Hulimahu Hásuumaahu loon Saŋ akiic homuu 6 - Jola-Kasa

Yéesu li ákuumen bukan sínjunne hutok

¹ Fúlum tó, Yéesu li ajow alimb boot kageb kaaka kata húwajahu hammuu li etaamayi yata Gálile (haaneyimuu foof húwajahu hata Tibeeliyad.)

² Búsuk báamak li bunaak bunab li okila, mata bukanabuku kujuujuk búhiisenumabu bájaahalenimuu ban anaake akaanumuu li kafakenaku kata bukanabuku kásomutumuu.

³ Yéesu li aŋito li huyuuyahu ajow abah ló li kúgoomaku koola ló.

⁴ Faakayi yo balehene.

⁵ Muñeˈe Yéesu li ateb kúkilool li ajuk búsuk báamak bo li ebil boot boola. Li aan Fílib: — Bay lootaale únoomulaal kúmbuulu usenaal bukanabuku umbuku feh kutiñ?

⁶ (Yéesu lalollob loon muñaˈa min ajukum li Fílib, mata li mal̥egenamu okila Yéesu bahaase aban wahawu wan akila humumool ammuu li akaan.)

⁷ Fílib li aanool: — Maayeet bacaam aloka bata etihunaka ñoono síteemeel síl̥uba, buŋali min yooŋ kúmbuulu, let kufit min anoowan li buko abaj afalen atit.

⁸ Akee li kúgoomaku an koone Andele, atuyawu ata Simoŋ Fiyeel li aan Yéesu:

⁹ — Baje taate jífu’ jabaje kúmbuulu koono hutok li muwol múl̥uba. Bale wahawu unwu waa uyilo ufit boot li bukanabuku umbuku feh?

¹⁰ Yéesu li aaniil: — Jikaan ésukayi feh ebah. (Tan kulakomuu babbaj to mahos mameeŋe.) Mal̥egen ésukayi li ebah. Kánayinaabuku kalako tomuu kuyilo kúliiŋ sínjunne hutok.

¹¹ Muñeˈe Yéesu li aŋa’ kúmbuuluwaku min asal Ateemit aban, li agaben ko bukanabuku kalako tomuu. Li aŋa’ muwolamu min akaan manolamu, ban li asen anoowan li buko loon afañumuu.

¹² Nan buko foofiil feh kutokoñumuu kujow kufooñ, Yéesu li aan kúgoomaku koola: — Jiwomen kumunculaku kasaŋomuu, jakum hanoohan hucooci.

¹³ Mal̥egen li kuwomen kumunculaku kata kúmbuuluwaku hutokayi kan kutokoñumuu kusaŋen, li kumeeŋen utekel kuŋen li úl̥uba.

¹⁴ Nan bukanabuku kujukumuu búhiisenumabu bájaahalenimuu muñowu ban Yéesu akaanumuu, li koon: — Mal̥egen ánayinaawu ummu akila ammuu Afulofetawu áatimuu abil li adunaayi.

¹⁵ Bale nan Yéesu ahaasumuu aan boot min kubil kujokool kukaan áyii, li alaañen añako ajow balewool boot li huyuuyahu.

Yéesu li akak li malamu min ajow

¹⁶ Nan títiimomuu, kúgoomaku kata Yéesu li kujow boot bata katantaku kata húwajahu.

¹⁷ Nan kúliiŋ bómuu, li kújufo li busaana min kuween kujooŋoo Káfeenawum, kalimben kaaka húwajahu. No unnu banakabu bayaane bujon ban Yéesu bajowolut ajowubeniil.

¹⁸ Búlus báamak li bútekul, húwajahu li hutiñ ŋáa’.

¹⁹ Kúgoomaku li kuween kujow kubaj sikilomeet sayilo siŋej hutok mantee foof hutok li yano, li kujuk Yéesu li abilum li malamu ákoojul busaanaabu. Li kúkoli.

²⁰ Bale Yéesu li aaniil: — Sákoluul, laalu ínje!

²¹ Kúgoomaku li kufañeen kújufool li busaanaabu, bale bo bayaane buya li etaamayi ban kommuu li ejowayi.

Búsukabu li buŋes Yéesu

²² Li líiŋ hunak hukaten, búsukabu basaŋomuu kalimben kaaku húwajahu li bukooñaam kaanaku busaana bano bale bulakoween to, ban Yéesu ájufowut li bo li kúgoomaku koola ló. Bale kúgoomaku baleyiil kujeˈe.

²³ No unnu, usaana wakee wabilumulo li ésukayi yan koonemuu Tibeeliyad, li úŋejul. Ulíiŋul, li ujow uya ukooj tan Amaaŋenawu abile akaanumuu búsukabu butiñ okila basale Ateemit aban.

