Búhiisenumabu 4 - Jola-Kasa

Bukanabuku feh li kumanen Ateemit li emitayi

¹ Nan fúlum tómuu, li ilaañen ijuke li ijuk li emitayi kámbii kábabuli. Hulimahu hútinaalahu han ijam nomuu li hulob lí ínje ban li hul̥ok loon kasiin, li hoonom: «Uŋitowul boot taate, mín íhiisi wahawu wammuu li ubil ubaj.»

² Muñeˈe Buyinumabu li buyaan bujokom. Li baj li emitayi efenjeŋ yata áyii. Li efenjeŋayi inyu an abah ló.

³ Anawu abahumuu li efenjeŋayi li aleñ loon kuyitik kajake ŋáa’ kan koone Jasif li Saliduwaan. Li baj foof husu haleñe loon huyitik hajake ŋáa’ han koone Emélod, háwooñene efenjeŋayi yata áyiiyawu.

⁴ Muñeˈe kunahaan koono áyii li kubakii, kakaanowe wañ wahiite ban li kooken síjambi sata éwulus li kúkowiil, li kubah li sifenjeŋ sata kúyii kúwooñen efenjeŋayi yata áyiiyawu.

⁵ Kawiwijen, li kulim li kákulububen kata hufalajaj, li kúfulumul li efenjeŋayi inyu yata áyiiyawu. Li baj kúlaañaañ hutok li kúl̥uba kalako to kátif hákil efenjeŋayi yata áyiiyawu. Kúlaañaañaku unku ko kommuu uyinumawu hutok li úl̥ubaawu wata Ateemit.

⁶ Li baj foof hákil efenjeŋayi yata áyiiyawu husamu haleñe ban li huyaaŋ loon eweel. Li baj li tut wah ukee woono ubakii waloŋe, wáwooñene efenjeŋayi yata áyiiyawu ban li ubaj kúkil tanootan, hákil li kata búsol.

⁷ Wahawu útinaalawu unokoonokoo li éŋaŋ, wál̥ubutawu li unokoo li ámuuna, wáhaajutawu li unokoo li buul bata an, wabakiilenawu li unokoo li huwaalu háami li jáyit.

⁸ Wahawu unwu ubakii, wanoowan li wo ubaje ubey woono hutok li kano wabaje kúkil tanootan, kata láala li tíyaŋ. Li unaak ukijen etihunaka uban ehuka woon: «Anabaawu, anabaawu, anabaawu, okila ammuu Amaaŋenawu Ateemit ata sembe, Akila alako to nomuu, áami tomuu, ammuu li abil!»

⁹ Nanoonan nan wahawu ubakiilawu ukijene min uteben, li úbinken ban li usal anawu abahumuu li efenjeŋayi yata áyiiyawu, aloŋumuu boot nanoonan,

¹⁰ kunahaanaku áyii li kubakiilaku kahallenumuu, li kúkuntuŋ hákil anawu abahumuu li efenjeŋayi yata áyiiyawu, min kumanen anawu aloŋumuu boot nanoonan. Fan kúfulen síjambiyasu sooliil kuwalen hákil efenjeŋayi yata áyiiyawu, ban li kunaak koon:

¹¹ «Awu Amaaŋen Ateemit óololi, awu utookumuu min uyab kasalaku, li kábinkenaku, li sembaasu. Mata awu úwuwenumuu wahawu feh, Lufanfañ min wahawu feh ubaj, mó lí múji li úwuweni.»