Hulimahu Hásuumaahu loon Saŋ akiic homuu 8 - Jola-Kasa

Anaalaawu an kujokumuu okila li kahinto li ánayine alet oola

¹ Bale Yéesu akila li ajow boot bata huyuuyahu haaneyimuu Olíibiye.

² Li líiŋ hunak hukaten li bújom bíb, Yéesu li alaañ boot li Eluufayi yata Ateemit. Esúkayi feh li ebil ekoojool. Li abah min alakoyiil buliiken.

³ Bukanabuku kaliikenemuu ésukayi Eluwaayi yata Móyiis li Kufaaliisiyeŋaku, li kúŋalul anaale an kumindene okila li kahinto li ánayine alet oola. Li kuŋalool kujow kukaan li tut ésukayi feh.

⁴ Ban li koon Yéesu: — Anahaan, anaalaawu umme lamindeniminden okila li kahinto li ánayine alet oola.

⁵ Imban Móyiis lansaan li Eluwaayi, kanaale kakaane loon umme koote kuteki kuyitik kumuk. Muñowu awu buu lulobe?

⁶ Kulollob loon muñaˈa min kubuutoo Yéesu, bánum li kújowum tó kul̥oofool. Bale Yéesu li ásiten min aŋa’ husiikool min alako kakiic teetaam.

⁷ Emmuu kukatut kagel̥l̥enoolool, Yéesu li ál̥aalulo li aaniil: — Bajumuu an li bukuluul akaanut kahoofoo, li ajand atekool huyitik.

⁸ Yéesu li alaañen ásiten min alako kakiic teetaam.

⁹ Nan kujamumuu kulimaku unku, li kúfu’ ano li ano, kítum li kunahaanaku, jow saŋo to Yéesu balewool buko li anaalaawu ayito tomuu li tutayi.

¹⁰ Yéesu li ál̥aalulo li aan anaalaawu: — Alíinom, kama kumbukay? Bajut an aane lutilentilen?

¹¹ Anaalaawu li aanool: — Maayeet ano, Anahaan. Yéesu li aanool: — Injé foof let eeni lutittil. Ujow, bale muñeˈe jakum bil umit ukaan kahoofoo.]

Yéesu ammuu mawuŋaamu mata adunaayi

¹² Yéesu li alaañen alob li búsukabu aaniil: — Injé emmuu mawuŋaamu mata adunaayi. An anabumuu lí ínje fan abaj mawuŋaamu mata buloŋabu, ban let ájowum li élim maayeet.

¹³ Muñeˈe Kufaaliisiyeŋaku li koonool: — Awu li kajawi humum ko lúlobume. Mó mújimuu, wahawu wan ulobumuu ulet mal̥egen.

¹⁴ Yéesu li aaniil: — Maayeet min kite eenimuu li kajawom humum ko lílobume, bale wahawu wan ilobumuu mal̥egen, mata lihaase bay libilumulo, li bay lijowe boot. Bale bukuluul jihaasut bay libilumulo, li bay lijowe boot.

¹⁵ Bukuluul jitiibetiib loon ál̥ahukow atiibemuu, bale ínje let itiib an.

¹⁶ Ban éetimuu itiib an, fan itiibool nab li mal̥egenamu, mata ilet liwoonom, bale Atuubaawu áboñulommuu ummu lí ínje.

¹⁷ Ban kikkiic li Eluwaayi yooluul kaanaku, bukan kúl̥uba kulobumuu wahawu wanolawu, wahawu unwu wan kulobumuu mal̥egen.

¹⁸ Injé lílobunlobum li kajawaku kúmbaam humum ko, ban Atuubawom áboñulommuu lakooŋenonkooŋen.

¹⁹ Kufaaliisiyeŋaku li koonool: — Kama Atuubayi ummay? Yéesu li aaniil: — Jihaasutom, ban jihaasut Atuubawom. Jihaaseenommuu, fan jihaaseen foof Atuubawom.

²⁰ Yéesu li alob kulimaku unku nan alakomuu buliikenabu bata ésukayi li Eluufayi yata Ateemit, tan bukanabuku kusenemuu bujuuñakabu. An ajokutool, mata waatuwayi yoola báliiŋolut.

