Eébulo 9 - Jola-Kasa

Buu naake kaanumuu li eluufayi yata Ateemit nan húfaalumahu hútinaalahu hulako tomuu

¹ Húfaalumahu hútinaalahu hubabbaj uŋoon wata kal̥aw, li eluuf yata Ateemit baabe li etaam.

² Muñeˈe li kukaan kayunt. Kagebaku kútinaalaku kata kayuntaku ko kunaake kuhooñumuu tan ñéyimuu. Baj dó yiil tin sihiitumasu sikaaneyimuu, etaabul, li kúmbuuluwaku kasenimuu Ateemit.

³ Búsol hufalalahu húl̥ubutahu, bo bugeb baabu bata kayuntaku bommuu ban koonemuu tan haŋumuu máñeyi.

⁴ Dó úndu dán haŋumuu máñeyi, baj ló husila mulakowe. Li baj li ekeesayi inyu foof hunukahu hata Aaloŋ habile húlunfenumuu, li kúlankiinaku kayijimuu nokoo loon ubabbalu dán siluwaasu sata húfaalumahu sikiicimuu.

⁵ Sibaaŋoot sata búwuwenum báyiineniye bata kubey ban koone Seelubeŋ, haatiya káhimenaku kata ekeesayi bulakowe. Máyiinowamu mata kubeyaku kata úwuwenumawu unwu li múhimen tan uhoofoolawu ubonketeyimuu. Uyilaataal ulobaal muñeˈe mata wahawu unwu feh uhantaal.

⁶ Emmuu wahawu feh muñowu ul̥uuleni, kúlambaaku li kunaak kunoken hunakoohunak li bugebabu bútinaalabu bata kayuntaku kujow kukaan bulokabu booliil.

⁷ Bale álambaawu áamakawu bale anokenemuu li bugebabu búl̥ubutabu bata kayuntaku, ñano émitoomit. Fan anoken dó li húsim ló hata énuukuleŋ yasalahi Ateemit, boot li uhoofoolawu woola akila humumool li wata ésukayi.

⁸ Buyinumabu Banabaabu búhihhiis to kaanaku, bútinabu bata dín haŋumuu máñeyi let búbabuli, bugebabu bútinaalabu bata kayuntaku bo to.

⁹ Laalu búhiisenum bata wahawu wata muñeˈe. Wahawu unwu úhihhiis kaanaku usuuhenawu li usilaawu wata sínuukuleŋasu boot li Ateemit, uyilaat úji buyinum bata an áami li múkaaniinamu ummu li buset.

¹⁰ Uŋoonawu unwu wata mata hutiñ bale, mata ehob li mata múkaaniin mata kágiilen. Laalu uŋoon wata ál̥ahukowan walako to boot yok nan Ateemit akaanumuu wahawu feh úbuti.

¹¹ Bale Kilisita labiibil, okila ammuu álambaawu áamakawu ata wahawu wajakaawu wammuu li ebil. Lanokennoken li kayunt kahaŋe maluuk ban li kuhaŋ manab, kan kuŋen kata bukan kukaanut, yo yommuu kulet kayunt káami ló li wahawu wajuul̥imuu li adunaayi inye.

¹² Nan Kilisita anokenumuu ñano ban kale dán ñéyimuu ŋáa’, ájowetumut ló húsim hata hulow li hata ámuuna, bale húsimahu hoola humum ho lájowetume min afakenolaal boot nanoonan li uhoofoolawu woololaal.

¹³ Li mal̥egenamu, húsimahu hata kulowaku li hata kúmuunaaku, mantee foof kábunfaaku kata sibaasu san kúsulemuu kan kuŋalemuu kúyu li bukanabuku kakaanumuu kahoofoo, bájum kahoofoolaku li kúfu’ li siniilasu sooliil, min kulako bukan kasete.

¹⁴ Fan wahawu unwu usetene bukan kahoofoole kama háŋum húsimahu hata Kilisita! Li mal̥egenamu, Kilisita lájowunjowum li Buyinumabu baano tomuu boot nanoonan, min asenoolo okila humumool batilut tanootan loon esalah Ateemit. Húsimahu hoola li huseten uyinumawu woololaal li makaane manooman majakut, min uyiliyaal ulokaal boot li Ateemit aloŋumuu.

