Búhiisenumabu 13 - Jola-Kasa

Enúukuleŋ yákoyileniye li éfulumul li halahu

¹ Nan fú’ tómuu, li ijuk énuukuleŋ yákoyileniye li éfulumul li halahu. Enúukuleŋayi inyu ebaje usiin woono kuŋen li kúkow koono hutok li kúl̥uba. Li baj éjambi li kasiin kanookan. Li kukiic kajaw kata kúgel Ateemit li húkow hanoohan.

² Enúukuleŋayi yákoyilenimuu yan ijukumuu enokoonokoo li esaamaay. Kootaku kata yo li kunokoo li kata húnuukuleŋ háamak hanokoole li etameel. Butumabu bata yo li bunokoo li bata éŋaŋ. Ejúnfuulayi li eŋa’ sembaasu sata yo, efenjeŋayi yata yo li kayile káamak, esen énuukuleŋayi yákoyileniyaayi.

³ Húkow hakee hata énuukuleŋayi yákoyileniyaayi, ujukumuu loon hucokocoko kacok kata min huket, bale kacokaku unku li kufak. Bukanabuku feh kammuu li etaamayi li kujuk li kusego ŋáa’. Li kunab li énuukuleŋayi.

⁴ Muñeˈe ésukayi feh li emanen éjunfuulayi, mata esensen kayile énuukuleŋayi. Bukanabuku feh li kunaak kumanen énuukuleŋayi koon: «Ayi anokoole li énuukuleŋayi? Ayi ayilo atiik li yo?»

⁵ Li kukat énuukuleŋayi min elob kulim kata kasaloolo li kata kagel Ateemit. Li kusen yo sembe min ekaan loon muñaˈa jow baj kul̥eeñ koono kúyii kúl̥uba li kúl̥uba.

⁶ Enúukuleŋayi li elako elob kulim kajakut eya li Ateemit, ban li egel kajawaku koola éginnoo ló tan akinumuu. Li egel foof bukanabuku feh kakinumuu li emitayi.

⁷ Li kusen énuukuleŋayi kakaañen min etiik li bukanabuku kata Ateemit, ban li eheekiil. Li kukaan yo min ebaj sembe li utoŋawu feh, li bukanabuku feh, li silobasu feh li sihetasu feh.

⁸ Bukanabuku feh kammuu li etaamayi fan kumanenool. Bukanabuku umbuku buko kommuu kan ujawawu wooliil ukiicutimuu li éliibalayi yata buloŋabu yaan no li húkitumahu hata adunaayi. Elíibalayi inyu yata Agálalaanawu amukimuu.

⁹ An áakimuu sijan, li ajanten jak!

¹⁰ An áami tómuu boot bil jajok, fan abil ajoki kul̥. An áami tómuu boot min abil amukumi li ékundu, manooman ékundu fan emukool. Wahawu unwu újimuu bukanabuku kata Ateemit koote kútuk tó lit, ban li kubaj káyinen.

Enúukuleŋ yakee yákoyileniye li éfulumul li etaamayi

¹¹ Fúlum tó, li ijuk énuukuleŋ yakee yákoyileniye li éfulumul li etaamayi. Li ebaj usiin woono úl̥uba wanookoole li wata húgalalaan háyine hañiilowe, ban li enaak elob loon éjunfuu.

¹² Enúukuleŋayi inyu li eŋa’ sembaasu feh sata énuukuleŋayi étinaalayi yooken hákil yo. Li etuuŋ etaamayi li bukanabuku feh kakinumuu li yo, kumanen énuukuleŋayi étinaalayi, yafakumuu li kacokaku kata yo kaateenumuu kumuk yo.

¹³ Enúukuleŋayi inyu yál̥ubutayi li enaak ekaan búhiisenum bájaahaleniye ŋáa’. Li enaak ekaan foof sambun sibilumul li emitayi boot teetaam, hákil bukanabuku feh.

¹⁴ Li enaak eŋa’ búhiisenumabu bájaahaleniyaabu ban eyilimuu ekaan hákil énuukuleŋayi yátinaalayi, min éjimen bukanabuku kakinumuu li etaamayi. Li yoon bukanabuku kukaan ebaaŋoot yata énuukuleŋayi yátinaalayi, yan ékunduwayi ecokumuu ban lí yóomi li buloŋ.

¹⁵ Li kusen énuukuleŋayi yál̥ubutayi sembe min ekaan ebaaŋootayi yata énuukuleŋayi yátinaalayi eloŋ min enaak egoloo. Ebaaŋootayi li eyili elob, ban li eyili foof emuk bukanabuku feh kafañutumuu kumanen yo.

¹⁶ Enúukuleŋayi li etuuŋ bukanabuku feh, katitabuku li káamakabuku, kusaanumaku li kusukateenabuku, emiikeelayi li kaletumuu emiikeel, kukaaniil húlangumaaso li kaŋen káli mantee foof li éjontum.

¹⁷ Anoowan ayilaat anoom wah mantee foof li ájula wah, akila babajut húlanguumaasowahu unhu, hammuu kajawaku kata énuukuleŋayi mantee ecobayi yanaboomuu li kajawaku unku.

¹⁸ To untu, bújallo bugel̥l̥eni tó. An atuukomuu fan ayili ahaas ecobayi inyu yata énuukuleŋayi yákoyileniyaayi yo yomuu waa, mata ecobayi inyu kajaw kata an. Ecobayi yata énuukuleŋayi inyu yo yommuu síteemeel hutok li yano li kúyii kúhaaji li hutok li yano (666).