Búhiisenumabu 11 - Jola-Kasa

Bukanabuku kúl̥ubaaku kamaatumuu

¹ Muñeˈe li kusenom kacaac kanokoole li hunuk boot naak kaliik, ban li koonom: — Uyito ujow uliik Eluufayi yata Ateemit li husilaahu foof, ban li ucob bukanabuku kamanene lómuu Ateemit.

² Bale jakum uliik ekaakayi yammuu tíyaŋ Eluufayi yata Ateemit, mata ekatikat bo boot li bukanabuku kákaanumutumuu li Ateemit balewool, kammuu li kúkakul ésukayi yanabaayi kul̥eeñ koono kúyii kúl̥uba li kúl̥uba.

³ Fan íboñul bukan kúl̥uba káami li kúlobul li kajaw kúmbaam. Fan kukaano wañ wata ñikul, ban li kulob bukanabuku hulimahu hata Ateemit jow baj kunak koono énjunne li síteemeel síl̥uba li kúyii kúhaaji.

⁴ Bukanabuku umbuku kúl̥uba kammuu li kúlobul li kajawaku kúmbaam buko kommuu unuunukenawu úl̥ubaawu wan koonemuu óliibiye, li sihiitumasu síl̥ubaasu. Buko kuyitomuu hákil Amaaŋenawu ata etaamayi.

⁵ An afañumuu min akaaniil majakut, sambun fan sífulumul li utumawu wooliil min simuk kulatoolaaku kooliil. Muñowu anoowan afañe kakaaniil majakut áatimuu aket.

⁶ Bukanabuku umbuku kúl̥uba kubaje sembe sata kabab emitayi, min kúhi’ yo élaalum buko baloŋe li kulob bukanabuku hulimahu han kúyabummuu li Ateemit. Li kubaj foof sembe sata kulaañen malamu mulako húsim. Kubaje foof sembe sata kakaan adunaayi feh élaam sílaam sanoosan loon súumiilumuu.

⁷ Bale nan kommuu li kuban elob bukanabuku hulimahu han Ateemit aseniilumuu, énuukuleŋayi yákoyileniyaayi yammuu li éfulumul li buwokaayabu básenkimuu fan etiikeniil. Fan eheekiil ban li emukiil.

⁸ Sihuluŋasu sooliil fan sikaani li kaayeenaku kata ésukayi yáamakayi, tan Amaaŋenawu ooliil abaaŋimuu li ekuluwa. Kajawaku kan kunaake kúsalummuu ésukayi inyu, kooneyi Sodom li Ejíf.

⁹ Bukanabuku kata het yanooyan li kata ésukoosuk, kata elob yanooyan li kata etaam yanooyan, fan kubil kúnand sihuluŋasu sata bukanabuku umbuku kunak koono kúhaaji li húkej etihunaka, ban let kukat min sihuluŋasu sihoki.

¹⁰ Bukanabuku feh kakinumuu li etaamayi fan súumiil buko bajame eketayi yata bukanabuku umbuku kúl̥uba. Fan kubaj ésuumahukow, ban li kunaak kusenoo bagam, mata bukanabuku umbuku kúl̥uba kammuu kufulofet kukankaan bukanabuku kakinumuu li etaamayi kúlaam ŋáa’.

¹¹ Bale, kunakaku unku kúhaaji li húkej etihunaka kúfu’ tómuu, huyih hata buloŋ habilumulo li Ateemit, li hunoken li bukanabuku umbuku kúl̥uba, ban fan kuyito. Nan kuyitomuu, ekole yáamak li ejok bukanabuku kalako tomuu bajukabu booliil.

¹² Bukanabuku kúl̥uba li kujam hulim habaje sembe háfulumulo li emitayi li hooniil: «Jiŋitowul boot haatiya!» Li kuŋitowum li kafaal boot li emitayi hákil kulatoolaaku kooliil.

¹³ No unnu, etaamayi li egoloo ŋáa’. Bugebabu buŋenenabu bata ésukayi li buhumo, min bukan koono sínjunne hutok li síl̥uba kuket li kagoloolaku unku kata etaamayi. Bukanabuku kasaŋomuu li kúkoli ŋáa’, li kúbinken Ateemit ammuu haatiya emitayi.

¹⁴ Búyiikabu búl̥ubutabu buwuje. Muñeˈe, búyiikabu búhaajutabu bumbu li bubaj.

Amalakaawu atoken li ál̥ubutawu li al̥ok kasiinaku koola

¹⁵ Fúlum tó, amalakaawu ammuu oola, ban fan aaken jáyiiyaju unju boot nanoonan!»

¹⁶ Kunahaanaku áyii li kubakiilaku kahallenumuu, ban li kubah li sifenjeŋasu sooliil sata jáyiiyaju hákil Ateemit, li kuŋa’ wuuliil kuya teetaam min kumanen Ateemit

¹⁷ koon: «Amaaŋen Ateemit ata sembe, Awu áami tomuu, awu alakoween tomuu, jisali, mata luŋaŋŋa’ sembaasu sooli sáamakasu, min uyiten jáyiiyaju jooli.

¹⁸ Bukanabuku kata sihetasu feh etindihuuñ ejokiil, bale muñeˈe hunakahu húliiŋulo, nan etindihuuñayi yooli yommuu li ejuki. Hunakahu hata batiibabu bata bukanabuku kaketumuu húliiŋe. Hunakahu húliiŋe nan ommuu usuuhen kulokaabuku kooli, kammuu kufulofetaku, li bukanabuku feh kammuu kooli, katitabuku li káamakabuku, kákolimuu kajawaku kooli. Hunakahu foof húliiŋe nan ommuu uniilen, bukanabuku feh kakajenumuu etaamayi.»

¹⁹ Muñeˈe Eluufayi yata Ateemit yammuu li emitayi li ébabulo. Ekeesayi li ejuki ló. Li baj kawiwijen, li kulim, li kawel kata kufalajaj. Etaamayi li egoloo, li baj kuteyisa káamak.