Eébulo 10 - Jola-Kasa

¹ Eluwaayi yata Móyiis éhiisut jak búnokoolabu bata mal̥egen bata wahawu wabajumuu. Yoonosoono kambu bale kata wahawu wajakaawu wammuu li ubil. Eluwaayi egel̥l̥engel̥l̥en min usilaawu wanolawu unaak ukaani kale emitoomit. Wahawu unwu újimuu, eyilaat ekaan bukanabuku kálohulomuu Ateemit kulako bukan káliiŋe.

² Letumuu mo, bukanabuku kamanenemuu Ateemit loon muñaˈa, uhoofoolawu wooliil faneen úfuleni, min úfu’ li buko ñano ban kale. Leteen kujok li ehaaseen humum hata uhoofoo wan kukaane, ban let kumit kukaan kasila.

³ Bale usilaawu unwu újiyeji bukanabuku li kunaak kuwayil̥o uhoofoolawu wooliil emitoomit.

⁴ Li mal̥egenamu, húsimahu hata kúmuunaaku li hata kulowaku huyilaat húfulen uhoofoolawu.

⁵ Wahawu unwu újimuu nan Kilisita alakomuu li abil li adunaayi, li aan Ateemit: «Ufañut kasila, ufañut foof busuuhen, bale li ukaanom eniil.

⁶ Ubajut ésuumansuum yanooyan li sínuukuleŋasu sásulimuu li kusilaaku, usilaawu wakaanimuu boot kabonket uhoofoolawu, ukaanuti foof ésuumansuum.

⁷ Muñeˈe li een: “Ateemit, libiibil boot min ikaan loon ufañumuu, loon Bakiicelabu bulobumuu buya lí ínje”.»

⁸ Kilisita lajanjand aan: «Ufañut usila, ufañut busuuhen, ufañut sínuukuleŋ sásuli li husila, ufañut usila wakaani boot kabonket uhoofoo, ban ubajut to ésuumansuum yanooyan.» Imban, usilaawu unwu ukaanikaan loon eluwaayi elobumuu.

⁹ Fúlum tó, li afamen aan: «Libiibil ínje humumom boot kakaan húnongumahu hooli.» Kilisita li áfulen masilayelamu mútinaalamu, min akaan to múl̥ubutamu.

¹⁰ Yéesu Kilisita lakankaan loon Ateemit afañumuu. Lasensen eniilayi yoola humum yo ñano boot kale, min újowumaal tó ulakowaal bukan kan kukaane kunab.

¹¹ Alámba anoowan fan ayito hunakoohunak min akaan bulokabu bata Ateemit. Fan akaan ñameeŋe usilaawu wanolawu, wayilaatumuu úfulen uhoofoolawu maayeet tuf.

¹² Bale Kilisita, okila kasila kano bale lakaane boot li uhoofoolawu, ban li abah kaŋen kúli Ateemit boot nanoonan.

¹³ Muñeˈe, to untu Yéesu áamimuu li kakob min Ateemit aŋa’ kulatoolaaku koola akaanool anaak ákakul.

¹⁴ Mó mújimuu, li kasila kano bale lájowummuu min akaan bukanabuku kan áfulenumuu uhoofoolawu kulako bukan káliiŋe boot nanoonan, ban li kúfu’ li uhoofoolawu wooliil.

¹⁵ Buyinumabu Banabaabu bulobolaalob mo foof, mata bonsoon:

¹⁶ «Húfaalumahu unhe léemimuu li ijok li buko kunakaku unku babane, Amaaŋenawu alob. Fan iŋa’ siluwaasu súmbaam ikaaniil li sísigil. Fan iŋa’ so ikiiciil li uyinum.»

¹⁷ Ban li afamen aan: «Let ibil ilaañen iwayil̥o uhoofoolawu wooliil, li butilaabu booliil.»

¹⁸ Ban tan uhoofoo ubonketi, tookut min kasila kukaani boot káfulen kahoofoo.

¹⁹ Kutuyom, muñeˈe kama luyilowaale unokenaal li káwoolu ló dán ñéyimuu li eluufayi yata Ateemit, humum hata húsimahu hata Yéesu.

