Eébulo 4 - Jola-Kasa

¹ Ateemit lalobolaalob kaanaku luyiliyaale ubajaal kayool̥owaku kan afalemuu boot li alolaal. Kayool̥owaku unku kan alobolaamuu mata ko, laloŋe li átuk tó. Kama lootaale ujukelaal to jakum bil an li bukuluul ayinoo li aan kayool̥owaku unku kufakoofak.

² Li mal̥egenamu, alolaal luyabaayab Hulimahu Hásuumaahu hata Ateemit, loon foof bukanabuku kalakomuu li kayiinaayaku kuyab homuu. Bale hulimahu han kujamumuu, hubajut li buko jáliŋ yanooyan, mata nan kujam homuu kuyabut ho li káyinen ló.

³ Alolaal jáyinenaalumuu, fan ubajaal kayool̥owaku kan Ateemit aanumuu: «Nan iwuñetumuu, linuunuu een: “Let kunoken li etaamayi dán ilobumuu kakaaniil kuyool̥o.”» Lalollob loon muñaˈa, bulokabu boola bo bafin min bubane yaan no nan ajuul̥umuu adunaayi.

⁴ Li mal̥egenamu, lollob tikee li Bakiicelabu mata hunakahu hutoken li húl̥ubutahu kaanaku: «Ateemit li ayool̥o li hunakahu hutoken li húl̥ubutahu okila bakaane bulokabu boola feh.»

⁵ Li kulaañen kulob li hulimahu hanolahu koon: «Let kunoken li etaamayi dán ilobumuu kakaaniil kuyool̥o.»

⁶ Bukanabuku kajandumuu kujam Hulimahu Hásuumaahu, kunokenut li etaamayi dán Ateemit alobumuu kakaaniil kuyool̥o, mata kútuulutool. Bale boot yok muñeˈe, baje kukee kayilo kunoken dán Ateemit afaleyiilumuu kayool̥o.

⁷ Mó mújimuu, Ateemit li alaañen ajok hunak hukee haaneyi «Síyaat». Muñeˈe li bil fiyo, li ájowum li áyiiyawu Dayit min alob hulimahu unhe han ulobeenaalumuu mata ho ubanaal: «Síyaat, jijamumuu hulimahu hata Ateemit, jakum jil̥aal̥en uyinumawu wooluul.»

⁸ Li mal̥egenamu, nokooleenumuu loon Sósuwe lájowetunjowetum bukanabuku kata Isilayeel dán kufaleyiilumuu kayool̥owaku unku, Ateemit let alobeen mata hunak hakee, ló bafiyowe.

⁹ Kama baje kayool̥o loon kata hunakahu hutoken li húl̥ubutahu kaano to boot li bukanabuku kata Ateemit.

¹⁰ An anokenumuu dán Ateemit afalemuu kayool̥owaku, anawu ummu fan abaj kayool̥o li bulokabu boola loon foof Ateemit humumool ayool̥omuu li boola.

¹¹ Mó mújimuu, lootaale kama ukaanaal wahoowah min ubajaal kayool̥owaku unku, jakum bil an li alolaal alo, okila banabe li bukittenoolumabu bata bukanabuku kátuulutumuu Ateemit.

¹² Li mal̥egenamu, Hulimahu hata Ateemit hulonloŋ ban li hubaj sembe. Huhaŋe mañek ékundu yanooyan. Fan hunoken boot yok kata láala hujow húgaatuloo yaalayi li buyinumabu, síŋullumasu li múgundamu, ban li hutiib kásiibowaku li uyinoolawu wata buyinumabu.

¹³ Bajut búwuwenum ban Ateemit ayilaat ajuk. Wahawu feh úhimulohimulo ban li uweeteni hákilool, ban anoowan li alolaal fan abil alob asenool mata wahawu feh wan akaanumuu.

Yéesu ammuu álambaawu áamakawu abajutumuu kahoofoo

¹⁴ Emmuu lubajaale álamba áamak abaje sembe, ajowumuu boot li emitayi, ammuu Yéesu Añiilawu ata Ateemit, kama útukaal lit káyinenaku kan ulobaalemuu mata ko.

¹⁵ Lubajaale álamba áamak ahaase mata búgootowabu boololaal. Li mal̥egenamu, álambaawu oololaal labuutoolibuutoo li wahoowah feh loon alolaal, bale akaanut kahoofoo.

¹⁶ Lootaale kama ukoojaal li káwoolu ló, efenjeŋayi yata kájiyaku yata Ateemit, mantee li ubajaal káyiyen li káji, ban li ubajaal kalamben nan emmuu jokolaal li ko.