Eébulo 8 - Jola-Kasa

Yéesu ammuu álambaawu oololaal áamakawu

¹ Hulimahu hahaŋumuu kaaku feh kalobimuu, ho hommuu unhe: lubajaale álamba áamak loon ummu. Lababbah li emitayi kaŋen káli efenjeŋayi yata jáyiiyaju jata Ateemit.

² Okila ummu li kakaan bulokabu boola li eluufayi yáñeyimuu. Eluufayi inyu yo yommuu kayuntaku kata mal̥egen kan Amaaŋenawu akaanumuu, inti an akaan ko.

³ Li mal̥egenamu, álamba áamak anoowan lakaanikaan to boot kasen busuuhen li kakaan kasila, wahawu unwu újimuu álambaawu oololaal áamakawu laate foof abaj wah wan aate asen.

⁴ Aameenumuu baabe li etaam, let alakoween álamba maayeet, mata baje ban élamba yasenemuu busuuhen loon eluwaayi yata kusuwifaku elobumuu.

⁵ Bulokabu ban élambaayi inyu ekaanemuu bulakolako buliikoolum, búnokoo bata wahawu wabajumuu li mal̥egen li emitayi. Nokoonokoo loon nan Móyiis alakomuu li akaan kayuntaku, Ateemit li aanool: «Ujuke to min ukaan wahawu feh, unokoo li bukittenoolumabu ban íhiisimuu li huyuuyahu.»

⁶ Bale muñeˈe bulokabu bata Yéesu buhaŋe bata kúlamba kaabuku, mata okila ammuu li tutoo húfaalum hahaŋe majak han Ateemit ajokumuu bukanabuku, ban li huhajo li wah wan alobe kasen wahaŋe majak.

⁷ Li mal̥egenamu, nokooleenumuu loon húfaalumahu hútinaalahu hubajeenut tan hucolut, let tookeen min huban min hakee hubil hulako to.

⁸ Bale Ateemit li awataten bukanabuku koola aaniil: «Jijanten! Kunak kunku li ebil, Amaaŋenawu alob, nan éemi li ijok húfaalum huwunkul, bukanabuku kata Isilayeel li kata Súda.

⁹ Húfaalumahu unhu let hunokoo li han ijokumuu situubayiil sihaan, nan ítukiilumuu li kaŋen min ífulenuliil li etaamayi yata Ejíf. Kujokut húfaalumahu unhu jak, wahawu unwu újimuu ínje li ikatiil bo.» Amaaŋenawu alob.

¹⁰ Amaaŋenawu li afamen aan: «Húfaalumahu han ínje emmuu li ijok kata Isilayeel, nan kunakaku unku kommuu li kuban, ho hommuu unhe: Fan iŋa’ siluwaasu súmbaam ikaaniil li uyinum, ban li iŋa’ so ikiic li sísigilasu sooliil. Fan ilako Ateemit ooliil, buko li kulako bukanabuku kúmbaam.

¹¹ An let laañ jokool min aliiken an an kukine li etaam yano, let aliiken atuyool aanool “Uhaas Amaaŋenawu”, mata buko foofiil feh fan kuhaasom, kítum li ahaŋumuu mañiilo, jow kib li ahaŋumuu mahaano.

¹² Fan ibonket butilaabu booliil, uhoofoolawu wooliil wo fan imojen wo.»

¹³ Ateemit alobumuu mata húfaalum huwunkul, yo yommuu lalaañene hútinaalahu huhaano. Ban wah uhaan ban li uhallen, let fiyo újimum.