Hulimahu Hásuumaahu loon Lík akiic homuu 14 - Jola-Kasa

Yéesu li alaañen afaken an ásomute li hunak hata húyiiyaayahu hata Kusuwifaku

¹ Li líiŋ hunak hata húyiiyaay hata Kusuwifaku boot hutiñ. Bukanabuku kalako tomuu li kulako kalaso Yéesu min kujuk buu láami li akaan.

² Muñeˈe li baj ánayine an bulaa bujoke alako to hákil Yéesu.

³ Yéesu li agel̥l̥en kaliikenemuu ésukayi eluwaayi ésukayi eluwaayi yata Móyiis li Kufaaliisiyeŋaku aaniil: — Mantee eluwaayi yoololaal yonsoon an layilo afaken an li húyiiyaayahu hoololaal, mantee elobut mo?

⁴ Bale kufañut kubagool! Muñeˈe Yéesu li átuk ánayinaawu ásomutumuu, min afakenool, ban li aanool ábalo.

⁵ Fúlum tó, Yéesu li aaniil: — Ayi li bukuluul añoolool áyine aate alo li ekoloŋ, mantee ebewool li elo ló hunak hata húyiiyaayahu hoololaal, let ayaan áfulenumul ló añiilawu, mantee foof ebaayi?

⁶ Kufaaliisiyeŋaku kumitut kuyili kubag kulimaku koola unku.

Yéesu li alob mata kawalenoolo li mata kayab ajawoola

⁷ Nan Yéesu ajukumuu buu bukanabuku káhooñulimuu kunaake kumanumuu síbahumasu sahaŋumuu majak min kubah, li alobiil bukittenoolumabu umbe:

⁸ — An ahooñimuu ujow ébuto, jakum úliiŋ li ujow ubah li ébahumayi yahaŋumuu majak, mata nikee baje akee li bukanabuku káhooñulimuu an an kujoke ahaŋi.

⁹ Jakum ban anawu áhooñuluulumuu bukuluul kúl̥uba feh, abil aani: «Uyito min usen anawu umme min abah.» Muñeˈe fan ukomen ujow, li ñisuu ló, ubah li ébahumayi yata búsol.

¹⁰ Bale, an ahooñimuu boot bata húbaññaati, ujow ubah búsol, bájum nan anawu áhooñulimuu ammuu áliiŋul, li aani: «Afaalom úlohul, ubil ubah baabe li ébahum yahaŋ majak.» Muñeˈe fan kaan kasal káamak boot li awu hákil bukanabuku feh kan kúhooñulumuu boot hutiñahu.

¹¹ Mata an atebenoolomuu, Ateemit fan awalenool, bale an awalenoolomuu, Ateemit fan atebenool.

¹² Fúlum tó, Yéesu li aan foof ánayinaawu ahooñoolumuu boot hutiñahu boola: — Uhooñumuu bukan boot hutiñ kataaw mantee foof kátiimeel, jakum úhooñul bale kufaali, mantee kutuyi, mantee bukani, mantee kukinooli kabajumuu, jakum bil buko foof kuhooñi booliil, min kulaañeni wahawu wan ukaanumuu boot li buko.

¹³ Bale ulakumuu sinaaŋ boot li ésuk, li úhooñul esukateenayi, kakajumuu, kajinkemuu li káfuumumuu.

¹⁴ Ukaan momuu, Ateemit fan ásooniyeni, mata bukanabuku umbuku kuyilaat kulaañeni wahawu wan ukaaniilumuu. Ateemit fan abil alaañeni wahawu unwu nan bukanabuku kátuuloolumuu kommuu kuyitowumul li eketayi.

Yéesu li alob mata bukan káhooñuli boot hutiñ

¹⁵ Nan akee li bukanabuku kalakomuu hutiñahu ajamumuu kulimaku unku, li aan Yéesu: — Awólo, anawu aanomuu li abil atiñ li Jáyiiyaju jata Ateemit!

¹⁶ Yéesu li aanool: — Bile baj ánayine akee, alake sinaaŋ aban, li áhooñul bukan kameeŋe boot hutiñahu.

