Búhiisenumabu 9 - Jola-Kasa

Amalakaawu atokenawu li al̥ok kasiinaku koola

¹ Muñeˈe amalakaawu atokenawu li al̥ok kasiinaku koola. Li ijuk ewuut yálowumulo li emitayi boot li etaam. Li kusen yo ekul̥umayi yata ekoloŋayi yata buwokaayabu básenkiyaabu.

² Ewuutayi li ébabul ekoloŋayi. Hakoo li húfulumul ló hanokoole li hakoo hata bambun báamak. Hakoolahu unhu hata ekoloŋayi li humeeŋen élusayi gay banakabu li búlimen.

³ Bábanguu li búfulumul li hakoolahu unhu, min buyiisoo buban etaamayi feh. Li kusen bo sembe loon sata sil̥anguu.

⁴ Li koon bábanguulabu jakum bukajen mahosamu mata etaamayi, li unuunukenawu, li banuunuk baabu, bale bukaan majakut bukanabuku kabajutumuu húlangumaasowahu hata Ateemit li síjontumasu sooliil.

⁵ Konsoon bo jakum bumuk bukanabuku umbuku, bale bukaaniil kúlaam kul̥eeñ koono hutok. Sílaamasu san bommuu li búlaameeniil fan sinokoo li sata an an el̥anguu etahe.

⁶ No unnu, bukanabuku fan kuŋes eket, bale let kuket. Fan síibiil kuket, bale eketayi fan éloyiyiil.

⁷ Bábanguulabu umbu bunokoonokoo li sifilinjebe san kufaleˈe boot ejow hutiik. Li baj li kúkowaku kata bo wah ukee wanokoole li síjambi sata éwulus. Wuulawu wata bo li unokoo li wuul wata bukan.

⁸ Walawu wata bo li unokoo li wal wata anaale. Uŋíiŋawu wata bo li unokoo li wata éŋaŋ.

⁹ Li bukaano li ugiŋawu wata bo wah ukee wanokoole loon sibangal sata mañ, ban kawelaku kata ubeyawu wata bo li kunokoo loon kawel kata sifilinjebe sameeŋe sañake sisaalet sata hutiik min sitey boot hutiik.

¹⁰ Bábanguulabu umbu bubabbaj kuwet kabaje utah loon wata sil̥anguu. Li kuwetaku kata bo búbajummuu sembe sata kálaamen bukan kul̥eeñ koono hutok.

¹¹ Ayíiyawu ata bo akila ammuu amalakaawu ata buwokaayabu básenkiyaabu. Amalakaawu ummu laaneyi li elobayi yata éebulo «Abadoŋ», li elobayi yata kata Gilees koonewool «Afoliyoŋ».

¹² Sílaamasu sátinaalasu li siban. Fúlum tó, li lako sílaam sakee síl̥uba sunsu li simit sibil.

Amalakaawu atoken li anolawu li al̥ok kasiinaku koola

¹³ Amalakaawu hata éwulusayi, hammuu hákil Ateemit.

¹⁴ Hulimahu li hoon amalakaawu atoken li anolawu aakenumuu kasiinaku: «Ukátenul kumalakaaku kubakiilaku kakokimuu tin katunkaku káamakaku kan koonemuu Ofúlat.»

¹⁵ Li kúkatenul kumalakaaku kubakiilaku kafaleyimuu kat to boot li ewaatuwayi inyu, li hunakahu unhu, li hul̥eeñahu unhu li kajaañaku unku, nan kommuu li kumuk bugeb bano li ugebawu úhaaji wata bukanabuku feh.

¹⁶ Li ijam li kulob kusollaali koono keem kulemboomuu li sifilinjebaasu: koono símiliyoŋ soono síteemeel síl̥uba.

¹⁷ Kahimmowaku unke lijukumuu li sifilinjebaasu li bukanabuku kalemboomuu li so. Sibangal sájunke loon sambun kookene, ban li síbuloo loon ayitik akee an koone safiil, li síniyoket loon efo’ yata éniyok yásufe. Kúkowaku kata sifilinjebaasu li kunokoo li kúkow kata síŋaŋ. Sambun li sinaak sífulumul li utumawu wata so, li hakoo, li batolok básoyiye.

¹⁸ Wahawu unwe úhaaji wanaake úfulumulumuu li utumawu wata sifilinjebaasu, wammuu sambunasu, hakoolahu li batolokabu básoyiyaabu, li umuk bano li ugebawu úhaaji wata bukanabuku kammuu li etaamayi.

¹⁹ Mata sembaasu sata sifilinjebaasu li utumawu wata so silakowe li kuwetaku kata so foof. Kuwetaku kata so kunokoonokoo li sinuukayila, ban li kubaj kúkow kan kunaake kuŋammuu min kukaan majakut bukanabuku.

²⁰ Bukanabuku kasaŋomuu, kaketutumuu li utekawu unwu, kubetut búsol wahawu wan buko humumiil kukaanumuu li kuŋeniil. Kukatut foof kamanen uyinumawu wajakutaawu, sibaŋootasu sata éwulusayi, li sata ehaaliisayi, li sata fálamayi, sata kugisaaku li sayijimuu li simin sata unuunuken. Li kuŋa’ so kukaan úciin, ban siyilaat sijuk, siyilaat sijam, siyilaat foof sijow.

²¹ Bukanabuku umbuku kujokut foof li ehaaseen min kukat jamuk bukan, kukatut kakaan jángafayinde, kukatut húfulo li alet alet, kukatut ékuwet.