Eébulo 6 - Jola-Kasa

¹ Wahawu unwu újimuu lootaale ukataal bo wahawu útinaalawu wan uliikenaalumuu mata Kilisita, min útiiwowaal uliikenaal wah wata kunahaan, ban jakum úlaañulaal li wahawu wakilumuu huhaalahu hata baliikenelabu umbu, wammuu: kabet búsol bakaane bajakut, min útiiwo úyinen li Ateemit,

² buliiken mata kábatiise li mata kawalen kuŋen li húkow hata an min l̥aw, mata kayitowul li eketayi li mata batiibabu bata boot nanoonan.

³ Wahawu unwu lóomimuu li ukaanaal, Ateemit okila bafañe.

^4-6 Kama muñeˈe buu éemi li nokoo bukanabuku kalaañumuu li buloŋabu booliil buhaanabu? Kulakowenlako li mawuŋaamu mata Ateemit. Kujakenjaken li kájiyaku kabilumulomuu li emitayi, ban li kubaj jooliil li Buyinumabu Banabaabu. Kujuke buu Hulimahu hata Ateemit húsuumumuu eeno, ban kuhaase mata sembaasu sata adunaayi yammuu li ebil, bale li kulaañ kulo li buloŋabu booliil buhaanabu. Muñeˈe an ayilaat alaañen akaaniil min kútiiwo kuŋa’ buloŋ buwunkul, mata buko kulaañenlaañen kuŋa’ Añiilawu ata Ateemit kujow kubaaŋ li ekuluwaayi, min alaañen ageli hákil ésukayi feh.

⁷ Li mal̥egenamu, etaam ehobumuu mal emitayi balaalene yo ñameeŋe, min banuunuken babaje jáliŋ bul̥iilul li yo boot li bukanabuku kan ewañimuu boot li buko, Ateemit fan ásooniyen etaamayi inyu.

⁸ Bale unuunuken wata újenkuun li banuunuken bata úbuja bul̥iilulumuu li yo, ebajut jáliŋ. Ateemit fan áfaahen etaamayi inyu, ban fan ebil ésuli.

⁹ Kútuyoli kan jiboolaat, maayeet min áloli jilobemee loon muñeˈe, híitolihiit kaanaku bukuluul jumbuku li bútinabu bajakaabu, bammuu bata kafakaku.

¹⁰ Li mal̥egenamu, Ateemit alet Ateemit acolut. Let amojen wahawu wan bukuluul jikaanumuu, let amojen foof húbooliyahu han jíhiisoolumuu li bulokabu ban jikaanumuu boot li bukanabuku koola, ban jiloŋumuu foof li jikaan boot muñeˈe.

¹¹ Bale áloli jifañeene min anoowan li bukuluul abaj káyikil̥owaku kanolaku boot yok li húbanumahu, bájum wahawu wan jíkangummuu lí wó li ubaj boot to.

¹² Jakum kahankenaku kooluul kúyaakulo, bale jiliikoo li bukanabuku káyinenumuu ban li kuhanken, li kuyab wahawu wan Ateemit alobumuu kasen.

Ateemit fan akaan wahawu wan alobumuu kakaan

¹³ Li mal̥egenamu, nan Ateemit aanumuu fan asen Abulaham wahawu wan alobumuu kasenool, lanuunuu li kajawaku koola okila humumool, mata bajut an ahaŋool an aate anuulum li kajawaku kata anawu ummu.

¹⁴ Li aan: «Manooman, fan ísooniyeni ŋáa’, ban fan ikaan min bubukoolumabu booli bumeeŋ ŋáa’.»

¹⁵ Mal̥egen Abulaham li ahanken min akob, li abaj wahawu wan Ateemit alobumuu kasenool.

¹⁶ Bukanabuku kunuulumuu, li kunuulum li kajaw kata an ahaŋiil, ban hunuulahu unhu han kunuulumuu fan húji let baj búceeŋoo banooban.

¹⁷ Muñowu Ateemit afañumuu min áhiis haŋ maset bukanabuku kammuu li kubaj wahawu wan alobumuu kasen, kaanaku wahawu wan akila alobumuu an ayilaat wó áfulen. Wahawu unwu újimuu li anuu afamen to.

¹⁸ Mo emmuu baje wah úl̥uba wan Ateemit akaane: wahawu wan alobumuu kasen, li hunuulahu han anuulumuu. Wahawu unwu úl̥uba an ayilaat wo áfulen mata Ateemit ayilaat ámal. Wó újimuu li ubajaal kawankulen kabaje sembe, alolaal akataal bomuu waholaal feh min ujokaal li kákangumaku kan kusenolaalumuu.

¹⁹ Kákangumaku unku kunokoonokoo li alolaal loon hulankalahu hata yaalayi yoololaal. Kubabbaj sembe ban li kulit, ban li kunoken boot kata láala hufalalahu hata eluufayi yata Ateemit.

²⁰ Dó úndu Yéesu ajandolaalumuu ajow, anokenumuu boot li alolaal, ban li alako álamba áamak loon Melikisedek, boot nanoonan.