Bakaanelabu 27 - Jola-Kasa

Li kújowetum Fool boot Lom

¹ Nan jeˈe lakomuu boot min jíjowum li ébato boot Itali, li kukat Fool li bukan kukee kan kukul̥e, li kaŋen kata anahaan ata kusollaali an koone Súliyis, ata kayooŋaku kata esollaaliyayi yata áyiiyawu áamakawu ata Lom.

² Li jíjufo li ébato yata ésukayi yata Adalamit, yalakowe li ejow ejooŋoo li úsikawu wata etaamayi yata Aasi, min jijow. Alisitaak alakomuu an ata ésukayi yata Tesalonik yammuu li etaamayi yata Maseduwaan, áloli jinaboole.

³ Li líiŋ hunak hukaten li jiŋej Sidoŋ. Súliyis acookoomuu Fool jak, li akatool min ajow ajuk kubukewool min kusenool wahawu wan jokoolumuu li wo.

⁴ Nan jífulum tomuu, li jijow jikel̥el̥en katantaku káfibomuu kata étebelemukayi yata Ciif, mata jilallaaj élusayi.

⁵ Li jiliij halahu hakoojumuu etaamayi yata Silisi li yata Fanfili, min jijow boot li ésukayi yata Miila yammuu li etaamayi yata Lisi.

⁶ To untu, anahaanawu ata esollaaliyayi li ajuk to ébato yata ésukayi yata Alekusandili, yalakowe ejow boot Itali, li ákaanoli jíjufo li yo.

⁷ Muñeˈe ébatowayi li enaak etey jatiita jow baj kunak kafame. Li jinaaŋoojinaaŋoo, li jíliiŋ bújooŋoo ésukayi yata Sinid síniiloli bajame. Emmuu élusayi éhilolihi jijow haŋ máloyi jijuke ban jilakomuu ejowayi, li jíjowum Kaf Solimon jihaaŋ jilo kagebaku káfibomuu kata étebelemukayi yata Kilet.

⁸ Li jijow li sílaam ló jinab li kagendenaku kata Kilet, jijow jiyok jíliiŋ tan koonemuu «Usík Wajake». To untu kokkooj ésukayi yata Laase.

⁹ Jifiyowulofiyo ŋáa’ li halahu, ban li laañ kóyileni ŋáa’ min jijow li ébato jihaaŋ. Mata no unnu, hunakahu hata emommowayi yata li buŋit ho balul̥e. Wahawu unwu újimuu Fool li alob kata ébatowayi kulimaku unke akat to aaniil:

¹⁰ — Kufaalom, lijuujuk kaanaku kañaahoolaku koololaal fan kúkoyileni. Ebátowayi fan eban li ekajen ŋáa’ boot li wahawu wan etebumuu ló. Ban ololaal humumolaal foof ujukelutaal tomuu, fan uketaal ló.

¹¹ Bale anahaanawu ata esollaaliyayi yata Lom, li ahaŋ majanten kulimaku kata ateyenemuu ébatowayi li kata anahaanawu ata yo, min abes kulimaku kata Fool.

¹² Kásikaku kujakut boot mata min jikaan to húl̥iyahu. Wahawu unwu újimuu bukan kameeŋe kalakomuu li ébatowayi, li koon jífu’ li kásikaku. Kufañeene min nokoo loon kayiliyeenuma, li jijow li kásikaku kata ésukayi yata Fóweniis jijow jikaan bo húl̥iyahu. Kásikaku kata Fóweniis ko kommuu kata étebelemukayi yata Kilet, ban li kujooŋoo Kúñum li Jalaŋ, li kujooŋoo foof Alool li Jalaŋ.

Búlus li bútekul li halahu

¹³ Jílus jatiita lí jítoŋ jítekumul Kúñum, kafañumuu ejowayi li kuyinoo li koon fan kuyili kujow. Li kuñak hulankalahu min kujow li ébatowayi kukel̥el̥en katantaku kata Kilet.

¹⁴ Bale yaanut fiyo, búlus babaje sembe ban koone «Alool-Akiw» (Aálakiloŋ), li bútekumul li kuyuuyaku kata étebelemukayi.

¹⁵ Búlusabu li bújowetum ébatowayi. An ayilaat akaan yo elaaj búlusabu. Li jikomen jikat yo min ejow.

¹⁶ Li jíjowum Kúñum étebelemukayi yatitayi yan koone Kóoda, yáfibolimuu jakee li búlusabu. Muñeˈe li jinaaŋoojinaaŋoo, li jijok jisaanaaju jakokimuu búsol ébatowayi.

¹⁷ Li jíñakul asaanaawu jiŋitenul jikaan li ébatowayi yáamakayi, ban li jiŋa’ uneew min jikok ébatowayi yáamakayi jiŋolen. Emmuu jíkolikoli min ban li jilo li sifaahasu sata utantawu wata etaamayi yata Libi, li kuwalen éyaka min élusayi éjowetumoli.

¹⁸ Emmuu búlusabu buyeelenut min bunaak bútinken ébatowayi elaañ baabe li elaañ baaba, li líiŋ hunak hukaten li jiteb wahawu wan ébatowayi éjufumuu jibeten li halahu.

¹⁹ Li líiŋ li hunakahu húhaajutahu, li kuteb buko humumiil wañawu wata ébatowayi kubeten li halahu.

²⁰ Jijukut banakabu li bawuutabu jow baj kunak kameeŋe. Búlusabu bukatut kátekul li sembe. Alóli jilaañenut jíkangum kaanaku fan jifak.

