Eébulo 5 - Jola-Kasa

¹ Li mal̥egenamu, álamba áamak anoowan al̥usumi li bukan, lal̥usil̥us min akaan bulok bata Ateemit boot li bukanabuku umbuku. Fan áhiis Ateemit wahawu wan kusenumuu li usilaawu wooliil boot mata uhoofoolawu.

² Alámbaawu áamakawu layilo ánaanum bukanabuku kahaasutumuu wahoowah li kájimumuu, mata akila humumool lágootogooto.

³ Búgootowabu boola umbu bújimuu láati áfulen kasila boot li uhoofoolawu, ban inti boot li uhoofoolawu wata ésukayi bale, bale foot li woola akila humumool.

⁴ Ban, an ayilaat asenoolo kasalaku unku kata kalako álamba áamak. Ateemit akila ahooñemuu an boot li bulokabu umbu, loon ahooñumuu Aaloŋ.

⁵ Kilisita humumool foof asenoolowut kasalaku unku kata kalako álamba áamak, bale li Ateemit láyabum kó, aanoolumuu: «Awu ommuu Añoolom; Hunakahu hata síyaat ínje emmuu Atuubayi.»

⁶ Ateemit li alob tikee foof aan: «Awu álamba loom boot nanoonan loon Melikisedek.»

⁷ Nan Yéesu alakomuu li buloŋ baabe li etaam, lanaanaak al̥aw ban li ayaakoo Ateemit li sikaaw butiya li muhuu ló. Lakankaan mo mata Ateemit ayiliyeenumuu afakenool li eketayi. Ateemit li ayab kal̥awaku kata Yéesu mata látuulootuul.

⁸ Maayeet min Yéesu ammuu Añiilawu ata Ateemit, bale li aliikenum kátuul li wahawu feh wan álaamumuu.

⁹ Nan Yéesu ajeˈe áliiŋumuu jak, li áji bukanabuku feh kátuuloolumuu li kufak boot nanoonan.

¹⁰ Ateemit li akaanool alako álamba áamak loon Melikisedek.

Lootaale ankaal li káyinenaku koololaal

¹¹ Mata hulimahu unhu, áloli jibaje wah wameeŋe elob to, bale séngisengi min jikittenuul, mata bukuluul jihilut kánaanum wah.

¹² Li mal̥egenamu, fiyowe nan bukuluul jooteen jilako kuliikena bukan wah, bale bukuluul loŋe li jokuul min an alaañen aliikenuul wahawu útinaalawu wata kulimaku kata Ateemit. Muñeˈe tan bukuluul jommuu, jokutuul li búkuumenuma bal̥aal̥e, bale miil jokuul li mo.

¹³ An áloŋume miil, ahaasut wahoowah mata hulimahu halobumuu mata macolamu, mata kafooceek laam.

¹⁴ Bale búkuumenum bal̥aal̥e, bo bata kunahaan, kan uhaasumuu oon li bakaaneliil kuyilo kulaso min kuhaas wahawu wajakumuu li wajakutumuu.