¹⁷ Nan ewaatuwayi yata hutiñahu éliiŋumuu, alakumuu sinaaŋasu li aboñ alokaawu oola ajow aan kan ahebumuu: «Jibil! Sinaaŋasu sifaleˈe»

¹⁸ Bale bukanabuku feh kan kuhebumuu, anoowan li aan abajowut. Atínaalawu li aan alokaawu: «Likitekit li inoom kal̥aak, ban leete ijow ijukul ko. Liyaaki, ubonketom.»

¹⁹ Akee li aanool: «Muñeˈe likite li íyooŋul kúmuuna koono kuŋen boot ewañ, ban boot min ijow ikaan ko kuwañ min ijuk. Liyaaki, ubonketom.»

²⁰ Aahu li aan: «Likitekit li iyab anaale, mó mújimuu let iyili ibil.»

²¹ Alokaawu li alaañ áliiŋ, li akitten anahaanawu oola wahawu feh wan kuloboolumuu. Anahaanawu ata eluufayi, etindihuuñ li ejokool, li aan alokaawu oola: «Ujow cab boot li waayeenawu, li útinawu wata ésukayi min úŋalul, kusukateenaku, kakajumuu, káfuumumuu li kajinkemuu, boot taate.»

²² Li fiyo jatit, alokaawu li álaañul li aanool: «Anahaan, li kankaan wahawu wan oonommuu ikaan, bale baje síbahum sabajut bukan.»

²³ Muñeˈe anahaanawu li aan alokaawu: «Ujow li útinawu, ban li unab li uhatawu, min ukaan manooman min úŋalul bukanabuku kan ommuu ujuk bo únoonetumul búmbaam, mantee eluufayi yúmbaam li emeeŋ bukan.

²⁴ Fan ilobuul, anoowan li bukanabuku kajandeenumuu kuhooñi, let acafen sinaaŋasu súmbaam!»

Wahawu wan an áatimuu akaan min alako ágoom ata Yéesu

²⁵ Muñeˈe li baj búsuk báamak banaake bunab li Yéesu. Yéesu li átiiwowul li aaniil:

²⁶ — An abilumuu búmbaam, laate afañom ahaŋ min afañumuu atuubawool, jaawool, aseekool, kuñoolool, kutuyool, kúliinool li buloŋabu boola humum bo. Letumuu mo, let ayili alako ágoomom.

²⁷ An atebutumuu ekuluwaayi yoola tan ayilimuu aket, min ánabul lí ínje, let ayili alako ágoomom.

²⁸ An li bukuluul afañumuu min ateef eluuf yagimbe, inti fan ajand abah min ayinoo butum buu láami li aban li acaam, bájum li ahaas mantee labaje sídalam safame sayilo siban bulokabu?

²⁹ Akaanut momuu, min átoŋ ábetum eluufayi teetaam, ban akitut ayili yo ahabel ateef, bukanabuku feh kammuu kujuk yo, fan kúl̥uwool,

³⁰ min koon: «Anáyinaawu ummu látontoŋ ateef eluufayi yoola aban, akitut ayili yo ahabel.»

³¹ Li bil nokoo loon, áyii afañe ajow atiik li áyii akee, abaje kutiika koono sínjunne áyii, fan ajand abah min ayinoo min ajuk, mantee fan ayili aŋa’ kutiikaaku koola sínjunne kuŋen, min kúfimboo li áyii aahu.

³² Muñeˈe ajukelumuu li ahaas aan let ayili, fan aboñ bukan bata áyii aahu, akila baloŋe li áloyi, min aŋes min kujamoo.

³³ Yéesu li afamen aan: — An li bukuluul ayilaat alako ágoomom, akila bayilaat akat bo wahawu feh wan abajumuu.

Musis mabajut jáliŋ

³⁴ — Musis wah wajake. Bale kacabaku kata mo kúfulumuu, buu an aate ayili akaan mo min mulaañen mucab?

³⁵ Let mujak kakaan li kal̥aak, let foof mujak kakaan bútune. Fan mubeteni tíyaŋ. An áakimuu sijan boot kajanten, li ajanten min ajam.