²⁰ Lábabulolaababul bútin buwunkul, baloŋe, ban li bújowum li hufalalahu hata eluufayi yata Ateemit, búfu’ kata baaba. Hufalalahu unhu ho hommuu eniilayi yoola.

²¹ Lubajaale álamba áamak akaani anahaanawu ata eluufayi yata Ateemit.

²² Ulohaal kama Ateemit li buyinum bal̥egene, ban li káyinen ló káliiŋe, li ésigil yaseteni li kahoofoo kanookan kabilumulo li kayinoo kajakut, ban eniilayi li efosi li mal masete.

²³ Utúkaal lit kákangumaku kan ulobaalemuu mata ko, ban jakum úyekowaal, mata Ateemit aanumuu fan akaan wah, luyilo úwooluwaalool.

²⁴ Lootaale ufooyoolaal ban li unaak uwankulenoolaal, mantee li ubajaal húbooli ban li unaak ukaanaal majake.

²⁵ Jakum ukataal bo kuwoogaku koololaal loon kukee kukaanemuu, bale unaak uwankulenoolaal, emmuu kama jijuke kaanaku hunakahu hata Amaaŋenawu húkoojulo.

²⁶ Li mal̥egenamu, ucucaalumuu min unaak uhoofoolaal, ololaal bahaasaale mal̥egenamu ubanaal, let baj kasila káami li kuyili kúfulen uhoofoolawu.

²⁷ Wahawu wasaŋomuu, wo wommuu kakob li ekole ló batiibabu bata Ateemit li sambunasu sásufaasu sammuu li sileemen kulatoolaaku koola.

²⁸ An ahuusulumuu eluwaayi, fan kumukool babajut káyiyen, ló banokoole loon bukan kúl̥uba mantee foof kúhaaji koone mal̥egen latilentilen.

²⁹ Jifan jiyinoo min jijuk buu kama katek kata an abese Añiilawu ata Ateemit kóomi li kúsengi eeno; an ákaanumaatiye húsimahu hata húfaalumahu han kuŋalemuu min kúgiilen, ban li agel Buyinumabu basenemuu kájiyaku kata Ateemit.

³⁰ Li mal̥egenamu, luhaasaale anawu aanumuu: «Bulukenabu ínje ikil bo, ínje ilaañenemuu an wahawu wan akaanumuu.» Ban li alaañen aan: «Amaaŋenawu fan atiib bukanabuku koola.»

³¹ Kóyilenikoyileni ŋáa’ an balowe li kuŋen kata Ateemit aloŋumuu.

³² Jiwayil̥o wahawu wabaj nomuu li kunakaku kútinaalaku nan jibilumuu li mawuŋaamu mata Ateemit. Jiyansaan jibaj no sílaam sáamak li bútaj básengiye ŋáa’.

³³ Kukee li bukuluul kugeliigel ban li kúcoocikooliil hákil ésukayi feh, kaabuku li kulamben bukanabuku kan kulakomuu kacoocaku loon muñaˈa.

³⁴ Sílaamasu sata bukanabuku kan kukul̥umuu silakolako sooluul foof. Ban jonsoon li ésuumansuum ló éehe’ min kubot wahawu wan jibajumuu, mata jihaase joon jibaje hubaj hahaŋe majak, hata boot nanoonan.

³⁵ Jakum jikat bo káwooluwaku kan jibajumuu. Fan kúŋaluluul busuuhen báamak.

³⁶ Tootook min jihanken min jítuk lit, jiyiliwum jikaan wahawu wan Ateemit afañumuu, min jíbajum tó wahawu wan alobumuu kasen.

³⁷ Li mal̥egenamu, Bakiicelabu bonsoon: «Saŋowe jatit bale, ban let fiyo maayeet, tówum anawu ammuu li abil abilum. Let fiyo abilum.»

³⁸ Ateemit li aan: «Anawu úmbaam acolumuu, fan áloŋum li káyinen, bale añakumuu alaañ búsol, let ibaj ésuumansuum li akila.»

³⁹ Bale alolaal uletaal ló li bukanabuku kañakemuu kulaañ búsol min kújim, bale alolaal oomaalumuu bukanabuku káyinenumuu, ban lufakaale.