²¹ Bukanabuku kalakomuu li ébatowayi kutiñut kujow kubaj kunak kafame. Muñeˈe Fool li ayito hákiliil min aaniil: — Inti jijuke kufaalom, booteen min jijanten kulimaku kúmbaam min ulakowaal Kilet. Ulakoweenaal bomuu, let uloweenaal li búlusabu umbe, ban wañawu woololaal let ukajeneen ban let újimeen.

²² Bale muñeˈe leene sákoluul, mata an li bukuluul let ájim. Ebátowayi bale yóomi li ekajen.

²³ Mata li mal̥egenamu li ehukaayi yakatenumee síyaat, amalakaawu ata Ateemitawu akilommuu an ilokemuu boot li akila, láfulonfu’

²⁴ ban li aanom: «Fool, sákoli! Kaan min kaane, fan ujow utiibi hákil áyiiyawu áamakawu, ban awu an kájiyaku kata Ateemit kommuu li awu, awu ommuu li úji li afaken bukanabuku feh kan jommuu li ébatowayi.»

²⁵ Mó mújimuu, sákoluul kufaalom, líkangunkangum li Ateemit. Wahawu wan alobumuu wo wommuu li ubaj.

²⁶ Bale fan ujowaal utaal̥aal li katantaku kata étebelemukayi.

²⁷ Li líiŋ li ehukaayi eŋenen li ebaalikenayi, búlusabu bo baloŋe li bútuuñenoli bújowetum jijow jífu’ li halahu han koonemuu mediteelane (Adiliyatik). Nan hukahu hujeˈe hulitumuu, kata ébatowayi li kunaak kuyin li koon jikooje etaamayi.

²⁸ Li kubeten hugisa hakoki li kaneew min kuyoob, bale li kujuk kaanaku másenkiyamu mubaje simeetal áyii li kaat li síl̥uba. Li kuyinno bo jakee, li kulaañen kubeten hugisaahu hakokimuu li kaneewaku, li kujuk koon másenkiyamu mubaje simeetal áyii li hutok li síhaaji.

²⁹ Emmuu kúkolikoli min ébatowayi yóololi elo li kugisa, li kubeten kulankal kubakii kata búsol, ban li kukob li esommen ló min tinakatu tikaten.

³⁰ Kata ébatowayi li kulako huŋes min kúfu’ li ébatowayi yáamakayi mantee li kufak, li kuwalen asaanaawu atitawu li malamu, ban li kúmal koon boot min kujow kubeten kulankalaku kammuu kayooŋ ébatowayi.

³¹ Bale Fool li alob anahaanawu ata esollaaliyayi li kusollaaliyaku aaniil: — Bukanabuku umbuku kufañutumuu kulako li ébatowayi, bukuluul let jiban li jiyili jifakeni.

³² Muñeˈe kusollaaliyaku li kucac uneewawu wakokeenimuu li jisaanaaju, min kukat jo min jijow.

³³ Li kulako kakobaku min banakabu búkanul, Fool li awankulen kalakomuu feh li ébatowayi min kuŋa’ wah ukee kutiñ, ban li aaniil: — Muñeˈe baje síyaat kunak kuŋen li kubakii bukuluul li kakob, ban jitiñut wahoowah.

³⁴ Wahawu unwu újimuu ínje ummu li kawankulenuul min jitiñ, mata fan jak boot li bukuluul bánum li jifak. Anoowan li bukuluul kal let kújim li húkowool.

³⁵ Nan Fool alobumuu kulimaku unku aban, li aŋa’ húmbuulu min asal Ateemit hákil bukanabuku feh ban, li amuncul ho atokoñ.

³⁶ Muñeˈe bukanabuku feh li kulaañen kútik min kuhin kutiñ.

³⁷ Alóli fóofoli feh jalakomuu li ébatowayi joono síteemeel síl̥uba li kúyii kúhaaji li kaat li ano.

³⁸ Nan kutiñumuu kujow kufooñ, li kubeten edenfeteŋayi li halahu min ébatowayi eyiili.

Ebátowayi li éyuwo

³⁹ Nan tikatenumuu, kata ébatowayi li kujuk etaamayi kuhaasut, bale li kuŋanden éteewaay yabaje katant. Li kufañeen min kuyiliyeen, li kujow kuya to ébatowayi.

⁴⁰ Li kúl̥el̥ul kulankalaku li ugebawu úl̥uba, ban li kukat ko min kuwuj li halahu. Li kúl̥el̥ul foof li mano uneewawu wata siweenasu san kuŋa’muu kukaan hulam. Fúlum tó, li kuŋiten éyaka kayooŋ ébatowayi, bánum élusayi li étekul, li etuuñeniil kujow boot bata katantaku.

⁴¹ Bale li kujow kulo li efaah yan uwuusa úl̥uba ukaane li tut, min ébatowayi etaal̥. Kayooŋ ébatowayi iyilaat goloo mata el̥uhol̥uho li mul̥uyisamu. Kuyammalaku li kuhum kata búsol ébatowayi, mata kubabbaj sembe.

⁴² Esollaaliyayi li kufañeen min kumuk bukanabuku kan kujokumuu jakum bil an li buko awaj alimb min afak.

⁴³ Bale anahaanawu ata esollaaliyayi ata Lom, li afañ min afaken Fool, li aaniil kukat. Ban li alob bukanabuku kayilimuu kawaj min kujand kufum kulo li malamu, min kuwaj kúfu’ li masaye.

⁴⁴ Kaabuku li kútuk ubabbaluwawu, mantee foof úgembulawu wata ébatowayi min kujowubeniil. Muñaˈa kukaanumuu min buko foofiil feh kúfu’ li masaye, ban wah ubajut an.