²⁴ Muñeˈe nan búsukabu bujukumuu kaanaku Yéesu li kúgoomaku koola kulet to, bukanabuku li kújufo li usaanaawu min kujowool huŋes Káfeenawum.

Yéesu ammuu húmbuuluwahu hasenemuu buloŋabu

²⁵ Nan búsukabu butookumuu Yéesu kalimben kaaka húwajahu, li bugel̥l̥enool boonool: — Anahaan, kama nay lúŋejulo baabe?

²⁶ Yéesu li aaniil: — Li mal̥egenamu fan ilobuul: min joonomuu li huŋesom let mata min jijukumuu búhiisenum bájaahaleniye, bale mata min jitokoñumuu kúmbuuluwaku jijow jifooñ.

²⁷ Jakum jilok boot kabaj búhen báami li bukajen, bale jilok min jibaj búhen báami li bulako to boot li buloŋabu bábaneliitumuu. Búhenabu umbu Añool-An ammuu li asenuul, mata li mal̥egenamu li akila Ateemit Atuubaawu akaanumuu húhaasumahu hoola.

²⁸ Muñeˈe bukanabuku li kugel̥l̥enool koonool: — Buu joote jikaan min jikaan bulokabu ban Ateemit afañumuu min jikaan?

²⁹ Yéesu li aaniil: — Bulokabu ban Ateemit afañumuu min jikaan, bo bommuu min jíyinen li anawu an áboñulumuu.

³⁰ Muñeˈe li koonool: — Kama muñowu búhiisenum bájaahaleniye bay loote úkaanoli jijuk min jíyinen li awu? Bulok bay lóomi li ukaan?

³¹ Situubawolaal sihaan sitintiñ li kayiinaayaku mutiñaayamu mabilummuu li emitayi man koonemuu maan, loon Bakiicelabu bulobumuu: «Ateemit laseniisen húmbuuluwahu habilummuu li emitayi kutiñ.»

³² Yéesu li aaniil: — Li mal̥egenamu fan ilobuul: inti Móyiis asenuul húmbuuluwahu habilummuu li emitayi, bale Atuubawom ammuu li asenuul húmbuuluwahu hata mal̥egen habilummuu li emitayi.

³³ Mata li mal̥egenamu, húmbuuluwahu hata Ateemit ho hubilumulomuu li emitayi, ban ho husenemuu buloŋ adunaayi.

³⁴ Muñeˈe li koon Yéesu: — Anahaan, unaak úsenoli húmbuuluwahu unhu nanoonan.

³⁵ Yéesu li aaniil: — Injé emmuu húmbuuluwahu hasenemuu buloŋabu. An abilumuu búmbaam, let abil acaalet. An áyinenumuu li ínje, bahob let bubil bujokool.

³⁶ Bale lilobuulob mo: Maayeet min jijukumuu, bale jíyinenut.

³⁷ Anoowan an Atuubaawu asenom fan abil búmba, ban an abilumuu búmba manooman let ibetenool tíyaŋ,

³⁸ mata ibilumuloot li emitayi boot kakaan húnongumahu húmbaam, bale boot kakaan húnongumahu hata anawu áboñulommuu.

³⁹ Húnongumahu hata Anawu áboñulommuu ho hommuu jakum an li bukanabuku kan asenommuu ájim, bale min iyitenumuliil li eketayi li hunakahu húbanumahu.

⁴⁰ Húnongumahu hata Atuubawom ho hommuu unhe: anoowan ammuu li ajuk Añiilawu ban li áyinen li akila, fan abaj buloŋabu bábaneliitumuu. Ban ínje fan iyitenulool li eketayi li hunakahu húbanumahu.

⁴¹ Muñeˈe Kusuwifaku li kunaak kúmummunoo mata Yéesu, mata lansaan: «Injé emmuu húmbuuluwahu habilummuu li emitayi.»

⁴² Li kunaak koon: — Kama kele inti okila ammuu Yéesu, añiilawu ata Suseef? Luhaasaale jak atuubawool li jaawool! Buu layilo aan muñeˈe li emitayi láwalowumulo?

⁴³ Yéesu li aaniil: — Jikat kámummunoolaku kan jommuu li ko!

⁴⁴ An ayilaat abil boot búmbaam, Atuubaawu áboñulommuu okila báŋalulootool, ban ínje fan iyitenumulool li eketayi li hunakahu húbanumahu.

⁴⁵ Kufulofetaku kukikkiic hulimahu unhe: «Ateemit fan aliikeniil foofiil feh.» Anoowan feh ajantene Atuubaawu ban li aliikenum li akila fan abil búmbaam.

⁴⁶ Bale inti eeniseen baje an ajuke Atuubaawu ábute li anawu abilummuu li Ateemit. Okila bale ajukumuu Atuubaawu.

⁴⁷ Li mal̥egenamu fan ilobuul: an áyinenumuu fan abaj buloŋ bábaneliit.

