Eébulo 3 - Jola-Kasa

Yéesu lahaŋe Móyiis

¹ Kutuyom, mó mújimuu bukuluul jammuu bukan kanabe, ban Ateemit li ahooñuul, joote jijuke li Yéesu ammuu anawu an Ateemit áboñulumuu li Alámbaawu áamakawu ata káyinenaku kooluul kan ulobaalemuu mata ko.

² Li mal̥egenamu, Yéesu lakankaan wahawu feh loon Ateemit al̥usoolumuu afañumuu, loon foof Móyiis akaan nomuu li eluufayi [feh] yata Ateemit.

³ An ateefumuu eluuf, anawu ummu fan ahaŋ maluukeni eluufayi humum yo. Mó mújimuu, Yéesu li atook min máyiineniyamu moola muhaŋ mata Móyiis.

⁴ Li mal̥egenamu, eluuf yanooyan ebaje an ateef yo, bale anawu ateefumuu wahawu feh, okila ammuu Ateemit.

⁵ Móyiis okila lakankaan li mal̥egen wahawu feh loon Ateemit afañumuu li eluufayi yoola, loon alakomuu aloka áami li alob wahawu wan Ateemit ammuu li abil álobul.

⁶ Bale Kilisita lakankaan wahawu feh wan áatimuu akaan, loon ammuu Añiilawu an kukatumuu eluufayi yata Ateemit aaken. Ban alolaal oomaalumuu eluufayi yata Ateemit, nokoomuu loon lútukaatuk jak li káwooluwaku li kákangumaku kan súumolaamuu li ko.

Kayool̥owaku kata bukanabuku kata Ateemit

⁷ Wahawu unwu újimuu, loon Buyinumabu Banabaabu bulobumuu: «Síyaat, jijamumuu hulimahu hata Ateemit,

⁸ jakum jil̥aal̥en uyinumawu wooluul, loon nan situubawuul sihaan sihoy nomuu bátuul Ateemit, nan kuyooboolumuu li kayiinaayaku min kujukum li akila.

⁹ Ló li kayiinaayaku, situubawuul sihaan siyoobonyoob min sijukum lí ínje, ban kujuke wahawu wan ikaanumuu li simit soono kúyii kúl̥uba.

¹⁰ Wahawu unwu újimuu li iwuñeteen bukanabuku umbuku, min een no: “Uyinumawu wooliil úguuhoweguuho nanoonan. Kúnaanumut wahawu wan ifañumuu min kukaan.”

¹¹ Nan huuñom hulitumuu, li inuu een: “Let kunoken li etaamayi dán ilobumuu kakaaniil kuyool̥o!”»

¹² Kutuyom, jijuke to jakum bil an li bukuluul abaj buyinum baŋooto, báyinenut, baate bukaanool min abet búsol Ateemit aloŋumuu.

¹³ Joote kama jinaak jiwankulenoo nanoonan nan uyiliyaale oonaal «síyaat» yan Bakiicelabu bulobemuu mata yo, bájum jakum an li bukuluul ahoy bánaanum, min akat kahoofoolaku min kubuntool.

¹⁴ Li mal̥egenamu, alolaal kunaboola kata Kilisita loomaal, nokoomuu loon lútukaatuk lit kákangumaku kan ubajaamuu li húkitumahu, boot yok li húbanumahu.

¹⁵ Wahawu unwe Bakiicelabu bulobe: «Síyaat jijamumuu hulimahu hata Ateemit, jakum jil̥aal̥en uyinumawu wooluul, loon nan situubawuul sihaan sihoy nomuu bátuul Ateemit.»

¹⁶ Li mal̥egenamu, bukay kujamumuu hulimahu hata Ateemit ban li kuhoy bátuulool? Inti bukanabuku umbuku buko Móyiis áfulenulomuu li etaamayi yata Ejíf?

¹⁷ Bukay Ateemit awuñetumuu jow baj simit soono kúyii kúl̥uba? Inti bukanabuku kahoofoomuu, ban li kuket li kayiinaayaku?

¹⁸ Kama bukay Ateemit anuulumuu aan let kunoken dán afaleyiilumuu kayool̥o? Inti bukanabuku kátuulutoolumuu?

¹⁹ Ban lujukaale li mal̥egen kaanaku kubilut kuyili kunoken dó humum hata káyinenaatiyaku kooliil.