Búhiisenumabu 3 - Jola-Kasa

Eleetal boot li Ejanguwayi yata Saalid

¹ — Ukiic amalakaawu ata Ejanguwayi yata Saalid oonool: «Anawu aakumuu uyinumawu hutok li úl̥ubaawu wata Ateemit, li siwuutasu hutok li síl̥ubaasu laane: Lihaase wahawu wan ukaanemuu. Lihaase een lujamojamo kaanaku awu lulolloŋ, imban lukeeket.

² Ulíwo, min uliten wahawu wasaŋoyimuu, wáamimuu li uniilo. Mata lijuke kaanaku bulokabu ban ukaanumuu bunabut hákil Ateemit úmbaam.

³ Loote kama uwayil̥o kulimaku kan uyabumuu li kan ujamumuu. Ukaan loon kulimaku unku kulobumuu, min útiiwo uŋa’ buloŋ buwunkul. Ulíwowutumuu, fan ibil igoobi loon ákuu, ban let uhaas nan emmuu li ibil.

⁴ Bale baje bukani kukee li ésukayi yata Saalid kakontenut wañawu wooliil. Bukanabuku umbuku fan kúnabul lí ínje makaanowe wañ wahiite, mata kutootook min kukaan mo.

⁵ «An ammuu aheek, muñaˈa foof lammuu li akaano wañ wahiite. Let íbuj kajawaku koola li éliibalayi yata buloŋabu. Fan ilob hákil Atuubawom lí hákil kumalakaaku koola, een ínje ikilool.

⁶ «An áakimuu sijan, li ajanten wahawu wan Buyinumabu bulobumuu Sijanguwasu.»

Eleetal boot li Ejanguwayi yata Filadelifi

⁷ — Ukiic amalakaawu ata Ejanguwayi yata Filadelifi oonool: «Anawu Anabaawu ammuu an ata Mal̥egen, aakumuu ekul̥umayi yata áyiiyawu Dayit, ábabulemuu ban an let ayili abab, li abab ban an let ayili ábabul, laane:

⁸ Lihaase wahawu wan ukaanemuu. Ujuke, likankaan hákili kámbii kábabuli kan an ayilaat abab. Lihaase een sembaasu siya sifamut, lukankaan loon hulimahu húmbaam hulobumuu, ban uceeŋut oon luhaasom.

⁹ Wahawu unwe léemimuu li ikaan bukanabuku kata huwoogahu hata Sayitaane, kámalemuu koon buko kusuwif koom ban kulet kusuwif. Fan ituuŋiil kubil kúkuntuŋ hákili, min kuhaas koon lifañifañ.

¹⁰ Emmuu lútuutuk hulimahu húmba lit ban li uhanken min úmuñ, ínje foof fan ifooyi nan sílaamasu sommuu li sibil silako li adunaayi feh boot kayoob bukanabuku kammuu li etaamayi.

¹¹ Injé ummu li ibil. Utúk wahawu wan ookumuu lit, jakum bil an aŋa’ bacaamabu booli.

¹² «An ammuu aheek, fan ikaanool alako yiil li Eluufayi yata Ateemit úmbaam, ban let abil áfulumul ló maayeet. Fan ikiic li akila kajawaku kata Ateemit úmbaam, li kata ésukayi yata Ateemit úmbaam, yammuu Yeelusalem yawunkulayi, yammuu li éwalowumul li emitayi bata Ateemit úmbaam. Fan ikiic li akila foof kajawaku kúmbaam kuwunkulaku.

¹³ «An áakimuu sijan, li ajanten wahawu wan Buyinumabu bulobumuu Sijanguwasu.»

Eleetal boot li Ejanguwayi yata Lawodise

¹⁴ — Ukiic amalakaawu ata Ejanguwayi yata Lawodise oonool: «Anawu aaneyimuu Aameen, alobemuu Hulimahu Hásuumaahu li mal̥egen, an Ateemit áwuwenummuu wahawu feh li akila, laane:

¹⁵ Lihaase wahawu wan ukaanemuu. Lihaase een awu újoobiwut, úsufut. Uyiliyeenumuu újoobi mantee foof li úsuk, li koy!

¹⁶ Bale emmuu lubototembototen bale, min lako úsufut, újoobiwut, fan ímasuli li butumom.

¹⁷ Mata loonesoon: “Likankaan usaanum, ínje an abaje, ban igayut wahoowah.” Ban uhaasut oon awu asukateen, li úyiyeni ban li ugay, lí úfuum ban ukokowut!

¹⁸ Mó mújimuu, boot min isaabi eeni unoom lí ínje éwulus yan kuteŋene li sambun, mantee li ulako mal̥egen an abaje. Unoom foof wañ wahiite min úhimenoo jakum ubil usuu min úfulul makokowut. Li uŋes bubuun min ubunten kúkilaku kooli mantee li unaak uyili ujuk.

¹⁹ Injé fan italen ban li icolen bukanabuku feh kan ifañumuu. Mó mújimuu, loote ukaan manooman, min útiiwo uŋa’ buloŋ buwunkul.

²⁰ Ujanten, ínje umme min iyitowe tin kámbiilaku min ikonkongen. An ajamumuu hulimahu húmbaam ban li ábabul kámbiilaku, fan inoken boola min jitiñ dín dáno fóofoli kúl̥uba.

²¹ «An ammuu li aheek, fan ikaanool abil min jibah li efenjeŋayi yúmbaam yata jáyiiyaju, loon ínje humumom ijowumuu jibah li Atuubawom li efenjeŋayi yoola yata jáyiiyaju, nan ibajumuu kaheekaku.

²² «An áakimuu sijan, li ajanten wahawu wan Buyinumabu bulobumuu Sijanguwasu.»