Hulimahu Hásuumaahu loon Saŋ akiic homuu 11 - Jola-Kasa

Eketayi yata Laasaal

¹ Muñeˈe li baj ánayine akee an kunaake koon Laasaal ásomute, ban li akin li ésukayi yata Betani, ban Mali li atuyool Maaluta kukinumuu.

² (Mali okila alakomuu anaalaawu abile áyumuu eheeñayi li kootaku kata Amaaŋenawu, ban li aŋa’ walawu woola min átil̥ ko. Okila áliinool Laasaal ásomutumuu.)

³ Mali buko li Maaluta kammuu batuyaay li kuboñ kujow koon Yéesu: — Anahaan, Abukeyi an uboolaatumuu lásomuusomut.

⁴ Nan Yéesu ajamumuu kulimaku unku, li aan: — Kásomutaku unku kajokumuu Laasaal, let kásomut kata eket. Bale kujokoojok bájum bukanabuku li kujuk máyiineniyamu mata sembaasu sata Ateemit, min Añiilawu ata Ateemit ábajum li kó kasal.

⁵ Yéesu aboolaat Maaluta buko li atuyool Mali, li Laasaal.

⁶ Muñeˈe nan Yéesu ajamumuu kaanaku Laasaal lásomuusomut, li afamen akaan kunak kúl̥uba ban alakomuu.

⁷ Fúlum tó, li aan kúgoomaku koola: — Ulaañaal boot Súde.

⁸ Kúgoomaku koola li koonool: — Anahaan, fiyowut nan Kusuwifaku kufañeenumuu min kuteki kuyitik kumuk, li umit ufañ min ulaañ boot bo?

⁹ Yéesu li aaniil: — Kama inti etihunaka ebaje siwaatu kuŋen li síl̥uba? An ajowumuu tihunak, let ajonten mata lajuujuk mawuŋaamu mata adunaayi.

¹⁰ Bale an ajowumuu li huk, fan ajonten mata abajut mawuŋe káta láalawool.

¹¹ Nan Yéesu alobumuu kulimaku unku aban, li afamen aan: — Abukewolaal Laasaal lámoolimooli, bale boot min ijow íliwool.

¹² Kúgoomaku li koonool: — Anahaan, nokoomuu loon lámoolimooli, fan afak.

¹³ Yéesu mata eketayi yata Laasaal lalakowe elob, bale kúgoomaku li kuyinoo li koon mata kámooli lalakowe elob.

¹⁴ Muñeˈe Yéesu li alobiil ahant aaniil: — Laasaal lakeeket.

¹⁵ Súumonsúum ŋáa’ li bukuluul mata min ilakowut tomuu, mantee li jíyinen lí ínje. Bale ujowaal boot ban Laasaal ammuu.

¹⁶ Muñeˈe Toma an koonemuu «Mál̥uba» li aan kúgoom kaabuku: — Kama ololaal foof ujowaal uketaal li mano li Anahaanawu oololaal!

Yéesu asenemuu buloŋabu

¹⁷ Nan Yéesu áliiŋumuu, li atook Laasaal bahokeli aban jow baj kunak kubakii.

¹⁸ Emmuu Betani boot Yeelusalem iyilaat baj sikilomeet síhaaji.

¹⁹ Kusuwif kameeŋe li kubil bujukoo bata Maaluta buko li Mali mata áliiniil aketumuu.

²⁰ Nan Maaluta ajamumuu kaanaku Yéesu ummu li ebil, li ajow kufam. Bale Mali li abah alako li éluufayi.

²¹ Maaluta li aan Yéesu: — Anahaan, ulakoweenumuu taate, áliinom let aketeen.

²² Bale lihaase een maayeet muñeˈe lul̥awe Ateemit wah, fan aseni wo.

²³ Yéesu li aanool: — Alíini fan álaañul li buloŋ.

²⁴ Maaluta li aanool: — Lihaase een fan álaañul li buloŋ li hunakahu húsolaahu, nan kaketumuu kommuu kuyitowumul li eketayi.

²⁵ Yéesu li aanool: — Injé iyitenumulemuu kaketumuu li eketayi, ínje isenemuu buloŋabu. An áyinenumuu lí ínje, fan aloŋ maayeet min akete.

²⁶ Ban an aloŋumuu ban li áyinen lí ínje, let abil aket kale. Lúyinene wahawu unwu? Maaluta li aan Yéesu:

²⁷ — Eéhe’, Anahaan, líyinene kaanaku awu ommuu Afakenaawu, Añiilawu ata Ateemit, áatimuu abil li adunaayi.

Yéesu li al̥ok

²⁸ Nan Maaluta alobumuu loon muñaˈa aban, li ajow áhooñul atuyool Mali min abuyunoolool aanool: — Anahaanawu umme taate, ban laane ubil.

²⁹ Nan Mali ajamumuu loon muñowu, li ayaan ayito cab ajow boot tan Yéesu alakomuu.

³⁰ (No unnu, Yéesu bánokenuloloot li ésukayi. Okila baloŋe tan kufamumuu buko li Maaluta.)

³¹ Nan Kusuwifaku kalakomuu li eluufayi buko li Mali min kunaak kútintimbenool, kujukoolumuu li ayito cab áfu’, li kunab li akila. Kunaanaak kuyinoo li koon boot min ajow bata huyaakahu ajow alako bo min al̥ok.

