Búhiisenumabu 2 - Jola-Kasa

Eleetal boot li Ejanguwayi yata Efées

¹ — Ukiic eleetal amalakaawu ata Ejanguwayi yata Efées oonool: «Anawu átukumuu siwuutasu hutok lí síl̥ubaasu li kaŋenool kúli, ban lí ájowum li tut sihiitumasu hutok lí síl̥ubaasu sata éwulusayi, hulimahu unhe lalobe:

² Lihaase wahawu wan ukaanumuu. Lihaase buu lulokumuu súf, li buu luhankenumuu eeno min úmuñ. Lihaase een uyilaat úmuñ bukanabuku kál̥afutumuu. Luŋeŋŋes min uhaas mantee bukanabuku kaanumuu buko kufootal koom mal̥egen, ban luhaase oon kulet kufootal. Lujuujuk kaanaku kúmammal.

³ Luyiliyili húmuñ. Lúlallaam ŋáa’ mata ínje íji, ban úyekowut.

⁴ Bale fan íwatatenumi wah wano: ulaañut úbooliwom loon úbooliwom nomuu bútinaa.

⁵ Uwayil̥o tay lúlowumulomuu. Utíiwo uŋa’ buloŋ buwunkul, ban li uloŋ loon lunaake uloŋ nomuu nan úyinenumuu lí ínje bútinaa. Utíiwowutumuu uŋa’ buloŋ buwunkul, fan ibil boot li awu, ban fan ífulen ehiitumayi yooli tan elakowemuu.

⁶ Bale wahawu unwe lísalumimuu: min uhoyumuu makaanelamu mata Enikolayitayi loon ínje humumom ihoy momuu.

⁷ «An áakimuu sijan, li ajanten wahawu wan Buyinumabu bulobumuu Sijanguwasu. Anawu ammuu li aheek, fan isenool mutiñaayamu mata bunuunukabu bata buloŋabu bammuu li etoolayi yata Ateemit, atiñ.»

Eleetal boot li Ejanguwayi yata Simiin

⁸ — Ukiic amalakaawu ata Ejanguwayi yata Simiin oonool: «Anawu ammuu átinaalawu li ábanumawu, aketeenumuu ban li ayitowumul li eketayi, hulimahu unhe lalobe:

⁹ “Lihaase sílaamasu sooli li bugayabu booli” — bale li mal̥egenamu lukankaan an abaje. Lihaase kulimaku kajakutumuu kan bukanabuku kaanemuu Kusuwif koom ban kulet Kusuwif, kulobemuu kuya li awu. Bale bukanabuku umbuku koonosoono huwoog hata Sayitaane!

¹⁰ Jakum úkoli sílaamasu sakobemuu li awu. Ujuke to, Sayitaane fan abet bukan kameeŋe li bukuluul li hukul̥ min ayoobuul min ajuk. Fan jilako li sílaam kunak koono kuŋen. Utúk lit boot yok hunak eketi. Ukaan momuu, fan iseni buloŋ bábaneliit bulako bacaami.

¹¹ «An áakimuu sijan, li ajanten wahawu wan Buyinumabu bulobumuu Sijanguwasu. An ammuu aheek, let aket búl̥ubut.»

Eleetal boot li Ejanguwayi yata Feelugam

¹² — Ukiic amalakaawu ata Ejanguwayi yata Feelugam oonool: «Anawu átukumuu ékunduwayi yañekaayi hulimahu unhe lalobe:

¹³ Lihaase tay lukine: to efenjeŋayi yata jáyiiyaju jata Sayitaane yommuu. Lútuutuk to lit lí ínje, ban ukatut bo káyinenaku kan ubajumuu lí ínje, maayeet nan Antifaas alobemuu bukanabuku múmbaam li mal̥egen, kumukoolumuu booluul tan Sayitaane akinumuu.

