Hulimahu Hásuumaahu loon Saŋ akiic homuu 13 - Jola-Kasa

Yéesu li afos kootaku kata kúgoomaku koola

¹ Muñeˈe li hunakahu húsolaahu tówum Faakayi yata Kusuwifaku éliiŋ, Yéesu bahaase aan ewaatuwayi éliiŋe nan ammuu li áfu’ li adunaayi unye, min ajow boot bata Atuubaawu. Lafinfin min afañe káyinenumuu li akila kammuu li adunaaye, ban li afañiil boot yok li húbanumahu.

² Yéesu buko li kúgoomaku koola li kulako hutiñ kátiimeel, kama Sayitaane akila bakaane aban li buyinumabu bata Sudaas, ammuu añiilawu ata Simoŋ Isikaaliyot, kayinoo kata kabet Yéesu li kuŋen bukan.

³ Yéesu humumool lahaase aan Ateemit lakaakat wahawu feh li kuŋenool, ban li Ateemit labilumulo, ban foof fan alaañ boot bata Ateemit.

⁴ Muñeˈe li kulako hutiñahu, li ayito áfulen kájufowaku koola awalen, min ajow aŋa’ eleesa alaalo.

⁵ Nan alaalomuu aban, li aŋa’ mal ayoŋen li kateew, ban li átoŋ afos kootaku kata kúgoomaku koola, ban li aŋa’ eleesaayi yan alaalomuu min átil̥ kó.

⁶ Muñeˈe nan áliiŋumuu li Simoŋ Fiyeel, Simoŋ Fiyeel li aanool: — Anahaan, awu boot min ufosom koot?

⁷ Yéesu li aanool: — Wahawu wan ikaanemuu li wo uyilaat uhaas wo muñeˈe, bale fan ubil únaanum wo bil nakee.

⁸ Fiyeel li aanool: — Kaan min kaane let ufosom koot! Yéesu li aanool: — Ifosutimuu koot, let uyili ubaj wahoowah lí ínje.

⁹ Simoŋ Fiyeel li aanool: — Anahaan, kama jakum ufosom koot bale, ufos foof kuŋenaku li húkowahu!

¹⁰ Yéesu li aanool: — An afosowe aban, jokutool min alaañen afoso. Mantee kootool bale laate alaañen afos, mata láfuffu’ kis foofool feh. Bukuluul jífuffu’ kis, bale inti bukuluul foofuul feh.

¹¹ (Yéesu lahaase li mal̥egenamu anawu ammuu li abetool li kuŋen bukan. Mó mújimuu li aan: «Inti bukuluul foofuul feh jífule kis».)

¹² Nan Yéesu afosumuu kootaku kata kúgoomaku aban, li alaañen akaano kañaku koola ban, li alaañ ajow abah boot hutiñ. Muñeˈe li aaniil: — Jínaanume wahawu wan ikaanuulumuu?

¹³ Jihooñewonhooñ «Aliikena», li jihooñom foof «Anahaan», ban mal̥egen jikooŋe, mata ínje Aliikena, ínje Anahaan.

¹⁴ Kama ínje ammuu Anahaanawu li Aliikenaawu ifosuulumuu koot, bukuluul foof joote jifosoo koot.

¹⁵ Li mal̥egenamu, likankaan loon muñaˈa min íhiisuul, bánum bukuluul foof li jinaak jikaan loon ínje ikaanuulumuu.

¹⁶ Li mal̥egenamu fan ilobuul: Aloka ahaŋut anahaanawu oola, ban an an kuboñe ahaŋut anawu aboñoolumuu.

¹⁷ Muñeˈe emmuu jihaase wahawu unwu, áwolowuul bukuluul bakaane wo loon íhiisuul womuu.

¹⁸ «Ilobut iya li bukuluul foofuul feh. Lihaase bukanabuku kan il̥usumuu. Bale hulimahu unhe halobimuu li Bakiicelabu hoote hubaj, haanumuu: “Anawu an jinaake jitiñummuu dín dáno, látiiwowulo atiikom.”

¹⁹ Fan ilobuul mo muñeˈe ikat to tówum wahawu unwu úliiŋ, bilum eeno nan wommuu úliiŋ, li jíyinen joon ínje éemimuu “Anawu An Emmuu.”

