Eébulo 1 - Jola-Kasa

Muñeˈe Ateemit li Añoolool lálobume li bukanabuku

¹ Naanaŋ, Ateemit lanaanaak ájowum li kufulofetaku, min alob li situubawolaal sihaan ñameeŋe ban li malobe mameeŋe.

² Bale muñeˈe li taŋaye ébanumaye, li Añoolool lálobume li alolaal. Li akila lajuul̥ume adunaayi li wahawu feh wáami lómuu, ban akila lakaan tomuu boot min akil wahoowah feh.

³ Kaleñaku kata máyiineniyamu mata Ateemit li Añiilawu ummu koom. Li akila bóonowabu bata Ateemit bujukimuu. Hulimahu hoola habajaahu sembe laŋale min afeb adunaayi. Nan ágiilenumuu bukanabuku li uhoofoolawu wooliil aban, li ajow abah haatiya tiya emitayi kaŋen kúli Ateemit abajaawu sembe.

⁴ Añiilawu lahaŋe ŋáa’ kumalakaaku, mó lí múji Ateemit li asenool kajaw kahaŋe kooliil.

⁵ Li mal̥egenamu, Ateemit ámusut aan akee li kumalakaaku: «Awu ommuu Añoolom, Hunakahu hata síyaat ínje emmuu Atuubayi.» Amúsut foof alob mata amalaka aan: «Fan ilako Atuuba oola, ban akila fan alako Añiil úmbaam.»

⁶ Ban foof nan Ateemit áboñulumuu li adunaayi inye añoolool ajandumuu abuki, lansaan: «Kumalakaaku feh kata Ateemit, koote kumanenool.»

⁷ Li alob mata kumalakaabuku aan: «Ateemit fan akaan kumalakaaku koola kulako uyinum, li akaan kulokaaku koola kulako kúlaañaañ kata sambun.»

⁸ Bale li alob mata Añiilawu aan: «Awu ammuu Ateemit, efenjeŋayi yooli yata jáyiiyaju inyu to boot nanoonan. Fan ooken bukanabuku kata jáyiiyaju jooli li bakaane bacole.

⁹ Awu wah wacole lufañe, min uhoy wah wajakut. Wahawu unwu újimuu Ateemit, Ateemit ooli, li aŋa’ éduulij yakaane ésuumansuum min ásiiwi, haŋ kunaboolaaku kooli feh.»

¹⁰ Ateemit li afamen aan: «Amaaŋen, laalu awu ujuul̥umuu etaamayi li húkitumahu; emitayi kuŋeni kulok yo.

¹¹ Wahawu unwu feh fan ubil újim, bale awu ummu to boot nanoonan. Etaamayi li emitayi fan sineg loon wañ.

¹² Fan ubooñ so loon hukaafa abooñeyimuu, ban fan úfulen so loon wañ úfuleneyimuu min ukaan sakee; bale awu anolawu loom, ban buloŋabu booli búbaneliit.»

¹³ Ateemit ámusut aan akee li kumalakaaku koola: «Ubil ubah kaŋenom kúli, boot yok nan emmuu li ikaani kulatoolayi úkakul.»

¹⁴ Kama inti kumalakaaku uyinum koom wáami li bulok boot li Ateemit? Inti Ateemit laboñeboñ kumalakaaku kujow kulamben bukanabuku káatimuu kuyab kafakaku kutowo?