Hulimahu Hásuumaahu loon Saŋ akiic homuu 18 - Jola-Kasa

Kusollaaliyaku li kujok Yéesu

¹ Nan Yéesu al̥awumuu loon muñaˈa aban, li ajow li kúgoomaku koola ló, boot kalimben kaaka kata kayelenaku kan koonemuu Seeduloŋ. Nan kúliiŋumuu, Yéesu li anoken li kúgoomaku koola ló li etool yalako to.

² Sudaas ammuu li abet Yéesu li kuŋen bukan, lahahhaas foof tinatu untu, mata Yéesu labilebil to ñameeŋe li kúgoomaku koola ló.

³ Muñeˈe Sudaas li aŋa’ húmim hata kusollaali li hata kufooya kan huhaanaahu hata élambaayi li Kufaaliisiyeŋaku kusenool, min kujow boot bata etoolayi. Ujunko kookene, li sihiitum li kúlaañaañ.

⁴ Yéesu ahaasumuu wahawu feh wammuu li ubajool, li ajow kufam, min agel̥l̥eniil aaniil: — Ayi jiŋese loo?

⁵ Kusollaaliyaku li koonool: — Yéesu ata ésukayi yata Nasalet jiŋese loo. Yéesu li aaniil: — Injémuu. Sudaas ammuu li abet Yéesu li kuŋeniil, to foof layitowe li buko.

⁶ Nan Yéesu aaniilumuu, «Injémuu», li kulaañ kúsola, ban li kulo teetaam.

⁷ Muñeˈe Yéesu li alaañen agel̥l̥eniil aaniil: — Ayi jiŋese loo? Li koonool: — Yéesu ata ésukayi yata Nasalet, jiŋese loo.

⁸ Yéesu li aaniil: — Lilobenuulobumuu eenuul ínje emmuu Yéesu. Nokoomuu loon ínje jiŋese lí ínje, kama li jikat umbuku min kujow.

⁹ Muñowu hulimahu han Yéesu alob nomuu húbajummuu, haanumuu: «Faafa, bajut an li bukanabuku kan usenommuu ájime.»

¹⁰ Muñeˈe Simoŋ Fiyeel aakenumuu ékundu, li áhoonul yó atek kanuuwaku kúlilaku kata alokaawu ata anahaanawu ata élambaayi afalen. Alokaawu ummu kajawool Málikis.

¹¹ Bale Yéesu li aan Fiyeel: — Uhoon ékunduwayi yooli. Waa, kama luyinooyinoo li oon let ihob ejunkayi yata sílaamasu yan Atuubawom asenommuu?

Li kújowetum Yéesu bata Aan

¹² Húmimahu hata esollaaliyayi boot li anahaanawu ooliil ló, li kufooyaabuku kata Kusuwifaku, li kujok Yéesu ban li kujenkool.

¹³ Li kujand kújowetum Yéesu bata Aan, an Kayif ayabumuu añoolool. Kayif alakomuu emitayi inyu anahaanawu ata élambaayi.

¹⁴ Kayif okila asaabumuu kunahaanaku kata Kusuwifaku aaniil: «Haŋe majak min an ano aket boot li ésukayi feh.»

Fiyeel li aceeŋ aan lahaase Yéesu

¹⁵ Simoŋ Fiyeel li ágoom akee li kunab li Yéesu. Alámbaawu áamakawu lahahhaas ágoomawu ummu, mó lí múji li anoken li mano li Yéesu li ekaakayi yata eluufayi yata anahaanawu ata élambaayi.

¹⁶ Bale Fiyeel okila li ayito tíyaŋ kámbiilaku. Agóomawu an álambaawu áamakawu ahaasumuu li áfulul abil alob li anaalaawu afooyemuu kámbiilaku min akat Fiyeel min anoken.

¹⁷ Muñeˈe agoloolaawu afooyemuu kámbiilaku li agel̥l̥en Fiyeel aanool: — Kama awu foof kele ulet akee li kúgoomaku kata ánayinaawu ummu? Fiyeel li aanool: — A’aa’, inti ínje.

¹⁸ Emmuu jóobijoobi, kulokaabuku li kufooyaabuku li kútifen sambun min kulako kayiiño. Fiyeel to foof lalakowe li buko, min alako kayiiño.

Alámbaawu áamakawu li agel̥l̥enoo Yéesu

¹⁹ Muñeˈe anahaanawu ata élambaayi li agel̥l̥enoo Yéesu mata kúgoomaku koola li mata baliikenelabu boola.

²⁰ Yéesu li aanool: — Lilollob ihant hákil ésukayi feh. Linaanaak iliiken bukanabuku li siluufasu sata kal̥awaku feh kuwoogemuu, ban bajut wah wan ilobe li huyoloo.

