Hulimahu Hásuumaahu loon Saŋ akiic homuu 20 - Jola-Kasa

Wah ulakowut li huyaakahu

¹ Li líiŋ li hunakahu hútinaalahu hata esimenayi, Mali ata ésukayi yata Madala, li ajow bajuk huyaak li bújom bíb, to baloŋe li tílim. Nan áliiŋumuu, li ajuk aan hugisaahu han kuŋa’muu min kúfib kánoonumaku kata huyaakahu, hubakkenibakken kaan li kakaŋ.

² Muñeˈe Mali li áteyul ajow aheb Simoŋ Fiyeel buko li ágoomawu an Yéesu aboolaatumuu, aaniil: — Kúfulenuufulenul Anahaanawu li huyaakahu, ban jihaasut ban kukaanool!

³ Muñeˈe Fiyeel buko li ágoom aahu, li kúfulul kujow boot bata huyaakahu.

⁴ Li kutey li mano buko kúl̥uba, bale ágoom aahu li ahaŋ Fiyeel mahi’, li ajand áliiŋ bata huyaakahu.

⁵ Li aŋaalo li huyaakahu li ajuk ul̥aacawu wata úbilawu teetaam, bale anokenut.

⁶ Muñeˈe Simoŋ Fiyeel anaake ánabulumuu li akila li ahin áŋejul, li anoken li huyaakahu áliiŋ, li ajuk ul̥aacawu teetaam.

⁷ Li ajuk foof eleesaayi yáhimenumuu húkowahu hata Yéesu. Eleesaayi ewalenuti tan ul̥aacawu ulakomuu, bale ebooñibooñ kaan jata yo.

⁸ Muñeˈe ágoom aahu ajandumuu áliiŋ li huyaakahu, li ahin anoken, áliiŋ li ajuk, li áyinen.

⁹ (Li mal̥egen boot yok no unnu, kúgoomaku buko bánaanumolut kaanaku Yéesu fan ayitowumul li eketayi, loon Bakiicelabu bulobumuu.)

¹⁰ Fúlum tó, kúgoomaku kúl̥ubaaku li kulaañ kúbalo.

Yéesu li áfu’ Mali ata Madala

¹¹ Mali alakomuu tíyaŋ akooj huyaakahu, li alako to jíl̥ok. Nan alakomuu jíl̥okaju, li ásiten min aŋaalo li huyaakahu.

¹² Li ajuk kumalaka kúl̥uba kakaanowe wañ wahiite, mabahe tan ehuluŋayi yata Yéesu ehinteneenimuu, akee li buko bata húkowahu, aahu bata kootaku.

¹³ Kumalakaaku li kugel̥l̥enool koonool: — Anaale, wáa újiye li oono li jíl̥ok? Mali li aaniil: — Kuŋaŋŋa’ Anahaanawu úmbaam, ban ihaasut ban kukaanool.

¹⁴ Nan alobumuu loon muñaˈa aban, li átiiwowul li ajuk to Yéesu mayitowe, bale ahaasut aan akila.

¹⁵ Yéesu li agel̥l̥enool aanool: — Anaale, wáa újiye li oono li jíl̥ok? Ayi luŋese loo? Mali li ayinoo li aan Yéesu ammuu alokaawu ata etoolayi, li aanool: — Anahaan, nokoomuu loon awu uŋale ehuluŋayi yata Yéesu, uhebom tay lukaan yo min ijow iŋa’ yo.

¹⁶ Yéesu li aanool: — Mali! Mali li átiiwo ajooŋoo li Yéesu, ban li aanool li elobayi yata Eébulo: — Lábuni! (Yo yommuu «Anahaan».)

¹⁷ Yéesu li aanool: — Jakum útukom ukat taate, mata ijowolut boot bata Atuubaawu. Bale ujow oon kutuyom, boot min ijow boot bata Atuubawom ammuu foof Atuubawuul, boot bata Ateemitawu úmbaam ammuu foof Ateemitawu ooluul.

¹⁸ Muñeˈe Mali ata Madala li ajow alob kúgoomaku aaniil: — Lijuujuk Amaaŋenawu! Ban li akitteniil wahawu wan aloboolumuu.

Yéesu li áfu’ kúgoomaku koola

¹⁹ Muñeˈe li kátiimaku kata Dimaasayi inyu, kúgoomaku. Yéesu li abil ayito li tutiil min aaniil: — Kásuumaay kulako li bukuluul!

²⁰ Nan Yéesu alobumuu kulimaku unku aban, li áhiisiil kuŋenaku koola li kahehaku koola. Kúgoomaku li kubaj ésuumahukow yáamak nan kujukumuu Amaaŋenawu.

²¹ Yéesu li alaañen aaniil: — Kásuumaay kulako li bukuluul! Loon Atuubaawu áboñulommuu, mo foof ínje emmuu li iboñuul.

²² Nan alobumuu kulimaku unku aban li áhuuten li buko min aaniil: — Jiyab Buyinumabu Banabaabu!

²³ Jibonketumuu bukan uhoofoolawu wooliil, Ateemit foof fan abonketiil wo. Bale bukanabuku kan jootutumuu jibonket uhoofoolawu wooliil, Ateemit foof let abonketiil wo.

Yéesu li áfu’ Toma

²⁴ Toma, ammuu akee li kúgoomaku kuŋen li kúl̥ubaaku, (an koonemuu foof Mál̥uba), alakowut to nan Yéesu áfu’muu kufaalool.

²⁵ Muñeˈe nan Toma áliiŋulomuu, kúgoom kaabuku li koonool: — Jijuujuk Amaaŋenawu! Bale Toma li aaniil: — Ijukutumuu káakumaku kata sidaajasu li kuŋenaku koola, ban iŋalutumuu husiikahu igo’ tan sidaajasu sibaaŋimuu, ban foof iŋalut kaŋenom igo’ li kahehaku koola, let íyinen.

²⁶ Muñeˈe li baj kunak hutok li kúhaaji, kúgoomaku kata Yéesu li kulaañen kuwoog li eluufayi, ban Toma to lalakowe li buko. Wámbiilawu wata eluufayi ukul̥eenikul̥, bale Yéesu li abil ayito hákiliil, ban li aan: — Kásuumaay kulako li bukuluul!

²⁷ Nan asaafiilumuu aban li aan Toma: — Uŋálul husiikahu hooli ukaan taate min ujuke kuŋenaku kúmbaam. Uŋálul kaŋenaku kooli min ugo’ kahehaku kúmbaam. Jakum úwettoo, bale úyinen!

²⁸ Toma li aanool: — Amaaŋenawu úmbaam, li Ateemitawu úmbaam!

²⁹ Yéesu li aanool: — Min ujukommuu mó mújimuu li úyinen? Awólo, káyinenumuu lí ínje buko bajukutom!

Wahawu wájimuu Saŋ li akiic éliibalayi inye

³⁰ Yéesu lakankaan foof úhiisenum wájaahaleniye wameeŋe hákil kúgoomaku koola, wakiicuti li éliibalayi inye.

³¹ Bale wahawu wakiicimuu li éliibalayi inye, ukiicikiic mantee li jíyinen kaanaku Yéesu ammuu Kilisita, okila ammuu Añiilawu ata Ateemit. Ban jíyinenumuu li akila, fan jíbajum buloŋabu li kajawaku koola.