan atuubawool: «Faafa, usenom júmbaam li ebajayi yooli, jan éetimuu ibil itowo.» Mal̥egen atuubayiil li agabooliil buko kúl̥uba ebajayi yoola.

¹³ Muñeˈe li baj kunak, añiilawu ahaŋumuu mañiilo, li ájula joola li wahawu wan abajumuu, ban li aŋa’ sídalamasu min ajow boot li etaam yakee yáloyiye. Nan áliiŋ bomuu, li aŋa’ sídalamasu soola feh afasiken li buloŋ bajakut.

¹⁴ Nan atiñumuu sídalamasu soola feh ajow aban, bamuufaay báamak li bubaj li etaamayi inyu. Añiilawu abajut wah wan ammuu atiñ.

¹⁵ Muñeˈe li ajow alako bulok ánayine akee li etaamayi inyu. Anáyinaawu li akaanool ajow humat sifulugun li bujal.

¹⁶ Añiilawu li afañeen anaak atiñ hutiñahu hata sifulugunasu, bale an asenutool ho.

¹⁷ Muñeˈe añiilawu li ajuke to buloŋabu boola jow fit, li aan li buyinumool: «Kulokaabuku feh kata atuubawom kutiñetiñ kufooñ jow saŋo. Bale ínje ummu li eket taate li bucaa.»

¹⁸ Fan ilaañ boot bata atuubawom ijow eenool: «Faafa, lihoofoohoofoo Ateemit, li ihoofooli foof.

¹⁹ Itookut muñeˈe min ujokom loon ínje añooli. Ujokom loon ujokumuu anoowan li kulokaabuku kooli.»

²⁰ Mal̥egen añiilawu li ayito alaañ boot bata atuubawool. «Nan añiilawu abilumuu abil, atuubawool li aŋandenool okila baloŋe li áloyi eluufayi, li áyiyenool ŋáa’. Li atey ajow kufam. Alíiŋ li aŋa’ kuŋenool agaabool ban li asaafool li ésuumahukow ló.

²¹ Añiilawu li aan atuubawool: “Faafa, lihoofoohoofoo Ateemit, li ihoofooli foof. Itookut muñeˈe min ujokom loon ínje añooli.”

²² Bale atuubawool li aan kulokaabuku koola: “Jisommen jíŋalul kañaku kahaŋumuu majak jikaanool. Jikaanool ekob li husiik, li sidalla li koot.

²³ Jijow jíŋalul jímuunaaju jahaŋumuu maluuk jimuk, min ukaanaal kagaan min úwayeenaal.

²⁴ Mata añoolom umme laketeene, bale muñeˈe lálaañulo áami li buloŋ. Lájimeene, bale muñeˈe lijukool.” Li kútoŋ kugaan li ésuumansuum ló.

²⁵ «No unnu, añiilawu ahaanawu ata ánayinaawu ummu, akila baloŋe bata ul̥ibawu li bulok. Nan álaañulumuu abil álehenul eluufayi, li ajam kawel síyindum li jígom.

²⁶ Añiilawu anahaanawu li áhooñul akee li kulokaabuku min agel̥l̥enool waa ubaje.

²⁷ Alokaawu li aanool: “Atuyi álaañulo, atuubayi li amuk jímuunaaju jahaŋumuu maluuk, mata añoolool lálaañullaañul bóot li kásuumaay.”

²⁸ Muñeˈe añiilawu ahaanawu huuñool li hulit, min ahoy banoken li eluufayi. Atuubawool li áfulul ayaakoolool mantee li ajow anoken.

²⁹ Bale añiilawu anahaanawu li aan atuubawool: “Ujanten, baje muñeˈe simit sameeŋe nan éemimuu li bulok boot li awu, ban bajut nakee nan ihoye bakaan wah wan oonom ikaani. Bale bilut líiŋ nakee li usenom maayeet ajaameen ano imuk min jigaan li kufaalom.

³⁰ Bale añooli umme lálaañulo, okila aŋalumuu ebajayi yooli feh ajow afasiken li sicaga, okila lumukumuu jímuunaaju jahaŋumuu maluuk.”

³¹ Atuubawool li aanool: “Añoolom, awu ummu taate lí ínje nanoonan, wahawu feh wan ibajumuu wooli foof.

³² Bale lootaale ukaanaal kagaan min ésuumansuum elako li ololaal. Mata atuyi umme laketeene, bale muñeˈe lálaañulo áami li buloŋ. Lájimeene, bale muñeˈe lijukool.”»