Hulimahu Hásuumaahu loon Lík akiic homuu 13 - Jola-Kasa

Jítiiwo jibet búsol buloŋabu booluul buhaanabu, kumbil jiket

¹ No unnu, li baj bukan kukee kabile kulob Yéesu mata bukan kata etaamayi yata Gálile kan Filat alobe min kumukiil buko li kakaan kasila Ateemit.

² Yéesu li aaniil: — Jiyinooyinoo file li joon bukanabuku umbuku kata etaamayi yata Gálile kan kumukumuu, buko kuhaŋe uhoofoo bukan kaabuku feh kata etaamayi yata Gálile, májimuu li kulo li kámik loon unku?

³ Maayeet! Bale fan ilobuul, jibetutumuu búsol buloŋabu booluul bahaanabu min jítiiwo jiŋa’ buloŋ buwunkul, fan jiket foofuul feh loon buko.

⁴ Muñowu bukanabuku umbuku kaat li kúhaajiyaku kan eluufayi yagimbaayi yata Sílowe elolomuu emuk, jiyinooyinoo file li joon buko kuhaŋe uhoofoo bukanabuku feh kakinumuu Yeelusalem?

⁵ Maayeet! Bale fan ilobuul, jibetutumuu búsol buloŋabu booluul bahaanabu min jítiiwo jiŋa’ buloŋ bawunkul, fan jiket foofuul feh loon buko.

Bukittenoolum bata bul̥el̥u bábukeliit

⁶ Muñeˈe Yéesu li alobiil bukittenoolumabu umbe: — Bile baj anáyine akee al̥uke bul̥el̥u li bul̥ibool bata úbiiñ. Li abil ajow ló huŋes kul̥el̥u áliiŋ, ajukut li bul̥el̥uwabu wahoowah.

⁷ Li aan alokaawu oola ata úbiiñawu: «Baje muñeˈe simit síhaaji ínje li ebil huŋes kul̥el̥u li bul̥el̥uwabu umbu, ban let ítook ló wah. Ufalen bo! Buyilaat bugogen to etaamayi maayiiñ.»

⁸ Bale alokaawu li aanool: «Anahaan, ufan ukat bo to káyiilaku kata hinkiil bale, min íjus tin húholumahu hata bo iŋolen ban li ikaan to bútune.

⁹ Ikaan momuu, nakee bunak li bubuk. Bubukutumuu, kama li ufalen bo.»

Yéesu li afaken li húyiiyaayahu hata Kusuwifaku anaale ásomute

¹⁰ Li líiŋ li hunak hakee hata húyiiyaay hata Kusuwifaku.

¹¹ Li baj ló anaale an buyinum bajakut bújufoye min bukaanool ásomut simit kaat li síhaaji. Buyinumabu bajakutumu li bukaan anaalaawu ákujo ban ayilaat ál̥aalulo.

¹² Nan Yéesu ajukumuu anaalaawu, li áhooñulool ban li aanool: — Anaale, lufake li kásomutaku kooli.

¹³ Muñeˈe Yéesu li aŋa’ kuŋenool awalen li anaalaawu, li ayaan ál̥aalulo acol min alako kasal Ateemit.

¹⁴ Bale anahaanawu ata eluufayi yata kal̥awaku súumutool min Yéesu afakenumuu anaalaawu li húyiiyaayahu hata Kusuwifaku. Muñeˈe anahaanawu li aŋa’ hulimahu li aan búsukabu: — Baje kunak hutok li hano nan bulok buyilo bukaani. Jibil li kunakaku unku min kufakenuul, bale inti li húyiiyaayahu!

¹⁵ Amaaŋenawu li aanool: — Búhoolowabe! Ayi li bukuluul aatut ál̥el̥ul húmuunawool tan asene homuu hutiñ, mantee foof asumool tan asenewoolumuu atiñ, li hunak hata húyiiyaay ajow ahoben?

¹⁶ Ban anaalaawu umme, aanomuu bubukoolum bata Abulaham, ban Sayitaane li ajokool ajenk simit kaat li síhaaji, waa aateenut afakeni li hunakahu hata húyiiyaay?

¹⁷ Nan Yéesu alobumuu loon muñowu, kulatoolawool li kusuu ŋáa’. Bale búsukabu li súumiil li wahawu unwu feh wáyiinenimuu wan Yéesu alakomuu kakaanaku.

