Búhiisenumabu 16 - Jola-Kasa

Sijunkasu hutok li síl̥ubaasu sata etindihuuñayi yata Ateemit

¹ Muñeˈe li ijam hulim habaje sembe li húfulumul li Eluufayi yata Ateemit, haane kumalakaabuku hutok li kúl̥ubaaku: «Jijow jíyu li etaamayi sijunkasu hutok li síl̥ubaasu sata etindihuuñayi yata Ateemit!»

² Amalakaawu átinaalawu li ajow áyu ejunkayi yoola li etaamayi. Sisonta sajakut sásengiye ŋáa’ li sijok bukanabuku kabajumuu húlangumaasowahu hata énuukuleŋayi yákoyileniyaayi, ban li kunaak kumanen kambuwaku kata yo.

³ Amalakaawu ál̥ubutawu li áyu ejunkayi yoola li husamuwahu. Malamu li mulaañ húsim loon hata an akete. Wahawu feh wakinumuu li halahu li uket.

⁴ Amalakaawu áhaajutawu li áyu ejunkayi yoola li kusamuwaku li úbulenawu wata malamu, malamu li mulaañ húsim.

⁵ Muñeˈe li ijam Amalakaawu akilumuu malamu li aan: «Awu bale ommuu Ateemit anabe. Awu óomi tómuu, awu ulako tomuu, ban lutiibetiib col.»

⁶ Li mal̥egenamu, loon bukanabuku kúyumuu húsimahu hata bukanabuku kammuu kooli li hata kufulofetaku, mo foof luseniilumuu húsim kuhob. Kuyayyab bacaamiil.

⁷ Muñeˈe li ijam hulim li húfulumul li husilaahu Ateemit ata sembe, batiibelabu booli batiibe bata mal̥egen ban li bucol!»

⁸ Amalakaawu abakiilenawu li áyu ejunkayi yoola li banakabu. Li koon bo buyilo búsu bukanabuku li sambunasu sata bo.

⁹ Muñeˈe hásufa háamak li husow bukanabuku. Nan kusowomuu, li kugel kajawaku kata Ateemit aakumuu sembe sata kakaan bukanabuku kúlaam sílaam loon unsu. Bale li kuhoy bakat baloŋelabu booliil bajakutumuu, min kusal Ateemit.

¹⁰ Amalakaawu atokenawu li áyu ejunkayi yoola li efenjeŋayi yata jáyiiyaju yata énuukuleŋayi yákoyileniyaayi. Jáyiiyaju jata yo li jilo li élim. Bukanabuku li séngiyiil bil gay li kunaak kulum kúlellufaku kooliil.

¹¹ Li kugel Ateemit ata emitayi humum hata sílaamasu li sisontaasu sooliil. Bale li kuhoy bakat baloŋelabu booliil bajakutumuu.

¹² Amalakaawu atoken li anolawu li áyu ejunkayi yoola li husamuwahu háamakahu han koonemuu Ofúlat. Malamu mata ho li musay min mukat bútin boot li kúyiiyaku kabilummuu akiw.

¹³ Muñeˈe li ijuk uyinum úhaaji wajakut wanokoole li sihool li úfulumul li butumabu bata éjunfuulayi, li bata énuukuleŋayi yákoyileniyaayi, li bata anawu ámalumuu aan afulofet laam.

¹⁴ Li mal̥egenamu, laalu uyinum wata kummalaku kakaanemuu wah wájaahaleniye. Uyinumawu unwu fan unaak ujow boot bata kúyiiyaku kata etaamayi feh bájum li uwoogeniil boot li hutiikahu hata hunakahu háamakahu hata Ateemit ata sembe.

¹⁵ Amaaŋenawu li aan: «Jijanten, fan ibil loon ákuu! Awólo anawu aatutumuu ámooli min afooy wañawu woola, jakum bil ajow bákolotoo min abaj ñisuu hákil bukanabuku feh.»

¹⁶ Uyinumawu wajakutumuu li uwoogen kúyiiyaku tan koonemuu Alumagedoŋ li elobayi yata bukanabuku kan koonemuu éebulo.

¹⁷ Amalakaawu atoken li ál̥ubutawu li áyu ejunkayi yoola li élusayi. Hulim habaje sembe li hujami li Eluufayi yata Ateemit, habilumulo li efenjeŋayi yata jáyiiyaju. Li hoon: «Muñeˈe bane!»

¹⁸ Li baj kawiwijen, li kulim, li kawel kata kufalajaj. Etaamayi li élinliŋoo ŋáa’. Bajulelut kálinliŋoo kata etaam loon unku kábilum nan an áwulo li etaamaye.

¹⁹ Esúkayi yáamakayi li egiso ekaan ugeb úhaaji. Sísukasu feh sata banooban li adunaayi li sihumo. Ateemit amojenut Babiloon yáamakayi. Li akaan yo ehob bunukabu bata ejunkayi yoola, bunukabu bata etindihuuñayi yoola yáamakayi.

²⁰ Sítebelemukasu feh li síjim. An alaañenut ajuk kuyuuy.

²¹ Kuteyisa kál̥iitiye ŋáa’ li kúlowumul li emitayi kubil kulo li bukanabuku. Bukanabuku li kugel Ateemit humum hata katekaku unku kata kuteyisaaku, mata lakolako katek kásengiye ŋáa’.