⁴⁸ Injé emmuu húmbuuluwahu hasenemuu buloŋabu.

⁴⁹ Situubawuul sihaan sitintiñ li kayiinaayaku mutiñaayamu mabilummuu li emitayi, bale kubiibil kuket.

⁵⁰ Húmbuuluwahu unhu hubilummuu li emitayi, bájum an atokoñ homuu let aket.

⁵¹ Injé emmuu húmbuuluwahu haloŋumuu, habilummuu li emitayi. An atokoñumuu húmbuuluwahu unhu, fan aloŋ boot nanoonan. Ban húmbuuluwahu han emmuu li isen bájum adunaayi li eloŋ, ho hommuu eniilayi yúmbaam.

⁵² Nan Yéesu alobumuu loon muñaˈa, Kusuwifaku kuuñiil li kulit min kulako búwonnoo koon: — Kama buu ánayinaawu ummu aate ayili asenolaal eniilayi yoola utokoñaal?

⁵³ Muñeˈe Yéesu li aaniil: — Li mal̥egenamu fan ilobuul: jitokoñutumuu eniilayi yata Añool-An, ban jihobutumuu húsimahu hoola, let jibaj buloŋabu bata mal̥egen.

⁵⁴ An atokoñumuu eniilayi yúmbaam ban li ahob húsimahu húmbaam, fan abaj buloŋabu bábaneliitumuu. Ban ínje fan iyitenumulool li eketayi li hunakahu húbanumahu.

⁵⁵ Mata eniilayi yúmbaam búhen bata mal̥egen, húsimahu húmbaam muhobaay mata mal̥egen.

⁵⁶ An atokoñumuu eniilayi yúmbaam, ban li ahob húsimahu húmbaam, anawu ummu, ummu lí ínje, ínje li éemi li akila.

⁵⁷ Emmuu Atuubaawu áboñulommuu lalonloŋ, ínje li okila líloŋume. Mo foof an ammuu li atokoñom, li áloŋum lí ínje.

⁵⁸ Húmbuuluwahu unhe hubilumulomuu li emitayi. Húbutoobutoo li han situubawuul sihaan sitokoñumuu, ban buko kukeeket. Bale an atokoñumuu húmbuuluwahu unhe, fan aloŋ boot nanoonan.

⁵⁹ Kulimaku unku Yéesu alobumuu nan alakomuu kaliikenaku kata bukanabuku li eluufayi yata kal̥awaku yata ésukayi yata Káfeenawum.

Kulim kata buloŋabu bábaneliitumuu

⁶⁰ Muñeˈe nan kujamumuu Yéesu li alob loon muñaˈa, kameeŋe li kúgoomaku koola li koon: — Hulimahu unhu húsuumut bajam. Ayi ayilo ajanten ho?

⁶¹ Nan Yéesu ahaasumuu li buyinumool aan kúgoomaku koola kúmummunoomummunoo mata hulimahu unhu, li aaniil: — Kama jokuujok?

⁶² Kama muñowu buu eete nokoo bukuluul bajuke Añool-An li alaañ boot haatiya ban alakoweenumuu naanaŋ?

⁶³ Buyinumabu bata Ateemit busenemuu buloŋ. An humumool ayilaat akaan wahoowah. Kulimaku kan ilobuulumuu, ko kusenemuu Buyinumabu Banabaabu, li buloŋabu.

⁶⁴ Bale kukee li bukuluul kúyinenut. (Li mal̥egenamu, Yéesu lahahhaas yaan no li húkitumahu bukay kúyinenutumuu li ayi ammuu li abetool li kuŋen bukan.)

⁶⁵ Yéesu li afamen aan: — Wahawu unwu újimuu li eenuul an ayilaat abil búmbaam Atuubaawu bakatutool min abil.

⁶⁶ Nan Yéesu alobumuu kulimaku unku ajow aban, kameeŋe li kúgoomaku koola li kulaañ búsol min kukat kanab li okila.

⁶⁷ Muñeˈe Yéesu li agel̥l̥en kúgoomaku kuŋen li kúl̥ubaaku aaniil: — Bukuluul foof jifañe min jijow?

⁶⁸ Simoŋ Fiyeel li aanool: — Amaaŋen kama bata ayi jommuu li jijow? Lubaje kulimaku kasenemuu buloŋabu bábaneliitumuu.

⁶⁹ Ban óloli, jíyinene ban jihaase joon awu ommuu anawu anabaawu ata Ateemit.

⁷⁰ Yéesu li aaniil: — Kama inti ínje il̥usuul bukuluul kuŋen li kúl̥ubaaku? Bale akee li bukuluul an ata Sayitaane!

⁷¹ Yéesu, Sudaas ata Simoŋ Isikaaliyot lalakowe elob. Sudaas ammuu akee li kúgoomaku kuŋen li kúl̥ubaaku, okila ammuu li abil abet Yéesu li kuŋen bukan.