Ekool yatit ebilemuu ekaan bunuunuken báamak

¹⁸ Yéesu li alaañen aan: — Li waa Jáyiiyaju jata Ateemit jinokoole? Li waa leete ikittenoolum Jáyiiyaju jata Ateemit?

¹⁹ Jinokoonokoo li ekool yata anuunuken an koone mutaad, yan an aŋale al̥uk li etoolayi yoola. Ekoolayi li el̥iil min ekaan bunuunuken, min basuuwabu bunaak bujow buseeh li waanawu wata bo.

Yéesu li aŋa’ élebiil akaan bukittenoolum

²⁰ Yéesu li alaañen aan: — Li waa liyilo ikittenoolum Jáyiiyaju jata Ateemit?

²¹ Jáyiiyaju jata Ateemit jinokoonokoo li élebiil yan anaale aŋale ágiiwoo li kukiib kúhaaji kata efo’ min asiiw, boot yok nan basiiwelabu búkaakumuu foof bo feh.

Ayi ammuu li abil anoken li Jáyiiyaju jata Ateemit?

²² Yéesu li alako ejow boot Yeelusalem, li ájowum li sísukasu sáamakasu li básukabu batitabu min aliiken bukanabuku Hulimahu hata Ateemit.

²³ Muñeˈe akee li agel̥l̥enool aanool: — Anahaan, mantee bukan kafamut koote kubil kufak? Yéesu li aaniil:

²⁴ — Jikaan wahoowah min jínokenum li kámbiilaku kahogumuu; mata fan ilobuul, bukaan kameeŋe fan kuŋes min kunoken, bale let kuyili.

²⁵ «Hunakahu fan húliiŋ nan anahaanawu ata eluufayi ammuu li ayito akul̥ kámbiilaku. Ban nokoomuu loon bukuluul tíyaŋ mayitowe, min jinaak jitek kámbiilaku min jinaak joon: “Amaaŋen, úbabuloli!” Fan aanuul: “Ihaasut bay jífulumulo.”

²⁶ Muñeˈe fan jinaak joonool: “Jitintiñ ban li jihob dín dáno li awu, li unaak uliiken Hulimahu hata Ateemit li útinawu wata ésukayi yóololi.”

²⁷ Bale fan alaañen aanuul: “Ihaasut bay jífulumulo. Jíloyiyom, bukuluul jakaanemuu majakut.”

²⁸ To untu, to jíl̥okaju jommuu li sílaam sáamak, bukuluul bajuke Abulaham, Isaak li Sakob, li kufulofetaku, ban bukuluul li kubetenuul tíyaŋ.

²⁹ Bukan fan kubilumul li ugebawu ubakiilawu wata etaamayi kubil kubah, min kutiñ li Jáyiiyaju jata Ateemit.

³⁰ Muñeˈe kukee li bukanabuku kammuu muñeˈe kúsola, fan kulako kútinaa, min kukee li bukanabuku kammuu muñeˈe kútinaa, kulako kúsola.»

Yéesu li al̥okoo mata Yeelusalem

³¹ No unnu, Kufaaliisiyeŋ kukee li kúkoojul Yéesu min koonool: — Ufú’ taate, ujow bakee, mata Elod lafañe min amuki.

³² Yéesu li aaniil: — Jijow joonom hugeewuwahu unhu: «Síyaat li kajom fan ikesoo uyinum wajakut, li ifaken foof kásomutumuu, ban fan iban bulokabu búmbaam li hunakahu húhaajutahu.»

³³ Bale leete ijow bútinom, síyaat, kajom li kájomum, mata jakut min afulofet amuki bakee búti Yeelusalem.

³⁴ «Aah Yeelusalem, Yeelusalem, awu jamukemuu kufulofetaku, ban li utek kuyitik bukanabuku kan Ateemit áboñulimuu umuk! Ñoono ñeem ínje ifañeenumuu min íwomenul bañooli ikaan tin tano loon emanjuk éwomenulemuu bacow yo ekaan kata láala kubeyaku kata yo. Bale jifañut.

³⁵ Jíkaanum! Ateemit fan akat bo eluufayi yooluul. Bale boot min eenuul, let jilaañen jijukom muñeˈe boot yok nan jommuu li joon: “Kásooniyen kujow kulako li anawu abilummuu li kajawaku kata Amaaŋenawu!”»