Búhiisenumabu 1 - Jola-Kasa

Búhiisumabu

¹ Li éliibalayi inye, ló wahawu wahaasutimuu wommuu, wan Ateemit áhiisumuu Yéesu Kilisita. Ateemit láhiisoohiis wó mantee li alob wo kulokaabuku kammuu koola, min kuyili kuhaas wahawu wáatimuu ubaj, ban let fiyo. Wahawu unwu újimuu, Kilisita li aboñ amalakaawu oola bata alokaawu oola Saŋ min ajow áhiisool wahawu unwu.

² Saŋ li alob bukanabuku wahawu feh wan ajukumuu. Li aan li mal̥egenamu laalu hulimahu hata Ateemit, ban Yéesu Kilisita láhihhiis kaanaku wahawu unwu mal̥egen.

³ Awólo, anawu ammuu ajanga kulimaku unke kabilummuu li Ateemit, kakiicimuu li éliibalayi inye. Awólo bukanabuku kajantenemuu kulimaku unku, ban li kukaan loon kulobumuu, mata taŋayi ékoojulo nan wahawu unwu wommuu li ubaj.

Saŋ li asaaf sijanguwasu hutok li síl̥ubaasu

⁴ Injé Saŋ ikiiculo sijanguwasu hutok li síl̥ubaasu sata etaamayi yata Aasi: Ateemit asenuul káji li kásuumaay, akila áami tomuu, alako to nomuu, áamimuu li abil. Uyinumawu hutok li úl̥ubaawu wammuu hákil efenjeŋayi yoola yata jáyiiyaju usenuul foof káji li kásuumaay.

⁵ Yéesu Kilisita, alobemuu Hulimahu Hásuumaahu li mal̥egen, asenuul foof káji li kásuumaay. Akila áamimuu átinaa li kayitowulumuu li eketayi, ban li áami áyiiyawu ata kúyiiyaku kata etaamayi. Yéesu Kilisita lafañolaafañ, ban li húsimahu hoola láfakenumolaalumuu li uhoofoolawu woololaal.

⁶ Ban li akaanolaal ulakowaal jáyii jata kúlamba boot bulok boot li Ateemit ammuu Atuubawool. Máyiineniyamu mujow mulako moola, li sembaasu foof boot nanoonan! Aameen.

⁷ Jijuke, ummu li ebilumul li ufaalawu. Ban bukanabuku feh fan kujukool, maayeet bukanabuku kayawoolumuu kúfawul. Bukanabuku feh kammuu li etaamayi fan kugamoo moola. Eéhe’! Muñaˈa. Aameen.

⁸ Amaaŋenawu Ateemit ata sembe li aan: «Injé emmuu Húkitumahu li Húbanumahu,» okila áami tomuu, alako to nomuu, áamimuu li abil.

Saŋ li ajuk Kilisita li máyiineniyamu moola ló

⁹ Laale ínje Saŋ, ammuu atuyuul. Injé li bukuluul an ano loomaal li Yéesu Kilisita. Mó mújimuu ínje li éemi afaaluul li sílaamasu san oomaalumuu li so. Li éemi foof an ata Jáyiiyaju jata Ateemit loon bukuluul, li kahankenaku kan oomaalumuu li ko. Injé kujokonjok kújowetum kujow kukaan li étebelemukayi yan koonemuu Fatumoos, mata liwaalewaale Hulimahu hata Ateemit, ban li ilob mal̥egenamu man Yéesu áhiisumuu.

¹⁰ Li líiŋ li hunakahu hata Amaaŋenawu, Buyinumabu Banabaabu li bujokom. Muñeˈe li ijam kata búsolom hulim habaje sembe, hanokoole loon kal̥ok kata kasiin.

¹¹ Hulimahu unhu li hoon: — Ukiic li éliibal wahawu wan ujukumuu, ban li uboñ yo Sijanguwasu unse hutok li síl̥uba: yata Efées, yata Simiin, yata Feelugam, yata Tiyatiil, yata Saalud, yata Filadelifi li yata Lawodise.

¹² Nan ijamumuu hulimahu unhu, li ígegul boot min ijuk anawu alakomuu elobayi lí ínje. Muñeˈe li ijuk sihiitum soono hutok li síl̥uba sata éwulus.

¹³ Li baj li tut sihiitumasu hutok li síl̥ubaasu wah ukee wanokoole li kambu kata an. Anawu ummu li akaano esabadoo yawalowe boot li kootool, ban li akoko kanaal kata éwulus li bagiŋool.

¹⁴ Walawu wata húkowahu hoola li uhiit loon búbil, loon foof kábiba. Kúkilaku koola li kuleñ loon sambun.

¹⁵ Kootaku koola kunokoonokoo li fálam yaleñe ŋáa’ loon li buhaañ éfunnumuli ban li etuuyi. Hulimahu hoola li hunokoo li kácololen kata mal máamak.

¹⁶ Li átuk li kaŋenool kúli siwuut hutok li síl̥uba. Ekúndu yañeke li éfulumul li butumabu boola. Buulabu boola li buleñ loon banak bo bufiñulowulo.

¹⁷ Nan ijukoolumuu, li ilo to li kootool loon an akete. Li aŋa’ kaŋenool káli awalen lí ínje ban li aanom: — Sákoli! Injé emmuu átinaalawu li ásolaawu.

¹⁸ Injé emmuu anawu ammuu li buloŋ. Liketeenenket, bale muñeˈe ínje ummu li buloŋ boot nanoonan. Libaje kayile li eketayi, li tan bukanabuku kaketumuu kommuu.

¹⁹ Kama ukiic wahawu wan ujukumuu, wahawu wabajumuu muñeˈe li wammuu li ubil ubaj.

²⁰ Wahawu wahaasutimuu wata siwuutasu hutok lí síl̥ubaasu san ujukumuu li kaŋenom kúli, li sihiitumasu hutok lí síl̥ubaasu sata éwulusayi wo wommuu unwe: siwuutasu hutok lí síl̥ubaasu so sommuu kumalakaaku kata Sijanguwasu hutok lí síl̥ubaasu, sihiitumasu hutok lí síl̥ubaasu so sommuu Sijanguwasu hutok lí síl̥ubaasu.