Eébulo 11 - Jola-Kasa

Bukittenoolum bata bukan kabaje káyinen

¹ Káyinen ko kommuu káwoolu kaanaku lubaje wahawu wan úkangummuu oon fan ubaj wo. Ko kommuu káhiis kaanaku wahawu wájukeliitimuu ubabbaj li mal̥egen.

² Káyinen kújimuu bukanabuku kata naanaŋ li kubaj buloŋ básuume Ateemit.

³ Káyinen kújimuu li únaanumaal kaanaku adunaayi li Hulimahu hata Ateemit ejuul̥umi, min lako wahawu wajukeyimuu li wah wájukoliiti úkaanumi.

⁴ Káyinen kújimuu Abel li akaan Ateemit kasila kahaŋe majak kata Kayeŋ. Káyinenaku unku kújimuu Ateemit li ajokool an acole, mata Ateemit humumool layayyab usuuhenawu wan asenoolumuu. Káyinenaku unku kújimuu Abel li aloŋ li álobul, maayeet min aketumuu.

⁵ Káyinen kújimuu Enok li ájowetumi boot li emitayi, jakum bil ahaas mata eket. An alaañenut ajukool mata Ateemit laŋalooŋa’ boot boola. Li mal̥egenamu, Bakiicelabu bonsoon Enok lásunsuum Ateemit tówum ájowetumi boot li emitayi.

⁶ An ayilaat ásuum Ateemit okila babajut káyinen. Li mal̥egenamu, an afañumuu min aloh Ateemit, laate áyinen kaanaku Ateemit lababbaj, ban li ahaas aan lasuuhenesuuhen bukanabuku kammuu li huŋesahu hoola.

⁷ Káyinen kújimuu Nówe li ajanten kulimaku kan Ateemit aloboolumuu ákibben mata wahawu wajukolutimuu. Li akaan to buyinumool li kulimaku kan Ateemit aloboolumuu, min akaan busaana báamak dán áfakenummuu butoŋabu boola foof bo feh. Muñowu láhiisummuu kaanaku adunaayi ekajenkajen, ban Ateemit li ajokool an acole humum hata káyinenaku koola.

⁸ Káyinen kújimuu Abulaham li átuul nan Ateemit ahooñoolumuu boot áfu’ li ésukayi yoola, min ajow boot li etaamayi yan ammuu li asenool akil. Abulaham li ajow okila bahaasut bay lajeˈe boot.

⁹ Káyinen kújimuu Abulaham li aloŋ loon ajawoola li etaamayi yan Ateemit alobumuu kasenool. Li akin li káfooyum li Isaak li Sakob ló, kan Ateemit alobumuu kasen wahawu wanolawu.

¹⁰ Abulaham kakob lalakowe ésukayi yabajumuu kuteef kuleeteema kalite malit, yan Ateemit humumool áami agangaawu li ateefaawu ata yo.

¹¹ Káyinen kújimuu Saala li ayili abaj añiil, maayeet min ahallenumuu, mata lajoojok kaanaku Ateemit alobumuu kasenool añiil, aanumuu fan akaan wah, fan akaan wo.

¹² Mó mújimuu, an ano ammuu Abulaham, okila bahallene ajow boot aket, abukumuu bukan kameeŋe loon bawuutabu bammuu li emitayi, kan an ayilaat acob loon mul̥uyisamu mammuu bata katantaku kata halahu.

¹³ Li káyinenaku bukanabuku umbuku feh kúketummuu buko bayabut wahawu wajakaawu wan Ateemit alobumuu kasen, bale kuŋandeŋŋanden wó lóyi min kusaaf wo bo. Kuhahhaas koon buko kujawoola koom li kuñaahoola li etaamaye.

¹⁴ Bukanabuku kalobemuu loon muñaˈa, kúhihhiis set kaanaku huŋes etaam yaani yooliil kóomi li ho.

¹⁵ Kuyinooleenumuu mata etaamayi ban kúfulumulomuu, kuyiloweene kulaañ boot bo.

¹⁶ Li mal̥egenamu, muñeˈe etaam yahaŋe majak kúsiibowe li yo, yo yommuu yata li emitayi. Wahawu unwu újimuu Ateemit asuuwut min kuhooñool Ateemit ooliil, mata lakankaan ésuk akat to boot li buko.

¹⁷ Káyinen kújimuu Abulaham li aŋa’ Isaak boot asila, nan Ateemit ayooboolumuu min ajuk. Mal̥egen Abulaham li alako li asila añoolool anolawu Isaak, imban Ateemit lalobeenoolob kaanaku fan asenool wah.

¹⁸ Ateemit lansaan Abulaham: «Li Isaak lóotummuu ubaj bubukoolumabu ban ilobumuu kaseni.»

¹⁹ Bale Abulaham lansaan li buyinumool Ateemit layilo ayitenumul Isaak li eketayi. Wahawu unwu újimuu Ateemit li alaañenool añoolool, min nokoo loon li eketayi layitowumulo.

