Eébulo 13 - Jola-Kasa

Buu an ammuu li akaan min ásuum Ateemit

¹ Húbooliwoo hata batuyaaya hoote hulako li bukuluul.

² Jakum jimojen kayab bukan booluul. Li mal̥egenamu, kukee li bukuluul kakaan momuu, kuyayyab booliil emalaka buko bahaasut.

³ Jinaak jiwayil̥o bukanabuku kammuu li hukul̥, loon eenimuu bukuluul humumuul foof, kukul̥ooluukul̥oo li buko. Jiwayil̥o bukanabuku kan kommuu li kálaamen, loon eenimuu bukuluul foof jumbuku li sílaam li siniiluul loon buko.

⁴ Anoowan laate aluuken búyabo. Bukan kayabowe, anoowan li buko laate átij li afaalool. Ateemit fan atiib bukanabuku káfulowe bomuu muñaˈa, li kahintowemuu li bukan kan kuyabowut.

⁵ Jakum efañ sídalam elako li baloŋelabu booluul. Jiluuken wahawu wan jibajumuu, mata Ateemit laane: «Kaan min kaane, let ibeti búsol, let ikati bo.»

⁶ Wahawu unwu újimuu luyilo ulobaal li káwoolu ló oonaal: «Amaaŋenawu, okila abilumuu alambenom, let íkoli wahoowah. Waa ál̥ahukowan ayilo akaanom?»

⁷ Jiwayil̥o kunahaanaku kooluul kata no, kalobuulumuu hulimahu hata Ateemit. Jiwayil̥o buu kuloŋumuu eeno li buu kuketumuu eeno, min jinab li káyinenaku kooliil.

⁸ Yéesu Kilisita, okila anolawu huken, síyaat ban boot nanoonan.

⁹ Jakum jikat baliikene banooban babilumulo tíyaŋ, min bújimenuul. Jaajak min kájiyaku kata Ateemit kuliten buyinumabu booluul, bale let uŋoon wata mata mutiñaay, wabajutumuu jáliŋ yanooyan boot li bukanabuku kanabemuu li wo.

¹⁰ Elámbaayi yalokemuu li kayuntaku káñeyimuu kata kusuwifaku, kubajut kakaañen min kutiñ wahawu wasilayimuu li husilaahu.

¹¹ Alámbaawu áamakawu fan aŋa’ húsim hata sínuukuleŋ ájowetum dán haŋumuu máñeyi li kayuntaku boot kabonket uhoofoolawu, bale sínuukuleŋasu san kusilamuu, so li kuŋa’ so kujow kúsu’ tíyaŋ ésukayi.

¹² Wahawu unwu újimuu, Yéesu foof li aket tíyaŋ ésukayi, bájum li aŋa’ húsimahu hoola humum ho min akaan bukanabuku kulako bukan kanabe.

¹³ Lootaale kama úfulaal ujaˈaal ufamaal li okila tíyaŋ ésukayi, min utebaal ñisuuwañu ñoola ugalowaal.

¹⁴ Mata ubajutaal li etaamaye bukin bata kale, bale bukinabu bammuu li ebil luŋesaale li bo.

¹⁵ Ujówumaal li Yéesu Kilisita min unaak ukaanaal nanoonan Ateemit kasila kata ukijen wata kasalool, yo yommuu ukijen wáfulumulo li utumolaal min ulobaal mata kajawaku koola.

¹⁶ Jakum jimojen kakaan majake, li kalambenoo, mata kasila loon unku kúsuumumuu Ateemit.

¹⁷ Jítuul kunahaanaku kooluul, ban koonuulumuu jikaan wah, li jikaan wo loon kulobuulumuu. Li mal̥egenamu, buko kommuu li kafooyuul, mata Ateemit fan abil agel̥l̥eniil mooluul. Jikaan manooman mantee li kuyili kukaan bulokabu booliil li ésuumansuum ló, bale inti li jíl̥okoo ló, mata kukaan momuu let lambenuul maayeet.

¹⁸ Jinaak jil̥aw boot li áloli. Alóli jíwooluwe kaanaku jibabbaj buyinum basete, mata jifañe min jiloŋ buloŋ bajake li wahoowah feh.

¹⁹ Injé ummu li kayaakuul min jil̥aw, mantee Ateemit li álaañenulom li mahile boot booluul.

Kal̥aw

²⁰ Ateemit ata kásuumaay, layitenuuyitenul Amaaŋenawu hata boot nanoonan.

²¹ Ateemit ajow akaanuul min jiyili jikaan wahoowah feh wajake, mantee li jikaan loon afañumuu. Ajow ájowum li Yéesu Kilisita akilimuu máyiineniyamu boot nanoonan, min akaan li ololaal wahawu wásuumoolumuu. Aameen!

²² Kutuyom, ínje ummu li kal̥awuul min jibeben beb min jijanten kulimaku unke kammuu kata kawankulen. Ban fimaa kulim katoge likiiculuul.

²³ Jihaas kaanaku atuyolaal Tímote kukatenookaten. Alíiŋulaalimuu, fan ibil ijukuul li akila ló.

²⁴ Jisaafom kunahaanaku kooluul feh, li bukanabuku feh kata Ateemit. Kutuyolaal kammuu li etaamayi yata Itali kusaafuluul.

²⁵ Kájiyaku kata Ateemit kujow kulako li bukuluul foofuul feh.