³² Nan Mali áliiŋumuu tan Yéesu alakomuu ajow ajukool, li ajow ákuntuŋ li kootool ban li aanool: — Anahaan, ulakoweenumuu taate, áliinom let aketeen.

³³ Muñeˈe nan Yéesu ajukumuu Mali li al̥ok, ban Kusuwifaku kánabulumuu li akila foof li kulako jíl̥ok, li jokool ŋáa’, li golool li buyinum.

³⁴ Li agel̥l̥eniil aaniil: — Bay jihokoolumuu? Li koonool: — Anahaan, ubil min ujuk.

³⁵ Yéesu li al̥ok.

³⁶ Muñeˈe Kusuwifaku li koon: — Jijuk buu lafañoolumuu!

³⁷ Kukee li Kusuwifaku li koon: — Okila jakaanumuu ánayinaawu áfuumumuu ajuk, ayilaat áhi’ Laasaal foof áketum?

Yéesu li ayitenul Laasaal li eketayi

³⁸ Yéesu li laañen jokool ŋáa’, li ajow boot li huyaakahu. Huyaakahu huwokiwok li huyuuy, ban li kuŋa’ húlankiin háamak min kúfib kánokenumaku kata ho.

³⁹ Yéesu li aaniil: — Jífulen húlankiinahu. Maaluta ammuu áliinawu ata aketaawu, li aanool: — Anahaan, muñeˈe tan tommaa lafute, mata muñeˈe labaje kunak kubakii li huyaakahu.

⁴⁰ Yéesu li aan Maaluta: — Kama eenuti úyinenumuu, fan ujuk máyiineniyamu mata Ateemit?

⁴¹ Mal̥egen li kúfulen húlankiinahu. Yéesu li ateb kúkilool ajuke emitayi ban li aan: — Faafa, lisali mata min úsooniyenemuu kal̥awaku kúmbaam.

⁴² Injé lihaase een lúsooniyenesooniyen nanoonan kal̥awaku kúmbaam, bale búsukabu umbu báguutommuu bújimuu li ilob, mantee li kúyinen kaanaku awu úboñulom.

⁴³ Nan Yéesu alobumuu loon muñaˈa aban, li alob butiya aan: — Laasaal, úfulul láalu!

⁴⁴ Mal̥egen Laasaal aketeenumuu li áfulul, kootaku li kuŋenaku mabooñeni ul̥aac. Buulabu boola eleesa buguubumi. Yéesu li aaniil: — Jil̥el̥ool ban li jikatool min ajow.

Kásonoo boot jamuk Yéesu

⁴⁵ Kameeŋe li Kusuwifaku kabilumuu bata Mali, li kujuk wahawu wan Yéesu akaanumuu, li kúyiyen li akila.

⁴⁶ Bale kukee li buko li kujow kujuk Kufaaliisiyeŋaku min kuhebiil wahawu wan Yéesu akaanumuu.

⁴⁷ Huhaanaahu hata élambaayi li Kufaaliisiyeŋaku li kujoj li Huhaanaahu háamakahu min koon: — Boot min ukaanaal buu? Anáyinaawu ummu min akaanemuu búhiisenum bájaahaleniye!

⁴⁸ Ukataaloolumuu min anaak akaan wahawu unwu, bukanabuku feh fan kúyinen li akila. Ban kata Lom fan kubil kuyiis Eluufayi yata Ateemit yoololaal li bukanolaal!

⁴⁹ Akee li buko aaneyi Kayif alakomuu anahaanawu ata élambaayi emitayi inyu, li aaniil: — Jínaanumut tó wahoowah.

⁵⁰ Kama jijukut joon kóyumuul min an ano aket boot li ésukayi, ló baaneli bukanabuku foofiil feh kuniilowe?

⁵¹ (Kulimaku unku inti Kayif humumool anonge min alob ko. Bale emmuu okila alakowe anahaanawu ata élambaayi emitayi inyu, Ateemit li álobum li akila kaanaku Yéesu laate aket boot li Kusuwifaku.

⁵² Ban inti boot li Kusuwifaku baleyiil, bale Yéesu laate aket boot foof li bañiilabu bata Ateemit bayiisoomuu boono tanootan, min áwoogenuliil akaan tin tano min kulako an ano.)

⁵³ Muñeˈe li hunakahu unhu kunahaanaku kata Kusuwifaku kúsingenumuu kaanaku fan kumuk Yéesu.

⁵⁴ Wahawu unwu újimuu Yéesu li akat káfu’ añaahoo tíyaŋ li Kusuwifaku. Li ájowum tó boot li etaamayi yakoojumuu kayiinaayaku, li ésuk yan koone Efulayim, ban ajowe alakomuu li kúgoomaku koola.

⁵⁵ Emmuu kagaanaku kata Faakayi, bánum li kúgiileni tówum kagaanaku kúliiŋ.

⁵⁶ Muñeˈe li kulako huŋes Yéesu. Emmuu li Eluufayi yata Ateemit kulakowe, li kunaak kugel̥l̥enoo koon: — Buu jiyinoole? Fan abil fíle kagaanaku?

⁵⁷ Huhaanaahu hata élambaayi li Kufaaliisiyeŋaku kulollob koon an ahaasumuu ban Yéesu aam, li ahebiil min kujokool.