Hulimahu Hásuumaahu loon Lík akiic homuu 12 - Jola-Kasa

Jitey búhoolo

¹ No unnu, bukan sínjunne li kuwoog, gay li kunaak kúkakuloo. Yéesu li ajand aan kúgoomaku koola: — Jíkaanum élebiilayi yata Kufaaliisiyeŋaku, yaanomuu búhoolowabu booliil.

² Bajut wah wáhimeni waatut ubil úhimuli. Bajut foof wah wayolooli waatut ubil uhaasi.

³ Mó mújimuu, wahoowah wan jilobe li élim, fan ujami li mawuŋe. Wahoowah wan jikul̥oole li káfit min jibuyinoo wo an li ejan, fan ulobi butiya li waayeenawu.

Ateemit áatimuu ákoliyi, inti bukan

⁴ — Fan ilobuul, bukuluul jammuu kufaalom, jakum jíkoli bukanabuku kayilimuu kumuk eniilayi, ban let kuyili kukaan wah wakee haŋ to.

⁵ Bale boot min ihebuul ayi jóotimuu jíkoli. Jíkoli Ateemit ayilimuu amukuul aban li abetenuul li sambun. Li mal̥egenamu fan ilobuul, okila jóotimuu jíkoli!

⁶ «Inti sídalam síl̥uba sinoomemuu bánfahutuuŋ boono hutok? Bale Ateemit amojenut maayeet ano li bo.

⁷ Bukuluul humumuul, walawu wooluul humum wo feh, ucobicob. Mó mújimuu, sákoluul! Ateemit lahaŋ maluukenuul bánfahutuuŋ bameeŋe!

Kahoofoolaku kaatutumuu kubonketi, li mata kacahenoolo

⁸ — Fan ilobuul, an aanumuu hákil ésukayi feh ínje ikilool, ínje Añool-An foof fan een hákil kumalakaaku kata Ateemit ínje ikile anawu ummu.

⁹ Bale an aanumuu hákil ésukayi feh ahaasutom, Añool-An foof fan ibil aan hákil kumalakaaku kata Ateemit, ahaasut anawu ummu.

¹⁰ «An li abil alob hulim hajakut aya li Añool-An, anawu ummu Ateemit fan abonketool. Bale an agelumuu Buyinumabu Banabaabu, Ateemit let abonketool.

¹¹ «Nan kommuu kújowetumuul boot batiib li siluufasu sata kal̥awaku, mantee bata kuseefaku, mantee bata kunahaanaku kata ésukayi, jakum jiyinoo min jóotimuu jijow jicahenoolo. Jakum jiyinoo foof wáa jóomi li jilob.

¹² Mata Buyinumabu Banabaabu fan busenuul yaan no unnu, kulim kacole kan jóotimuu jilob.»

Jakum jiŋa’ uyinumuul feh jikaan li ebaj

¹³ Muñeˈe ánayine akee li áanumul li búsukabu Yéesu: — Anahaan, oon atuyom akaan min jigaboo bútowaabu ban átuubawoli ákatoli tómuu.

¹⁴ Yéesu li aanool: — Ayíne, kama ayi akaanom ilako atiibaawu ooluul, mantee agaboolaawu ata bútowaabu booluul?

¹⁵ Yéesu li afamen aaniil feh: — Jijuke to ban li jíkaanum efanhubaj, mata buloŋabu bata mal̥egen bata an, bulet li ebajayi yoola, maayeet min akite abaj ŋáa’.

¹⁶ Muñeˈe Yéesu li alobiil bukittenoolumabu umbe: — Bile baj ánayine akee akaane usaanum, ban li abaj kal̥aak kanaake kubuk ŋáa’.

¹⁷ Muñeˈe li abil ayinoo jow fit, li aan: «Kama file buu leete ikaan? Mata muñeˈe ibajut tan eete itah wahawu wan eenomuu li ícacul.»

¹⁸ Anáyinaawu li aan: «Lihaase buu léemi li ikaan. Fan ihum kíndenaaku kúmbaam, min ilaañen iteef kakee kahaŋe mawuŋ, min itah ló wahawu wan eenomuu li ícacul, li ikaan ló wahawu wan ibajumuu.»

¹⁹ Ban fan inaak een li buyinumom: «Cóoj, áyine, lubaje ebaj yáamak yaate elako to simit sameeŋe. Muñeˈe uyool̥o, min utiñ, li uhob min ubaj ésuumahukow.»

²⁰ Bale Ateemit li aan ánayinaawu: «Esoŋaye! Li ehukaayi inye faŋ yo, fan uket. Muñeˈe ayi ammuu li aŋa’ wahawu feh wan uhahenumuu boot li awu humumi?»

