Bakaanelabu 28 - Jola-Kasa

Fool li étebelemukayi yata Malut

¹ Nan jijowe jifakumuu, li jijam kaanaku étebelemukayi kajaw yo Malut.

² Bukanabuku kakinumuu li étebelemukayi li kúyaboli súum ŋáa’. Emmuu emitayi kalaal elakowe ban li jóobi, li kútifenoli sambun sáamak min kúyaboli tó.

³ Fool li áhomul uyaaj wasaye abeten li sambunasu, hásufaahu li húkesoolul ló ébanuu éliiŋul li ejokool li kaŋen.

⁴ Nan bukanabuku kakinumuu li étebelemukayi kujukumuu enuukayilaayi maleeyoole li kaŋenaku kata Fool, li kunaak kúsuumenoo koon: — Manooman ánayinaawu ummu amuka bukan, mata maayeet min áfakumulomuu li halahu áliiŋul, ateemitawu ata batiibabu akatutool min aloŋ.

⁵ Bale Fool li ahank enuukayilaayi abeten li sambunasu, ban kaanutool wahoowah.

⁶ Bukan kaabuku li kulako kakob min koon fan alaa, mantee foof li iyaan alo to min aket. Bale nan kujeˈe kukobumuu fiyo, ban li kujuk koon wah ukaanutool, li kulaañen kubaj kayinoo kukee, min koon kama Fool ateemit.

⁷ Halaabahu unhu hulolloh etaamayi yata anahaanawu ata étebelemukayi, an koonemuu Fíbiliyus. Fíbiliyus li áyaboli súum, ban li áakenoli boola kunak kúhaaji.

⁸ Atuubaawu ata Fíbiliyus akila ló mahintowe. Bújuusa bujokool búgiiwoo ló li bílitaañi. Fool li ajow ajukool min al̥aw boot li akila, ban li aŋa’ kaŋenool awalenool téeti, li afak.

⁹ Fúlum tó, kúsomuta kaabuku kata étebelemukayi li kubil foof kujuk Fool, li afakeniil.

¹⁰ Bukanabuku kakinumuu li étebelemukayi li kúluukenoli ŋáa’. Nan jilakomuu li jíjufo li ébatowayi boot ejow, li kúcaholi wahawu feh wan jókolimuu li wo boot li kañaahoolaku.

Fool li aŋej li ésukayi yata Lom

¹¹ Nan jeˈe bajumuu kul̥eeñ kúhaaji, li jíjowum li ébato yata Alekusandili yan koone «Mál̥uba kuteemit», yakaane taŋayi yata kutontaku feh li étebelemukayi.

¹² Li jijow boot li ésukayi yata Sílakiis, min jilako to kunak kúhaaji.

¹³ To untu jíjowummuu li ébatowayi min jikel̥el̥en katantaku boot li ésukayi yan koonemuu Léjiwo. Nan tikatenumuu, kálusaku kata Kúñum li kútekul, li jikaan kunak kúl̥uba li jíliiŋ li ésukayi yata Fusol.

¹⁴ Nan jíliiŋumuu li ésukayi inyu, li jitook bo kútuyoli li káyinenaku. Li kóonoli jijow jilako booliil esimen. To untu jíjowummuu boot Lom.

¹⁵ Kútuyoli li káyinenaku kata Lom, li kujam móololi, li kubil boot yok tin emalisaayi yata Afíyis, li boot tin koonemuu Ufóoyum Uháaji, kubil jifam to. Nan Fool ajukiilumuu, li asal Ateemit ban li abaj kawankulen.

¹⁶ Nan jiŋejumuu Lom, li kukat Fool min alako joola buko li asollaaliyawu anaake afooyoolumuu.

Fool li awaale li ésukayi yata Lom

¹⁷ Nan jeˈe bajumuu kunak kúhaaji, Fool li ahooñ boola kunahaanaku kata Kusuwifaku kata Lom. Nan kuwoogumuu li aaniil: — Kutuyom, maayeet min ikaanutumuu bukanolaal wah wajakut, mantee foof li múkaaniinamu mata situubawolaal sihaan, li kujokom Yeelusalem kubet li kuŋen kata kata Lom.

¹⁸ Kata Lom li kugel̥l̥enoolom kuban, li kufañeen min kukatenom mata kujukut wahoowah lí ínje waate úji li kumukom.

¹⁹ Bale Kusuwifaku kufañut, gay li ikomen een kama áyiiyawu áamakawu atiibom. Bale ínje humumom ifañut min iwataten ésukayi yúmbaam.

²⁰ Wahawu unwu újimuu li iŋes min ijukuul min ilob li bukuluul, mata min íjenkumimee baseelabu umbe, anawu an kata Isilayeel kúkangummuu li akila, ájimuu li íjenkumi bo.

²¹ Kusuwifaku li koonool: — Alóli jiyabut eleetal yáfulumulo Súde yalobe mooli. Ban bajut akee li kutuyolaal abilumulo bo, abil áheboli mantee li áloboli kulim kajakut aya li awu.

²² Bale jifaañe min awu humumi úloboli min jijam kayinooli, mata jihaase kaanaku tanootan bukanabuku kuhoohoy hujojahu unhu dán ommuu.

²³ Kusuwifaku li kusen Fool hunak nan kommuu li kufam. Nan hunakahu húliiŋumuu, li kuhaŋ mabil kumeeŋ, kubil kutookool tan akinumuu. Fool li akitteniil mata Jáyiiyaju jata Ateemit kábilum li bújom boot yok kátiim. Li ájowum li eluwaayi, min alobiil mata Yéesu ban li alako huŋes min akaaniil kúyinen.

²⁴ Kukee li buko li kúyinen mata wahawu wan alobiilumuu úji, bale kaabuku li kuhoy báyinen.

²⁵ Muñeˈe li kulako li kuyiisoo buko bayilaat kujamoo, Fool li alobiil kulimaku unke: — Buyinumabu Banabaabu bukonkooŋ nan bulobumuu situubawuul sihaan, li butum bata afulofetawu Esay!

²⁶ Laaniisaan: «Ujow boot bata bukanabuku umbuku ujow ooniil: fan jijam jak, bale let jínaanum; fan jijuke jak, bale let jijuk.

²⁷ Mata bukanabuku umbuku kufañut kúnaanum. Kutottoj sijaniil, li kúmib kúkiliil, jakum bil kúkiliil kujuk, jakum bil sijaniil sijam, jakum bil kúnaanum li uyinumiil, Letumuu mo fan kútiiwowul boot búmbaam min ifakeniil.»

²⁸ Fool li afamen aan: — Joote kama jihaas joon Hulimahu hata Ateemit hata kafakaku, húboñuliboñul boot li bukanabuku kákaanumutumuu li Ateemit balewool: buko, fan kujanten ho!

²⁹ [Nan Fool alobumuu kulimaku unku, Kusuwifaku li kujow, mo kúwonnoolemaa li bukoyiil súf.]

³⁰ Fool li alako simit síl̥uba feh li eluufayi yan aŋa’muu min anaak acaam. Li anaak ayab ló bukanabuku feh kanaake kubilumuu kujukool.

³¹ Fool li anaak awaale bukanabuku mata Jáyiiyaju jata Ateemit, ban li anaak aliiken bukanabuku mata Amaaŋenawu li mal̥egenool, ban bajut an áhilool ákaanum mo.