Eébulo 12 - Jola-Kasa

Uŋalaal sítiijolaal feh ukaanaal li Yéesu

¹ Alolaal humumolaal foof, emmuu lubajaale bukan kameeŋe ŋáa’ káguutolaal ban li kóomi bukittenoolum humum hata káyinenaku kooliil, kama lootaale uhoyaal búteb banooban bayilo búhilolaal újowumaal, háŋum kahoofoolaku kahulutumuu li kugolenolaal, min uhankenaal min uteyaal eteyayi yan koonolaamuu uteyaal.

² Uŋalaal sítiijolaal feh ukaanaal li Yéesu, ájimuu li ubajaal káyinen ban li ajow li ko boot to. Lakaakat bo ésuumansuumayi yan áatimuu abaj, min aan éehe’ min aket li ekuluwaayi bajukelut li ñisuuwañu ñáamimuu li eket loon inyu. Muñeˈe okila ummu min abahe kaŋen kúli efenjeŋayi yata jáyiiyaju jata Ateemit.

³ Jiyinoo sílaamasu san Yéesu ámuñumuu li kuŋen kata kuhoofoolaabuku, jakum bil jiyok min jíyeko.

⁴ Li bútajabu ban jommuu li bo li kahoofoolaku, jitajolut jijow jiyok jiket.

⁵ Ban jimojemmojen kulimaku kata Ateemit alobuulumuu min awankulenuul loon bañoolool: «Añoolom, jakum ubes kacolen kan Amaaŋenawu acoleni, jakum awatateni, li úyeko.

⁶ Mata Amaaŋenawu lacolenecolen an an ábooliye, Li atek an an ajoke loon añoolool.»

⁷ Jímuñ sílaamasu san Ateemit akaanuulumuu boot kacolenuul. Ateemit lajokuujok loon bañoolool. Li mal̥egenamu, añiil ayi atuubawool ácoleneliit?

⁸ Ateemit acolenutuulumuu loon acolenemuu bañiil baabu feh, kama jilet bañiil bata mal̥egen, bale bañiil babuki tíyaŋ joom.

⁹ Situubawolaal sabukolaalumuu, sinaanaak sicolenolaal ban li unaak útuulaaliil, háŋum Ateemit Atuubawolaal ata haatiya. Lootaale kama uhaŋaal mátuulaalool min ubajaal buloŋ.

¹⁰ Li mal̥egenamu, situubawolaal unsu sinaanaak sicolenolaal hin fiyo jatit bale, loon kuyinoomuu li koon jaajak, bale Ateemit okila lacolenewolaacolen boot li majakaamu moololaal, bájum li akaanolaal ulakowaal bukan kanabe loon okila.

¹¹ Nan ommuu li ulakowaali kacolen, no unnu fan kaanolaal buyina, bale let nokoololaal loon ésuumansuum, bale fiyomuu, bukanabuku kan kucolenumuu loon muñaˈa, fan kujuk koon majakaamu mata kacolenaku unku, mo mommuu kásuumaay li buloŋ bacole.

Kasen kulim li kasaaboo

¹² Jíl̥aalul kuŋenaku kooluul kayokumuu, ban li jiliten kújuulaku kooluul kateelenemuu.

¹³ Jikaan útin wacole boot li kootaku kooluul, jakum bil anawu akajumuu ahaŋ makaj, bale min alako jak.

¹⁴ Jiŋes min jibaj kásuumaay li bukanabuku feh, ban li jiloŋ buloŋ banabe. Jikaanut momuu, anoowan li bukuluul let ajuk Amaaŋenawu.

¹⁵ Jijuke to jakum bil an li bukuluul áfu’ li kájiyaku kata Ateemit. Jijuke to jakum bil an li bukuluul anokoo loon anuunuken átaliye, al̥iilulo li bukuluul min asik huwoogahu hooluul.

¹⁶ Jíkaanum, jakum baj an li bukuluul áfulowe li aletalet mantee foof an ákaanumut wahawu wáñeyimuu wata Ateemit, loon Esáyii an hutiñ ñano bale hújimuu li aŋa’ huhaanaahu hoola hata añiil átinaa anoomen.

¹⁷ Jihaase joon nan jeˈe fiyomuu, Esáyii li afañ min Atuubawool ásooniyenool, bale abajut kásooniyenaku. Abajut bútin baate bújiwool li ayili áfulen wahawu wan akaanumuu, maayeet min aŋesumuu kásooniyenaku li muhuu ló.

¹⁸ Li mal̥egenamu, bukuluul inti wah wan an ayilo ago’ jilohe, inti sambun sátife, inti emooc, inti foof élim, inti búlus,

¹⁹ inti kal̥ok kata kasiin, inti foof kajiil kata hulim. Nan kata Isilayeel kujamumuu kajiilaku unku kata hulimahu, li kuyaakoo Ateemit jakum bil alaañen alobiil hulim hakee afamen to.

²⁰ Li mal̥egenamu, kata Isilayeel kuyilaat kúmuñ hulimahu unhe: «Anoowan ammuu li ago’ huyuuyahu maayeet énuukuleŋ, fan kutekool kuyitik kumuk.»

²¹ Wahawu wan kujukumuu li úkoyileni gay Móyiis li aan: «Líkolikoli gay li inaak iteelen.»

²² Bale bukuluul jijowujow jikooj huyuuyahu hata Siyoŋ, li ésukayi yata Ateemit aloŋumuu. Yo yommuu Yeelusalem yammuu li emitayi, dán kumalaka kameeŋe mameeŋ kubaje huwoog hata kagaan.

²³ Bukuluul jijowujow jikooj foof huwoogahu hata bañiilabu bátinaalabu, ban ujawawu wooliil ukiicimuu li emitayi. Jikokkooj Ateemit ammuu atiibaawu ata bukanabuku feh li ata uyinumawu wata kacolumuu, kajeˈe kukaanumuu bukan kúliiŋe.

²⁴ Bukuluul jijowujow jikooj Yéesu ammuu li tutoo húfaalumahu huwunkulahu han Ateemit ajokumuu li alolaal. Húsimahu hoola háyuwimuu huhaŋe malob jak hata Abel.

²⁵ Jijuke to, jakum jihoy bajanten ammuu li elob li bukuluul. Li mal̥egenamu, bukanabuku kahoyumuu bajanten anawu anaake alobiilumuu akat to nan kulakomuu li etaam, kufakut li katekaku, háŋum alolaal. Ubetaalumuu búsol anawu álobumulemuu li alolaal li emitayi, let ufakaal foof li katekaku.

²⁶ Naanaŋ, hulimahu hata anawu ummu hukankaan no etaamayi feh élilliŋoo, bale muñeˈe wahawu unwe lalobe kakaan: «Fan ilaañen ílilliŋen etaamayi, ban inti yo bale yo, emitayi foof.»

²⁷ Kulimaku unke «Fan ilaañen» kúhihhiis kaanaku wahawu wáwuwenimuu fan úlilliŋeni ban fan ubil újim, min wahawu wayilaatumuu úlilliŋeni bale usaŋo to.

²⁸ Emmuu jáyiiyaju jan ubajaalumuu jiyilaat jílilliŋoo, kama útukaal kájiyaku unku lit. Li kájiyaku unku lommuu ukaanaal boot li Ateemit bulok básuumool, li kaluuken ban li ekole ló.

²⁹ Li mal̥egenamu, Ateemit oololaal sambun saleemene laam.