Búhiisenumabu 12 - Jola-Kasa

Anaalaawu li éjunfuulayi li kujuki

¹ Fúlum tó, búhiisenum báamak li búfulumul li emitayi. Búhiisenumabu umbu li bulako anaale aŋale banakabu min águuyoo loon kañ. Hul̥eeñahu li hulako kata láala kootaku koola, ban li aaken li húkowool éjambi yata siwuut soono kuŋen li síl̥uba.

² Anaalaawu ummu ha’ laakene ban okila báliiŋene. Nan alakomuu li anoken li éluŋun, jilumaju jata kanokenaku li jíjiwool li anaak áluulen.

³ Búhiisenum bakee li bulaañen búfulumul li emitayi. Li kaan éjunfuu yáamak yájunke, yabaje kúkow hutok li kúl̥uba li usiin woono kuŋen. Li baj éjambi li húkowoohukow.

⁴ Ejúnfuulayi li eŋa’ huwetahu hata yo min ewuuwul bano li ugebawu úhaaji wata bawuutabu bammuu li emitayi, ébetenul li etaam. Li ejow eyito tan anaalaawu ajowemuu boot kanokenaku alakomuu, bánum li eyaan ejok añiilawu oola eme’ nan ammuu abuki.

⁵ Muñeˈe anaalaawu li abuk añiil áyine, ammuu li aŋa’ hunuk hata mañ min amat bukanabuku kata sihetasu feh. Bale nan añiilawu abukimuu, li kuyaan kújowetumool boot bata Ateemit, li efenjeŋayi yoola yata jáyiiyaju.

⁶ Anaalaawu okila li atey boot bata kayiinaayaku, ban Ateemit akaanoolumuu hulako, bánum li kúkuumenool bo kunak koono énjunne li síteemeel síl̥uba li kúyii kúhaaji.

⁷ Muñeˈe hutiik li hubaj li emitayi. Miseel li kumalakaabuku koola li kutiik li éjunfuulayi. Ejúnfuulayi foof li eŋa’ kumalakaabuku kata yo min etiik li buko.

⁸ Bale li kuheek éjunfuulayi, ban li kúhi’ yo élakowum li emitayi boot li kumalakaaku kata yo ló.

⁹ Li kúbetenul hújunfuulahu unhu háamakahu tíyaŋ. Yo yommuu enuukayilaayi ehaanayi yan koonemuu foof Ammalawu mantee foof Sayitaane, abuntemuu adunaayi feh. Li kúbetenulool li etaamayi boot li kumalakaaku koola ló.

¹⁰ Muñeˈe li ijam li emitayi hulim li hulob butiya hoon: «Muñeˈe taŋayi yata kafakaku éliiŋe! Muñeˈe Ateemitawu oololaal láhiise sembaasu soola li jáyiiyaju joola! Muñeˈe huhaanaahu hunhu li kuŋenaku kata Afakenaawu ammuu oola! Mata anawu anaake ámalumuu akaan kutuyolaal kubetenoobeten tíyaŋ emitayi, akila anaake ayitomuu hákil Ateemit oololaal min ámal akaaniil etihunaka aban ehuka.

¹¹ Li húsimahu hata Agálalaanawu kutuyolaal kúheekumoolumuu, li hulimahu foof hata Ateemit han kulobumuu ésukayi. Li koon éehe’ min kusen buloŋabu booliil mata min kuket.

¹² Mó mújimuu, ésuumahukow ejow elako li emitayi li bukanabuku kakin dómuu! Bale búyiik bujow bulako li etaamayi li halahu! Mata Sayitaane láwalowulo boot li bukuluul, mawuñete ŋáa’. Lahaase aan taŋayi yasaŋowoolumuu efamut.»

¹³ Nan éjunfuulayi ehaasumuu yoon ébetenulibeten li etaam, li eteyoo anaalaawu abukumuu añiilawu áyinaawu.

¹⁴ Li kusen anaalaawu ubey úl̥uba wata huwaaluwahu háamakahu min áyit boot li hulakowahu hoola hammuu li kayiinaayaku, bájum li kúkuumenool bó simit síhaaji li húkej, min áloyi enuukayilaayi.

¹⁵ Muñeˈe enuukayilaayi li émasul kata búsol anaalaawu mal nokoo loon husamu, mantee li muñakool muwujetum.

¹⁶ Bale etaamayi li elamben anaalaawu. Li eŋaben min eme’ malamu mata husamuwahu man éjunfuulayi émasulumuu li butumabu bata yo.

¹⁷ Muñeˈe éjunfuulayi li el̥eet anaalaawu bil gay, li ejow etiik bubukoolumabu boola basaŋomuu. Bubukoolumabu umbu bo bommuu bukanabuku kátuulumuu siluwaasu sata Ateemit, ban li bunab li kulimaku kan Yéesu alobumuu.

¹⁸ Fúlum tó, éjunfuulayi li ejow elako bata katantaku kata halahu.