Eébulo 7 - Jola-Kasa

Melikisedek áyii li álamba

¹ Melikisedek okila áyii lalakowe ata ésukayi yata Salem li álamba ata Ateemit ata Haatiya tiya. Nan Abulaham alakomuu élaañumul bata hutiikahu han aheekumuu kúyiiyaku, Melikisedek li ajow kufam ban li ásooniyenool.

² Abulaham li asenool bújufabu bata wahawu feh wan áŋalulo bómuu. Kajawaku unku Melikisedek, yo yommuu «Ayíi ata macole». Melikisedek áyii ata Salem foof lalakowe, yo yommuu «Ayíi ata kásuumaay.»

³ An ahaasut atuubawool li jaawool. Abajut kaland. Bajut tan an alobe mata hunakahu hata kabukiyaku koola, mantee foof mata eketayi yoola. Lanokoonokoo li Añiilawu ata Ateemit, ban li áami álamba boot nanoonan.

⁴ Jijuke min jijuk buu Melikisedek áamimuu an áamak, mata min ahaanawu Abulaham asenool bújufabu bata wahawu wahaŋumuu majak wan áŋalumulomuu bata hutiikahu.

⁵ Ban, eluwaayi yata Móyiis yonsoon maayeet bubukoolumabu bata Abulaham boote busen bújufabu bata wahawu feh wan kubajumuu. Koote kusen bo kutuyiil kammuu bañiilabu bata Lebi bammuu élamba.

⁶ Ban maayeet min Melikisedek aletumuu an ata bubukoolumabu bata Lebi, bale Abulaham li asenool bújufabu bata wahawu wan abajumuu. Fúlum tó, Melikisedek li ásooniyen Abulaham an Ateemit alobumuu kasen wah.

⁷ Ban luhaasaale li mal̥egen kaanaku anawu áamakawu okila ásooniyenemuu atitawu.

⁸ Taate, bubukoolumabu bata Lebi, bayabemuu bújufabu bukan koom kayilo kuket, bale Melikisedek lahaŋiil, mata Bakiicelabu bonsoon ummu li buloŋ.

⁹ Bale luyilo oonaal nan Abulaham asenumuu bújufabu Melikisedek, lasenoosen bo áginnoo ló bubukoolumabu bata Lebi bayabemuu bújufabu.

¹⁰ Li mal̥egenamu, maayeet min kite eenimuu nan Melikisedek ajowumuu kufam buko li Abulaham Lebi babukoluti, bale luyilo oonaal kata láala atuubawool ahaan Abulaham lalakowe.

¹¹ Jílambaju jabilummuu li Lebi li jo eluwaayi yata Móyiis, yasenimuu bukanabuku kata Isilayeel, ehajomuu. Ban nokooleenumuu loon élambaayi yabilummuu li kalandaku kata Lebi ekaanenkaan bulok banabe, let tookeen min álamba akee áfulul li kalandaku kata Melikisedek, búti li kalandaku kata Aaloŋ.

¹² Mata li mal̥egenamu jílambaju jíbutoomuu, yo yommuu eluwaayi foof fan ébuti.

¹³ Imban, Amaaŋenawu oololaal an kulimaku unke kulobimuu kuya, okila li kaland kakee láfulumulo, ban bajolut an li kalandaku unku akaane bulokabu bakaaneyimuu li husilaahu.

¹⁴ Li mal̥egenamu, anoowan lahaase aan Amaaŋenawu alobut wahoowah mata élambaayi aya li kalandaku unku.

Alámba akee anokoole li Melikisedek

¹⁵ Wahawu unwe újimuu hulimahu unhe li huhaŋ maweeto: álamba akee áfululo, anokoole li Melikisedek.

¹⁶ Inti li eluwaayi mantee foof li kaŋoon kata an láamum álamba, bale li sembe sata buloŋ bayilaat buban láamum álamba.

¹⁷ Li mal̥egenamu, Bakiicelabu bulollob kaanaku: «Alámba loom boot nanoonan, loon Melikisedek.»

¹⁸ Kaŋoonaku kahaanaku kubajut sembe ban kubajut foof jáliŋ, mó mújimuu li kúbuj ko,

¹⁹ mata eluwaayi yata Móyiis eyilaat ekaan wah min unab. Bale muñeˈe lubajaale kákangum kahaŋe majak, kayilo kújiwolaal li ukoojaal Ateemit.

²⁰ Ateemit humumool lanuunuu nan al̥usumuu Kilisita alako álamba, bale nan kaabuku kujokimuu élamba, Ateemit anuulut.

²¹ Nan Yéesu alakomuu álamba, Ateemit akaanool tomuu lanoosaan: «Injé Amaaŋenawu linuunuu een: “Fan ulako álamba boot nanoonan!” Ban let ílaañul li hulimahu han ilobumuu.»

²² Mó mújimuu foof, li Yéesu lúbajumaalumuu káwoolu kaanaku lubajaale húfaalum li Ateemit hahaŋe majak.

²³ Babbaj bukan kameeŋe kalakowe élamba, mata eketayi éhiliihi kulako to kale.

²⁴ Bale Yéesu okila ummu li buloŋ boot nanoonan, ban li áami álamba boot nanoonan.

²⁵ Wahawu unwu újimuu, layilo afaken ñano ban kale bukanabuku kájowummuu li okila min kukooj Ateemit, mata okila ummu li buloŋ min anaak al̥aw Ateemit boot li bukanabuku umbuku.

²⁶ Yéesu okila ammuu kama álambaawu áamakawu ajakumuu boot li alolaal. Lakankaan an anabe, akaanut majakut ban abajut kahoofoo kanookan. Lagiilooligiiloo li kuhoofoolabuku, ban Ateemit li atebenool boot haatiya ajow akaay emitayi.

²⁷ Yéesu anokoolut li élamba yaayu yáamakayi. Jokutool min akaan hunakoohunak kasila boot li uhoofoo woola li wata ésukayi. Lakankaan mo ñano ban kale nan asenoolomuu okila humumool.

²⁸ Li mal̥egenamu, eluwaayi yata Móyiis bukan kabaje búgootoyiil eŋale ekaan élamba yáamak, bale álambaawu áamum tómuu humum hata hulimahu han Ateemit anuulumuu búsoluma eluwaayi, Añiilawu hukaan to. Okila ammuu álamba áamak anabumuu boot nanoonan.