Yéesu li alob mata ejowayi yoola boot bata Atuubaawu

²¹ Yéesu li alaañen aaniil: — Boot min ijow ban fan jiŋesom, bale fan jiket li kahoofoolaku kooluul. Let jiyili jijow ban ínje emmuu li ijow.

²² Muñeˈe Kunahaanaku kata Kusuwifaku li kunaak koonoo: — Waa, boot fíle min amukoolo? Emmuu laane: «Jiyilaat jijow tan emmuu li ijow?»

²³ Yéesu li aaniil: — Bukuluul bukan kata baabe li etaam, ínje li emitayi libilumulo. Bukuluul bukan kata adunaaye, ínje ilet an ata adunaaye.

²⁴ Mó mújimuu, li eenuul fan jiket li uhoofoolawu wooluul. Mata jíyinenutumuu kaanaku «Injé emmuu anawu an éemimuu», fan jiket li uhoofoolawu wooluul.

²⁵ Muñeˈe li kugel̥l̥enool koonool: — Awu ommuu ayi? Yéesu li aaniil: — Anawu an ifimmuu min ilobuul yaan no li húkitumahu.

²⁶ Libabbaj wah wameeŋe elob mooluul, li wah wameeŋe wan éemi li itiibumuul mata wo. Bale anawu áboñulommuu an alobe mal̥egen, ban ínje wahawu wan íjamummuu li akila wo lilobemuu adunaayi.

²⁷ Kúnaanumut koon mata Atuubaawu lakowe elobiil.

²⁸ Muñeˈe Yéesu li aaniil: — Nan jommuu li jiteben Añool-An jiban, fan jihaas joon «Injé emmuu anawu an Eémimuu». Fan jihaas joon inti li kajawom humum ko líkaanume wah, bale fan ilob wahawu wan Atuubawom aliikenommuu bale.

²⁹ Anawu áboñulommuu ummu lí ínje. Akatutom balewom, mata li kaanekaan nanoonan wahawu wásuumoolumuu.

³⁰ Nan Yéesu alakomuu elobayi loon muñaˈa, bukan kameeŋe li kúyinen li akila.

Kaletumuu emiikeel li kammuu emiikeel

³¹ Muñeˈe Yéesu li aan Kusuwifaku káyinenumuu li akila: — Jinabumuu li kulimaku kan ilobuulumuu, joonosoono li mal̥egen kúgoomaku kúmbaam.

³² Muñowu jommuu li jíhaasum mal̥egenamu, ban mal̥egenamu fan múfulenuul li humiikeeleto.

³³ Li koonool: — Alóli bubukoolum Abulaham joom, ban bilut líiŋ nakee li jilako emiikeel yata an. Buu kaane li óonoli fan jífu’ li humiikeeleto?

³⁴ Yéesu li aaniil: — Li mal̥egenamu fan ilobuul: anoowan akaane kahoofoo, amiikeel laam ata kahoofoo.

³⁵ Ban amiikeel álakowoliit li butoŋabu bata anahaanawu oola boot nanoonan. Bale añiilawu áyinaawu okila fan alako li butoŋabu boot nanoonan.

³⁶ Añiilawu áyinaawu kama áfulenuulumuu li humiikeeleto, fan jífu’ li ho li mal̥egen.

³⁷ Lihaase een bukuluul bubukoolum bata Abulaham joom. Bale bukuluul jumbuku li huŋes min jimukom, mata jikaanut kulimaku kan ilobuulumuu li uyinumuul.

³⁸ Injé, wahawu wan ijukumuu li Atuubawom lilobe. Bale bukuluul, wahawu wan atuubawuul alobuulumuu jikaanemuu.

³⁹ Li koon Yéesu: — Abulaham ammuu Atúubawoli. Yéesu li aaniil: — Kaaneenumuu loon li mal̥egenamu bañool Abulaham joom, faneen jinaak jikaan loon okila.