²¹ Yéesu li áwuñenum li kulimaku unke: — Wahawu unwu wommuu ubil ubaj an awomene ebaj boot li okila humumool, ban abajut wahoowah hákil Ateemit.

Jijand jiŋes Jáyiiyaju jata Ateemit

²² Fúlum tó, Yéesu li aan kúgoomaku koola: — Wahawu unwu újimuu li eenuul: Jakum jiyinoo mata buloŋuul, min joon waa jóomi li jitiñ. Jakum foof jiyinoo mata eniiluul min joon waa jóomi li jikoko.

²³ Mata buloŋabu buhaŋe hutiñ, eniilayi ehaŋe búkoko.

²⁴ Fan jikooñaam sigaanaalasu, síbeteliit sígul, sícaceliit; sibajut maayeet híndena, maayeet bulaŋen. Bale Ateemit lákuumenekuumen so. Imban bukuluul jihaŋe ŋáa’ basuu.

²⁵ Ayi li bukuluul, buyinawool boote bújiwool li afamen jatit buloŋool?

²⁶ Kama nokoomuu loon jiyilaat jikaan wah watit loon unwu, wáa lí úji li jóoti jiyinoo wah waawu wasaŋomuu?

²⁷ Jilaso buu élunfenayi yata mahosamu mata siŋamasu el̥iilemuu eeno. Elókeliit, eheceliit. Bale fan eenuul, maayeet áyiiyawu Salomoŋ humumool, li máyiineniyamu moola feh, akokowut wañ wajake loon yano li élunfenayi inyu.

²⁸ Ateemit afan ásangen élunfenayi inyu, yammuu síyaat li siŋamasu, yan jihaasumuu joon kajom fan ebeteni li sambun, háŋum bukuluul humumuul? Mó káyinenuul kukite kutiti!

²⁹ Bukuluul kama, jakum jiyok li huŋes wahawu wan jommuu li jitiñ, li wahawu wan jommuu li jihob, ban jakum buyina bujokuul.

³⁰ Mata bukanabuku kata adunaayi inye, kákaanumutumuu li Ateemit balewool, buko kuyinoolemuu mata wahawu unwu feh. Bale bukuluul jibaje Atuuba ahaase aan, wahawu unwu feh jifanfañ wo.

³¹ Bale jijand jiŋes mata Jáyiiyaju jata Ateemit, ban Ateemit fan asenuul wah waawu feh afamen to.

Jiŋes ebaj li emitayi

³² — Sákoluul, bukuluul jammuu bumat batit! Mata Atuubawuul súumoosuum min asenuul Jáyiiyaju joola.

³³ Jíjula wahawu wan jibajumuu, min jisen sídalamasu kusukateenaku. Jikaan boot li bukuluul humumuul, ul̥aac wata kakaan sídalam waatut ubil uneg. Jijoojen ebajayi yooluul boot li emitayi dán yootutumuu ebil éyaakulo, dán ákuu ayilaatumuu ajow, li dán bulolabu buyilaat yomuu bukajen.

³⁴ Mata tan ebajayi yooli yommuu, to foof buyinumabu booli bommuu bulako.

Jíkaanum mata jihaasut nay Añool-An ammuu álaañul

³⁵ — Jikaano wañuul wata bulok, ban jakum jihok sihiitumasu sooluul.

³⁶ Jinokoo li kuloka káami li banaak anahaaniil, ajowe ébuto min áami li álaañul, bájum li kuyaan kúbabulool nan ammuu áliiŋul li atek kámbiilaku.

³⁷ Awólo kulokaabuku kan anahaanawu ammuu li áliiŋul, li atookiil to mámooliwut! Li mal̥egenamu fan ilobuul, akila humumool fan asinja, ban li akaan kulokaabuku kubah, min akaaniil kutiñ.

³⁸ Anahaanawu álaañulumuu hukahu balite mantee foof ho bayiiliye, ban li atookiil mámooliwut, fan kubaj kásuumaay.

³⁹ Jihaas kaanaku, an ata eluufool ahaaseenumuu ewaatu yay ákuuwawu áami li abil, manooman let akatool min ásuuh eluufayi yoola min ánokenul.

⁴⁰ Bukuluul foof jíkaanum, mata Añool-An fan álaañul nan jiyiinooleenut joon no láami li álaañul.

Aloka al̥egene ban li ájallo

⁴¹ Muñeˈe Fiyeel li agel̥l̥en Yéesu aanool: — Anahaan, mantee bukittenoolumabu umbu lulollob bo uya li óloli bale, mantee li ésukayi feh?