²¹ Kama wáa újiye li ugel̥l̥enom loon muñowu? Ugel̥l̥en bukanabuku kajantenumuu wahawu wan ilobiilumuu. Kuhaase jak wahawu wan ilobumuu.

²² Nan Yéesu alobumuu kulimaku unku, akee li kufooyaaku alako to, li abil atekool eheejen, ban li aanool: — Muñowu lommuu ulob anahaanawu ata élambaayi?

²³ Yéesu li aanool: — Nokoomuu loon lilollob ikajen, li uhebom tay likajenumuu. Bale nokoomuu loon lilollob jak, wáa újiye li utekom?

²⁴ Muñeˈe Aan li alob min kújowetum Yéesu majenkaamu bata Kayif ammuu anahaanawu ata élambaayi.

Fiyeel li amit aceeŋ aan lahaase Yéesu

²⁵ No unnu, Simoŋ Fiyeel okila li alako to kayiiñowaku. Li koonool: — Awu kele foof ulet akee li kúgoomaku kata ánayinaawu ummu? Bale Fiyeel li aceeŋ min aanool: — A’aa’, inti ínje.

²⁶ Akee li kulokaabuku kata anahaanawu ata élambaayi, alakowe an ata anawu an Fiyeel afalenumuu kanuu, li aanool: — Kama inti awu lijukumuu li etoolayi li Yéesu ló?

²⁷ Fiyeel li amit aceeŋ. No unnu, káyin li kuyaan kul̥ok.

Li kújowetum Yéesu bata Filat

²⁸ Fúlum tó, li kúŋalum Yéesu bata Kayif kújowetum boot bata eluufayi yata águubelunaalawu, yaan no li bújom bíb. Bale kunahaanaku kata Kusuwifaku kunokenut li eluufayi jakum bil kusiko, mantee li kuyili kutiñ hutiñahu hata Faakayi.

²⁹ Wahawu unwu újimuu águubelunaalawu Filat li áfulul atookuliil tíyaŋ. Alíiŋul, li agel̥l̥eniil aaniil: — Kama waa ánayinaawu ummu akaane, wájimuu li jil̥oofool?

³⁰ Li koonool: — Kaaneenumuu loon alet an ajakut, leteen jíŋalulool jiseni.

³¹ Filat li aaniil: — Jiŋalool bukuluul humumuul, jijow jitiib loon eluwaayi yooluul elobumuu. Kusuwifaku li koonool: — Jibajut kakaañen min áloli húmumoli jítuk min jimuk an.

³² Muñowu hulimahu han Yéesu alobumuu min áhiis eket buu láatimuu aket, hóomimuu li hubaj.

³³ Muñeˈe Filat li alaañen ajow anoken li eluufayi, ban li áhooñul Yéesu min agel̥l̥enool aanool: — Kama awu ommuu áyiiyawu ata Kusuwifaku?

³⁴ Yéesu li aanool: — Mantee awu humumi uyinoole min ugel̥l̥enom loon muñaˈa, mantee kukee kulobi mo kuya lí ínje?

³⁵ Filat li aanool: — Waa, kama ínje asuwif leem? Bukanabuku kata ésukayi yooli li kunahaanabuku kata élambaayi kubeti li kuŋenom. Kama waa lukaane?

³⁶ Yéesu li aanool: — Jáyiiyaju júmbaam jilet jata adunaayi inye. Jáyiiyaju júmbaam jilakoweenumuu jata adunaayi inye, kulokaaku kúmbaam faneen kutiik jakum bil kubetom li kuŋenaku kata kunahaanaku kata Kusuwifaku. Bale jáyiiyaju júmbaam jilet jata adunaayi inye.

³⁷ Muñeˈe Filat li aanool: — Kama áyii loom? Yéesu li aanool: — Lulobulo mo awu humumi, ínje áyii. Libukibuk ban li ibil li adunaayi boot elob bukanabuku mata mal̥egenamu. An áamimuu ata mal̥egenamu fan ajanten hulimahu húmbaam.

³⁸ Filat li agel̥l̥en Yéesu aanool: — Kama mal̥egenamu mo mommuu sum waa? Nan Filat alobumuu kulimaku unku aban, li alaañen áfulul ajow atook tíyaŋ Kusuwifaku min aaniil: — Injé ijukut li akila butila ban akaane, báami li bújiwom li il̥oofool.

Kusuwifaku li koon Yéesu boot min aket

³⁹ Bale emmuu joonewonsoon li kagaanoogaan kata Faakayi yooluul íkatenuluul an akul̥i, mantee jifañe min íkatenuluul áyiiyawu ata Kusuwifaku?

⁴⁰ Muñeˈe li kulob butiya koon: — Maayeet! Inti okila, bale úkatenul Balabaas! Imban Balabaasawu ummu, an ajakut.