²⁰ Káyinen kújimuu Isaak li ásooniyen Sakob buko li Esáyii boot mata wahawu wammuu li ubil ubaj.

²¹ Káyinen kújimuu Sakob li alehen eket, li ásooniyen anoowan li bañiilabu bata Suseef. Li ál̥it ban hunukahu hoola húbanummuu min amanen Ateemit.

²² Káyinen kújimuu Suseef li alako li aket, li alob kaanaku kata Isilayeel fan kubil kúfu’ li etaamayi yata Ejíf, ban li alob foof buu kommuu li kubil kukaan bujoyiseelabu boola.

²³ Káyinen kújimuu Móyiis li abuki, sibukoolaasu soola li siŋalool siyog jow baj kul̥eeñ kúhaaji. Kujuujuk kaanaku lakankaan añiil ajake, mó lí múji kúkoliwut bahuusul wahawu wan áyiiyawu alobumuu.

²⁴ Káyinen kújimuu nan Móyiis ajeˈe ankumuu, li ahoy min aani añiil laam ata ásungutaawu ata áyiiyawu ata Ejíf.

²⁵ Li ahaŋ mafañ min kúcoocikoolool li bukanabuku kata Ateemit, min akat bo buloŋabu básuumaabu bata kahoofoo baatutumuu bufiyo.

²⁶ Li ajok li buyinumool kaanaku, kubesoolumuu loon kubesumuu Kilisita, láalu hubaj hahaŋe maluuk hubajahu feh hata etaamayi yata Ejíf, mata laŋaŋŋa’ sítiijool feh akaan li busuuhenabu ban Ateemit ammuu li abil asenool.

²⁷ Káyinen kújimuu Móyiis li áfu’ li etaamayi yata Ejíf, bákoliwut etindihuuñayi yata áyiiyawu. Li átuk lit loon eenimuu lajuujuk Ateemit ájukeliitimuu.

²⁸ Káyinen kújimuu li akaan kagaanaku kata Faakayi, ban li alob min kuŋa’ húsim kúki’ li wámbiilawu wata siluufasu, jakum bil amalakaawu ata eketayi amuk bañiilabu báyinaabu bútinaalabu bata kata Isilayeel.

²⁹ Káyinen kújimuu kata Isilayeel li kújowum li koot kulimb Halahu Hájunkaahu loon eenimuu li etaam yasaye.

³⁰ Káyinen kújimuu huteefahu hata ésukayi yata Séliko li hulo, kata Isilayeel buko baŋoloole ho jow baj kunak koono hutok li kúl̥uba.

³¹ Káyinen kújimuu Lahab, anaake áfulomuu li aletalet, aketoolut li bukanabuku kátuulutumuu Ateemit, mata layayyab li kásuumaay bukanabuku kajowumuu kujukul etaamayi.

³² Waa leete ilaañen ilob? Let ibaj taŋ min ilob mata Sedeyoŋ, mata Balak, mata Samusoŋ, mata Sefute, mata Dayit, mata Samiyeel, li foof mata kufulofetaku.

³³ Káyinen kújimuu bukanabuku umbuku li kuheek kúyii kameeŋe, li kukaan wah wacole, ban li kubaj wahawu wan Ateemit alobumuu kasen. Li kubab utum wata síŋaŋ,

³⁴ li kuhok sambun sabaje sembe, li kufak li eket yata síkundu. Kúgootoyengooto bale li kubil kulako bukan kata sembe. Li kulako kúl̥ank li hutiik, ban li kuyintoo kutiika káami ejawoola booliil.

³⁵ Li kulaañen kanaale kukee bukaniil kaketeene kayitowumulo li eketayi. Kukee li kúcoocikooliil kujow kuket, min kuhoy min an afakeniil mantee li kubaj kayitowul li eketayi kahaŋe majak.

³⁶ Kukee li kunaak kujakakaayiil ban li kutekiil kukaluwaas, kaabuku li kujenkiil ban li kukul̥iil.

³⁷ Kukee li kutekiil kuyitik kumuk, kaabuku li kufaleniil li tut, mantee foof li kumukumiil síkundu. Kukee li kunaak kuñaahoo bo muñaˈa makaanowe ubaŋ wata kúgalalaan mantee foof wata sijaameen. Li kulako kusukateen, li kúlaameniil ban li kúcoocikooliil.

³⁸ Adunaayi etookut min ebaj bukan loon umbuku. Li kunaak kuñaahoo bo muñaˈa li uyiinaayawu, li kuyuuyaku. Li kunaak kujow kulako li uwuŋ li uwokaay wata li etaam.

³⁹ Bukanabuku umbuku feh kaanomuu bukittenoolum bajake humum hata káyinenaku kooliil, kuyabut wahawu wan Ateemit alobumuu kasen.

⁴⁰ Li mal̥egenamu, Ateemit layinooyinoo mata wah wahaŋe majak akat to boot li alolaal, jakum bil kulako bukan káliiŋe jak alolaal baletaal to.