¹⁵ Wahawu unwu újimuu Kilisita li áami li tutoo húfaalum huwunkul, bájum bukanabuku kan Ateemit ahooñumuu, li kuyili kuyab wahawu wajakaawu wáami tomuu boot nanoonan wan alobumuu kasen bukanabuku koola. Kuyilo kubaj wo, mata babbaj to eket yata an yájimuu bukanabuku li kuyili kufak li uhoofoolawu wooliil wan kukaanumuu li húfaalumahu hútinaalahu.

¹⁶ An alobumuu kulim kata wahawu wan afañumuu min ubaj okila bakete ban li akiic ko akat to, tootook min híis kaanaku anawu ummu lakeeket tówum wahawu wan afañumuu ubaj.

¹⁷ Li mal̥egenamu, kulim kan an akiice min alob waa lafañumuu min ukaani okila bakete, wahawu wan alobumuu let uyili ukaani anawu ummu okila li buloŋ. Nan anawu ummu ammuu li aket, no wahawu wan afañumuu min akaani, wommuu li uyili ukaani loon alobumuu.

¹⁸ Wahawu unwu újimuu húfaalumahu hútinaalahu huyilaat hubaj, húsim báyuwowut.

¹⁹ Nan Móyiis ayiiŋenumuu hákil ésukayi feh uŋoonawu feh loon eluwaayi elobumuu aban, li aŋa’ húsim hata bámuuna, [li hata kulow], li mal li búgit bájunke ban, li aŋa’ jaan jata anuunuken an koone isof, min áyisen éliibalayi yata eluwaayi li ésukayi feh.

²⁰ Ban li aan ésukayi: «Laale húsimahu hata húfaalumahu han Ateemit aanuulumuu jijok jak.»

²¹ Móyiis li aŋa’ húsimahu áyisen foof li kayuntaku li wahawu feh wan kuŋalemuu min kulok boot li Ateemit.

²² Loon eluwaayi elobumuu, ebat wahoowah feh li húsim úgiilenewumi, ban uhoofoolawu uyilaat ubonketi húsim báyuwowut.

Eketayi yata Kilisita li ekuluwaayi, yo éfulenemuu uhoofoo

²³ Tookumuu min wambuwawu unwu wata mal̥egenamu mammuu li emitayi úgiilenumi li usila loon muñowu, kama mal̥egenamu humum mo mammuu li emitayi moote múgiilenumi li usila wahaŋe majak unwu.

²⁴ Li mal̥egenamu, Kilisita anokenut li eluuf yata Ateemit yan kuŋen kata bukan kuteefe. Eluufayi inyu elakolako kambu bale kata eluufayi yata mal̥egen yata Ateemit. Kilisita lanokennoken li emitayi humum yo, ajow alako muñeˈe hákil Ateemit boot kalambenolaal.

²⁵ Alámbaawu áamakawu ata kusuwifaku lanokenenoken li eluufayi yata Ateemit li húsim ló hata énuukuleŋ. Bale Kilisita anokenut ló ajow asenoolo okila humumool ñameeŋe alako esalah.

²⁶ Letumuu mo, kama fan álaameen ñameeŋe kábilum nan adunaayi ejuul̥imuu. Li mal̥egenamu, Kilisita lálaŋuulaŋul ñano ban kale muñeˈe, nan adunaayi ebanumee, boot kasenoolo okila humumool loon kasila, boot káfulen kahoofoolaku.

²⁷ Emmuu ál̥ahukowan ñano bale láami li aket, fúlum tómuu Ateemit li atiibool,

²⁸ mo foof Kilisita asenoolomuu ñano bale, alako esalah boot káfulen uhoofoolawu wata bukan kameeŋe ŋáa’. Fan abil álaŋul búl̥ubut, ban inti boot káfulen uhoofoolawu, bale boot kafaken bukanabuku kammuu li kakob élaañulayi yoola.