²⁰ Li mal̥egenamu fan ilobuul: an ayabumuu boola an an iboñe, ínje humumom foof layabe boola, ban an ayabommuu boola, anawu áboñulommuu foof layabe boola.»

Yéesu li alob aan Sudaas fan abil áhoolowool

²¹ Nan Yéesu alobumuu kulimaku unku, li golool li buyinum ŋáa’ li aan: — Li mal̥egenamu fan ilobuul, akee li bukuluul fan abetom li kuŋen bukan.

²² Kúgoomaku li kunaak kujuuloo mata kuhaasut ayi Yéesu alobe li akila.

²³ Akee li kúgoomaku an Yéesu afañumuu ŋáa’, lababbah akooj Yéesu tan kulakomuu hutiñahu.

²⁴ Simoŋ Fiyeel li áyiitool kaŋen min aanool agel̥l̥en Yéesu ayi lalobe li akila.

²⁵ Agóomawu mal̥egen li átinko ahaŋ makooj bagiŋabu bata Yéesu, min agel̥l̥enool aanool: — Anahaan, kama ayi lulobe li akila?

²⁶ Yéesu li aanool: — Boot min iyooken humuncul hata húmbuulu li bájikabu bata buyinjaayabu. Anawu an emmuu li isen ho, akilamuu. Muñeˈe Yéesu li aŋa’ humunculahu ayooken li bájikabu, ban li asen ho Sudaas ata Simoŋ Isikaaliyot.

²⁷ Nan Sudaas aŋa’muu humunculahu unhu hata húmbuuluwahu, Sayitaane li ájufowool. Muñeˈe Yéesu li aanool: — Wahawu wan ommuu li ukaan, ukaan wo cab.

²⁸ (Anoowan li bukanabuku kalako tomuu hutiñahu ánaanumut wáa újiye Yéesu li alob loon muñaˈa.

²⁹ Emmuu Sudaas aakene abootaawu ata sídalamasu, kukee li kúgoomaku li kunaak kuyin li koon Yéesu laanoosaan ajow ánoomul wahawu wan jokiilumuu li wo boot li kagaanaku, mantee foof laanoosaan asen wah ukee kagayimuu.)

³⁰ Mal̥egen Sudaas li aŋa’ humunculahu hata húmbuuluwahu aban, li ayaan ajow áfu’. To bajone.

Jíbooliwoo

³¹ Nan Sudaas áfu’muu, Yéesu li aan: — Muñeˈe máyiineniyamu mata Añool-An mujuki, min máyiineniyamu mata Ateemit mujuki li akila.

³² [Nokoomuu loon máyiineniyamu mata Ateemit mujukijuk li Añool-An,] Ateemit foof fan akaan máyiineniyamu mata Añool-An mujuki li akila humumool, ban fan akaan mo mujuki muñeˈe.

³³ Bañoolom, ilet li ilako li bukuluul fiyo. Fan ban li jiŋesom. Bale boot min ilobuul muñeˈe wahawu wan ilobumuu Kusuwif kaabuku. Let jiyili jijow tan ínje emmuu li ijow.

³⁴ Boot min isenuul hulim huwunkul: jíbooliwoo. Joote jíbooliwoo loon ínje foof íbooliwuulumuu.

³⁵ Jíbooliwoomuu, bukanabuku feh fan kuhaas koon bukuluul kúgoom kúmbaam joom.

Fiyeel fan abil aceeŋ aan lahaase Yéesu

³⁶ Simoŋ Fiyeel li agel̥l̥en Yéesu aanool: — Anahaan, kama bay lujowe boot? Yéesu li aanool: — Uyilaat únabul lí ínje muñeˈe boot ban ijowemuu boot, bale fan bil fiyo li únabul lí ínje.

³⁷ Fiyeel li aanool: — Anahaan, kama wáa újiye iyilaat inab li awu muñeˈe? Tan emmee liyilo iket humum hooli.

³⁸ Yéesu li aanool: — Li mal̥egeni luyilo usen buloŋi mata ínje íji? Li mal̥egenamu fan ilobi: manooman fan uceeŋ ñoono ñáhaaji oon luhaasonhaas, tówum káyin kul̥ok.