⁴⁰ Bale muñeˈe bukuluul jumbuku li huŋes jamukom, ínje jalobuulumuu mal̥egenamu man íjamummuu li Ateemit, ban Abulaham okila akaanut loon bukuluul.

⁴¹ Bale bukuluul, jinannab li bakaanelabu bata atuubawuul. Li koon Yéesu: — Olóli jilet bañiil bahaasut atuubayiil. Atuuba ano bale jibaje: Ateemit!

⁴² Yéesu li aaniil: — Ateemit aameenumuu li mal̥egen Atuubawuul, faneen jifañom, mata li Ateemit libilumulo, ban akila léemum taate. Ibilumut li kajawom humum ko, bale akila áboñulom.

⁴³ Kama wáa újiye jínaanumut wahawu wan ilobuulumuu? Mata jiyilaat jijanten hulimahu húmbaam.

⁴⁴ Atuubawuul akila ammuu Sayitaane, ban wahawu wan atuubawuul afañumuu, wo jifañumuu min jikaan. Okila yaan no li húkitumahu lafin láami amukabukan. Alakowut li mal̥egenamu, mata mal̥egen mulet li akila. Alakomuu émalamiñ, lalollob loon afinumuu min aano, mata okila ámalamiñ laam, ban okila ammuu atuubaawu ata émalimiñ.

⁴⁵ Bale ínje min ilobuulumuu mal̥egenamu, mó mújimuu jíyinenut lí ínje.

⁴⁶ Ayi li bukuluul ayilo aan likankaan kahoofoo? Nokoomuu loon mal̥egen lilobe, wáa újiye jíyinenut lí ínje?

⁴⁷ An áamimuu ata Ateemit, fan ajanten kulimaku kata Ateemit. Bale bukuluul min jiletumuu bukan kata Ateemit, mó mújimuu jíjanteneliit.

Yéesu lahaŋe Abulaham

⁴⁸ Kusuwifaku li koonool: — Jikooŋut fíle min joonumuu awu an ata Samali, ban buyinum bajakut bújufoyi?

⁴⁹ Yéesu li aaniil: — Injé buyinum bajakut bújufowutom. Injé kaluuken Atuubawom léemi li kó, bale bukuluul jiluukenutom.

⁵⁰ Injé ilet li huŋes kasal boot lí ínje humumom. Baje An ammuu li huŋes ko boot lí ínje, ban okila atiibemuu.

⁵¹ Li mal̥egenamu fan ilobuul: An átuulumuu kulimaku kúmbaam, let abil aket maayeet.

⁵² Kusuwifaku li koonool: — Muñeˈe jihaase joon kama mal̥egen buyinum bajakut bújufoyi! Abulaham lakete, kufulofetaku foof kukete, bale awu loon: «An átuulumuu kulimaku kúmbaam let abil aket maayeet.»

⁵³ Waa, awu fíle luhaŋe átuubawoli Abulaham aketumuu? Ban kufulofetaku kukete foof. Kama luhine uyinoo li oon awu ommuu ayi?

⁵⁴ Yéesu li aaniil: — Isaloolomuu ínje humumom, kasalaku unku inti kasal. Atuubawom ammuu li asalom, an joonumuu: «Okila ammuu Ateemitawu óololi.»

⁵⁵ Ban jihaasutool, bale ínje lihaasool. Eenumuu ihaasutool, li ilako ámalamiñ loon bukuluul. Bale ínje lihaasool, ban lítuttuul kulimaku koola.

⁵⁶ Abulaham ammuu Atuubawuul, lababbaj ésuumahukow min áatimuu ajuk hunakahu hata ebilayi yúmbaam. Lajuujuk hunakahu ban súumoosuum.

⁵⁷ Kusuwifaku li koonool: — Awu ufanolut ubaj simit kúyii kúl̥uba li kuŋen, li oon lujuujuk Abulaham?

⁵⁸ Yéesu li aaniil: — Li mal̥egenamu fan ilobuul, tówum Abulaham abuki, «Injé to».

⁵⁹ Muñeˈe li kumulukul kuyitik boot min kutekool. Bale Yéesu li ayolo min ajow áfu’ li Eluufayi yata Ateemit.