⁴² Amaaŋenawu li aan Fiyeel: — Kama ayimaa ammuu aloka al̥egene ban li ájallo? Okila ammuu anawu an anahaanawu oola alakomuu li ajow kañaahoo, li aŋa’ kulokaabuku koola asenool aaken, ánaakum aseniil hutiñiil, taŋiil yata hutiñ báliiŋe.

⁴³ Awólo alokaawu ummu, an anahaanawu oola ammuu li áliiŋul, li atookool akila li kakaan bulokabu ban asenoolumuu kakaan!

⁴⁴ Li mal̥egenamu fan ilobuul, anahaanawu fan asen alokaawu ummu ebajayi yoola feh aakenool.

⁴⁵ Bale nokoomuu loon alokaawu ummu lanaanaak aan li buyinumool: «Anahaanawu úmbaam let álaañul muñeˈe.» Alokaawu ummu li ajok kulokaaku kaabuku kánayinaabuku li kaalaabuku atek, ban li abah min atiñ, li ahob ákaliyenoo.

⁴⁶ Anahaanawu oola fan abil álaañul hunak hakee han alokaawu ahaasut aan no láami li álaañul, li ewaatu yan ahaasut. Muñeˈe anahaanawu fan atek alokaawu ummu kútek káamak, ban li akaanool loon kátuulutumuu Ateemit kommuu li kukaani.

⁴⁷ «Aloka ahaasumuu waa anahaanawu oola afañe, ban ajooŋoolut to min akaan wo, fan abaj katek káamak.

⁴⁸ Bale aloka ahaasut waa anahaanawu oola afañe, ban li akaan wah watooke kútek, fan abaj katek kalewoole. An kusenoomuu ŋáa’, fan foof kubil kugel̥l̥enool ŋáa’. An li kusenool haŋ maluuk ŋáa’ aaken, fan kubil kugel̥l̥enool haŋ maluuk ŋáa’.»

Yéesu li áji bukanabuku li kutiiloo

⁴⁹ Muñeˈe Yéesu li afamen aan: — Libiibil boot kayaben sambun li etaamayi, ban lifañeene min lako sambunasu siyabeni siban!

⁵⁰ Libaje kábatiise kan eete íbatiiseyi, bale buyina báamak bóomi lí ínje boot nan kommuu li kukaani!

⁵¹ Jiyinooyinoo file li joon libiibil boot káŋalul kásuumaay li etaamayi? Maayeet! Inti kásuumaay, bale katiiloo.

⁵² Kítum muñeˈe, bukan hutok kata butoŋ bano fan kutiiloo, bukan kúhaaji fan kutiiloo li kúl̥uba, kúl̥uba li kutiiloo li kúhaaji.

⁵³ Atuuba fan kutiiloo li añoolool áyine, añiil áyine li kutiiloo li atuubawool. Jawaayawu li kutiiloo li añoolool anaale, añiil aale li kutiiloo li jaawool. Asunfaaf aale li kutiiloo li aseek añoolool, anaale li kutiiloo li asunfaafool aale.

Kahaas kanokoolaku kata etaamayi li emitayi

⁵⁴ Yéesu li aan foof búsukabu: — Jijukumuu kafaal li kúfulumuul Jalaŋ, li jiyaan joon: «Emitayi fan élaalul.» Ban mal̥egen li élaalul.

⁵⁵ Nan élusayi yommuu étekumul Kúñum, li joon: «Fan súf!» Ban mal̥egen li súf.

⁵⁶ Búhoolowabe! Bukuluul jiyilo jilaso kaanowaku kata etaamayi li kata emitayi min jihaas waa wommuu li ubaj. Kama wáa újimuu jikitut jiyili jínaanum li taŋ yay jommuu muñeˈe?

Uŋes min jijamoo li alatoolayi tówum jijow tilibinaal

⁵⁷ — Wáa újiye let jitiibum li bukuluul humumuul wahawu wajakumuu kakaan?

⁵⁸ Li bil nokoo loon an jibajoole, ban li ájowetumi li bútin, ukaan manooman min jijamoo bukuluul li ejowayi boot bata tilibinaalayi. Ukaan mo, jakum bil abeti li kuŋenaku kata atiibaawu, jakum bil atiibaawu aseni sandalum kukul̥.

⁵⁹ Li mal̥egenamu fan ilobi, let úfulumul ló awu balaañenut sídalamasu feh san ookoolumuu, boot yok li éfitiliiŋayi ébanumayi.