¹⁴ Bale baje wah wan eete iwatateni mata wo: lubaje booli bukan kanabe li kulimaku kata Balam, alobumuu Balak buu lammuu abuutoo kata Isilayeel min kutokoñ eliw yawaaseni, li buu kommuu kunaak kúfulo bo muñaˈa.

¹⁵ Baje foof booli bukan kanabe li kulimaku kan Kunikolayitaku kuliikenemuu ésukayi.

¹⁶ Muñeˈe kama útiiwo uŋa’ buloŋ buwunkul. Ukaanut momuu, fan ibil muñeˈe boot li awu, ban fan itiik bukanabuku umbuku li ékunduwayi yáfulumulemuu li butumabu búmba.

¹⁷ «An áakimuu sijan, li ajanten wahawu wan Buyinumabu bulobumuu Sijanguwasu. «An ammuu aheek, fan isenool li maanayi yayolimuu. Fan isenool foof huyitik hahiite. Li huyitikahu unhu kajaw kuwunkul kukiici li ho, kan anoowan ahaasut ábute li anawu abaj homuu.»

Eleetal boot li Ejanguwayi yata Tiyatiil

¹⁸ — Ukiic amalakaawu ata Ejanguwayi yata Tiyatiil oonool: «Añiilawu ata Ateemit, an kúkilaku koola kútifumuu loon sambun ban kootaku koola li kuleñ loon fálam, hulimahu unhe lalobe:

¹⁹ Lihaase wahawu wan ukaanemuu. Lihaase húbooliyahu hooli li káyinenaku kooli, bulokabu booli li kahankenaku kooli. Lihaase een bulokabu booli búbanumabe buhaŋe maluuk bútinaalabu.

²⁰ Bale libaje wah wan eete iwatateni mata wo: lukaakat anaalaawu an koonemuu Jesabel, ámalemuu aan afulofet laam, min ájimen kulokaabuku kúmbaam. Li kulimaku kan aliikenemuu ésukayi labuntumiilumuu min kunaak kúfulo bo muñaˈa, li kunaak kutokoñ eliw yata sínuukuleŋ sawaaseni.

²¹ Liseneenoosen taŋ mantee li átiiwo aŋa’ buloŋ buwunkul, bale afañut min akat húfulowahu han áfulowe bomuu muñaˈa.

²² Mó mújimuuu, fan ikaanool alo li sílaam sáamak li kuhint, ban fan ibet foof kufaalool kan kúfulowe bomuu muñaˈa li sílaam sáamak, buko bakatut makaanelamu moola.

²³ Fúlum tómuu, fan imuk bañiilabu boola. Muñaˈa léetimuu ikaan, Sijanguwasu feh li sihaas kaanaku ínje emmuu anawu ahaasemuu uyinoolawu wata bukanabuku li kásiibowaku kooliil. Fan icaam anoowan naboo li wahawu wan akaanumuu.

²⁴ «Bale bukuluul jata Tiyatiil jasaŋomuu, jijantenut kulimaku kajakutumuu kan kuliikenemuu ésukayi, ban jiliikenut wahawu wan bukanabuku umbuku kuyinoomuu li koon wo wommuu “Wahawu wayolomuu wata Sayitaane”. Boot min eenuul ilet li ilaañen ikaanuul búteb bakee.

²⁵ Bale jítuk lit wahawu wan jibajumuu boot nan ínje emmuu li ibil.

²⁶ «An ammuu aheek, ban li akaan wahawu wan ínje ifañumuu boot yok li húbanumahu, fan ikaanool alako anahaanawu ata bukanabuku kata sihetasu feh.

²⁷ Fan aŋa’ egol yata mañ min amatiil, ban fan ahumiil loon an ahumemuu ateefaay. Anawu ummu fan isenool sembaasu sanolasu li san Atuubawom asenommuu.

²⁸ Ban fan isenool foof ewuutayi yawuŋenemuu li bújom yan koonemuu elaben.

²⁹ «An áakimuu sijan, li ajanten wahawu wan Buyinumabu bulobumuu Sijanguwasu.»