Búhiisenumabu 18 - Jola-Kasa

Ateemit li ayiis ésukayi yata Babiloon

¹ Fúlum tó, li ijuk amalaka akee li áwalowumul li emitayi. Lababbaj sembe sáamak ban máyiineniyamu moola li muwuŋen etaamayi feh.

² Li alob butiya aan: «Babiloon eyiisoole, Babiloon yáamakayi eyiisoole! Yoonosoono muñeˈe bukin bata kummal, huyolo hata uyinum wanoowan wajakut, huyolo hata basuu banooban bajakut, ban búsuumut bajuk.

³ Bukanabuku kata sihetasu feh kuhohhob bunukabu bata bucagayetabu báamakabu bata yo. Kúyiiyaku kata etaamayi li kunaak kúfulo yo, kújulawaabuku kata etaamayi, li kújowum li bucagayetabu bata yo báamakabu, min kuhin kubaj.»

⁴ Muñeˈe li ijam hulim hakee habilumulo li emitayi li hoon: «Bukanom, jífu’ li ésukayi yata Babiloon, jífu’ li yo jakum bil jihoofoo loon yo, jakum bil jilo foof li katekaku kan yommuu li ebaj.

⁵ Mata uhoofoolawu wata yo, újumbojumbo boot yok li emitayi, ban Ateemit lawayil̥owulo makaanelamu mata yo macolutumuu.

⁶ Jikaan yo loon ekaanemuu bukan kaabuku, jicaam yo ñoono ñál̥uba wahawu wan ekaanumuu. Li ejunkayi dán eyawoolemuu bunukabu bata yo, jiyawoo ló bunuk bal̥aal̥e ñoono ñál̥uba boot li yo.

⁷ Loon lafañumuu ŋáa’ kasaloolo, li buloŋ li hubaj, mo foof jommuu jílaamenool, ban li jikaanool ajuk búyiik. Mata yonsoon li buyinum yo: “Libabbah taate loon áyii anaale, ilet anaale ahoke áyinool, ban let ibil ibaj ñikul maayeet.”

⁸ Wahawu unwu újimuu utekawu wata yo, wammuu: úsomut wamuke, ñikul li bamuufaay, fan ulo yo hunak hano. Sambun fan sileemen yo, mata Amaaŋenawu Ateemit atiib yomuu, lababbaj sembe.»

⁹ Kúyiiyaku kata etaamayi kanaake kúfulo yómuu, ban li kúloŋum li hubajahu hata yo, fan kúluulen ban li kul̥okoo mata yo, nan kommuu li kujuk hakoolahu hata sambunasu sásulemuu li yo.

¹⁰ Fan kuyito lóyi jakum bil kulo li sílaamasu sata yo. Fan kunaak koon: «Iyéno! Iyéno! Aa Babiloon, ésuk yáamak, ésuk yabaje sembe! Ewaatu yano bale Ateemit aŋalumuu min atiibi!»

¹¹ Kújulawaabuku kata etaamayi li kul̥ok ban li kukul yo, mata muñeˈe an ánoomeliit wañawu wooliil:

¹² éwulusayi, ehaaliisayi, bagisa batiineniye ŋáa’, usisawu, wañ wata búbil, wañ wájunke, sooyayi li sileesaasu sájunkaasu cúl, uhanha wata bunuunuken banooban bagayinenowe ban li unaak uciiŋo, li wahoowah feh wákaanumi li úŋiiŋ loon wata eñaab, li wayijumi li simin sata unuunuken watiineniye, fálamayi, mañamu, mantee foof wahawu wan koonemuu maalub.

¹³ Li baj foof mutiñaayamu man koonemuu kanel, li wah wamise wakaaneyi li elak, eheeñ, múkilamu li ecuulaayayi, sínuukuleŋasu sáamakasu sata kúlumet, kúgalalaan, sifilinjebe, sisaalet, emiikeel li bukan kan kujoke.

¹⁴ Kújulawaabuku li koon ésukayi: «Mutiñaayamu feh másuumimuu li buyinum múfule booli. Hubajahu hooli li wahawu wooli feh watiineniyaawu újime, an let amit alaañen ajuk wahawu unwu booli.»

¹⁵ Kújulawaabuku kanaake kújulamuu wahawu unwu feh li ésukayi inyu min kúbajum li wo, fan kuyito lóyi, mata kufañut min kulo li sílaamasu sata yo. Fan kunaak kúluulen ban li kunaak kul̥okoo,

¹⁶ koon: «Iyéno! Iyéno! Iyéno ésukayi yáamakayi, yanaake ekokomuu wañ wata sooy yalehe, li wañ wájunke li wañ wájunke cúl, yanaake ekaanomuu éwulus, li bagisa batiineniye ŋáa’ li usis.

¹⁷ Ewaatu yano bale efite min ebajayi inyu feh eniilo.» Kunahaanaku feh kata síbatowasu li bukanabuku feh kájowumemuu li halahu kujow kañaahoo, kalokemuu li síbatowasu, li káloŋummuu li halahu, buko feh li kuyito lóyi.

¹⁸ Li kunaak kúluulen butiya nan kujukumuu hakoolahu hata ésukayi yásulomuu. Li koon: «Bajulelut ésuk yanokoole loon ésukayi inyu yáamakayi!»

¹⁹ Li kukannoo, li kúluulen, li kugamoo ban li kul̥ok butiya koon: «Iyéno! Iyéno! Iyéno ésukayi yáamakayi, yan emmuu hubajahu hata yó hújimuu bukanabuku feh, kaakumuu síbato li husamuwahu li kubaj. Ewaatu yano bale efite mata min uyaan uniilo!

²⁰ Bale awu Jamit, ésuumansuum elako li awu mata min ésukayi eniilomuu! Esúumansuum elako li bukuluul, jammuu bukanabuku kata Ateemit, bukuluul kufootalaku, mata Ateemit latittiib ésukayi inyu, mata min élaamenuulumuu.»

²¹ Muñeˈe amalaka abaje sembe li aŋa’ hugisa haleˈe loon búsiken báamak, abeten li halahu ban li aan: «Muñowu ésukayi yáamakayi yata Babiloon, yommuu li ebil eyaan ebeteni teetaam li sembe, ban anoowan let alaañen ajuk yo.

²² An let amit ajam booli kawel kata ekontiŋ li kata kukijena, li kata kul̥oka sihombol li kata usiin. Let an alaañen ajuk booli aloka anoowan, ban foof an let alaañen ajam buya kawel kata búsiken.

²³ Ehiitum let elaañen ewuŋen booli. An foof let alaañen ajam booli hulim hata bukan kakite li kuyabo. Mata kújulawaabuku kooli kulakomuu bukanabuku káamakabuku kata etaamayi, ban li unaak ukaan jángafayinde, min ubunt bukanabuku kata sihetasu feh.

²⁴ Ban booli húsimahu hujukimuu hata kufulofetaku, li hata bukanabuku kata Ateemit, li hata bukanabuku feh kálaamulimuu li etaamayi.»