Bakaanelabu 25 - Jola-Kasa

Fool li aan kama Ayíiyawu áamakawu atiibool

¹ Nan águubelunaalawu Fésitiis áliiŋulumuu li etaamayi ajow abaj kunak kúhaaji bale, li ájowum Sesaale boot Yeelusalem.

² Nan áliiŋ bómuu, kunahaanaku kata élambaayi li bukanabuku káamakaku kata Kusuwifaku, li kubil kukalaame Fool bata Fésitiis. Li kuyaakoo Fésitiis kátasiyaanay

³ mantee kay li akatiil min kukaan Fool álaañul boot Yeelusalem; ban li mal̥egenamu buko básonoole kuban boot li Fool, min kuban li kumukool li bútinabu.

⁴ Bale Fésitiis li aaniil: — Fool ummu li hukul̥ li etaamayi yata Sesaale, ban ínje humumom boot min ilaañ boot bo muñeˈe.

⁵ Ban li afamen aan: — Kama kunahaanaku kooluul kayilimuu kujow, kubil min áloli jinaboo boot Sesaale, min kujow kulob wahawu wan anawu ummu akaanumuu, nokoomuu loon lakankaan majakut.

⁶ Fésitiis li akaan kunak káliiŋe hutok li kúhaaji mantee foof kuŋen bale li buko, fú’ tó, li alaañ boot Sesaale. Nan áliiŋumuu, li ajow hunak hukaten abah li hutiibahu, li alob min kúŋalul Fool.

⁷ Nan Fool áliiŋulomuu, Kusuwifaku kabilumulomuu Yeelusalem, li kúguutool min kulob wah wajakut wameeŋe, wákoyileniye kuya li akila min koon okila akaan wo. Ban buko humumiil kuyilaat kúhiis kaanaku mal̥egen okila akaan wo.

⁸ Bale Fool li acahenoolo aan: — Ifetut li wahoowah li eluwaayi, ifetut foof li áyiiyawu áamakawu.

⁹ Fésitiis li afañ min akaan Kusuwifaku súumiil, li agel̥l̥en Fool aanool: — Mantee lufañe min ujow boot Yeelusalem, ujow utiibi bo hákilom mata elobayi inye?

¹⁰ Fool li aanool: — Li hutiibahu hata áyiiyawu áamakawu leem, ban to lemmuu li itiibi. Ikaanut Kusuwifaku wah ukee wajakut, loon awu humumi uhaas yomuu jak.

¹¹ Nokoomuu loon lifeefet, ban li ikaan wah wajakut watooke min iket, ihoyut min iket. Bale nokoomuu loon wahawu feh wan kulobemuu li wo kuya lí ínje let mal̥egen, an abajut kakaañen min ajokom aseniil maamiñ. Lifañe min áyiiyawu áamakawu atiibom okila humumool.

¹² Muñeˈe nan Fésitiis alobumuu li huhaanaahu hoola aban, li aan Fool: — Emmuu áyiiyawu áamakawu lufañe min atiibi, kama boot min ujow boot bata áyiiyawu áamakawu.

Fool li alob hákil Agilifa

¹³ Li baj kunak, áyiiyawu Agilifa buko li áliinool Beleniis li kujow boot Sesaale basaaf Fésitiis.

¹⁴ Emmuu boot min kukaan to kunak kafame, Fésitiis li alob áyiiyawu mata elobayi yata Fool aanool: — Baje láale ánayine akee an Féeliis akate li hukul̥ahu.

¹⁵ Nan ijowumuu Yeelusalem íliiŋ, kunahaanaku kata élambaayi li bukanabuku káamakaku kata Kusuwifaku li kukalaamewool lí ínje min koonom ibetool kaneew.

¹⁶ Li eeniil kata Lom kúbeteliit an an koone majakut lakaane, li kuŋen kata kutiiba, anawu ummu báfimboolut li bukanabuku kaanumuu majakut lakaane mata min kutalen, mantee li ayili acahenoolo mata wahawu wajakutumuu wan koonumuu wo lakaane.

¹⁷ Muñeˈe kunahaanaku kooliil li kúnaboolul lí ínje boot taate. Ikatut fiyo: nan tikatenumuu, li ijow ibah li hutiibahu ban li iboñ kujow kúhooñulom Fool.

¹⁸ Kulatoolawool li kubil kúliiŋul, kukitut koon wah waman lakaanumuu wajakut, loon ínje iyinooleenumuu.

¹⁹ Kama búwonnoo bale kubaje li akila mata bútinabu booliil, li mata akee an koone Yéesu akete, an Fool aane ummu li buloŋ.

²⁰ Ihaasut buu léemi li ilob elobayi inyu eeno, mó lí múji li igel̥l̥en Fool mantee lafañe min ajow boot Yeelusalem, min ajow atiibi bo mata elobayi inyu.

²¹ Bale Fool li aan kama áyiiyawu áamakawu atiibool. Muñeˈe li ilob min kukatool li hukul̥ahu boot yok nan emmuu iyili iboñool bata áyiiyawu áamakawu.

²² Agilifa li aan Fésitiis: — Lifañe mín ínje humumom foof ijam ánayinaawu ummu. Fésitiis li aanool: — Fan ujamool kajom.

²³ Muñeˈe nan tikatenumuu, Agilifa li Beleniis li kútekul kayooŋ buko li kunahaanaku káamakaku kata esollaaliyayi, li bukanabuku káamakaku kata ésukayi makokowe jak, kujow kunoken li hulakahu hata hutiibahu dán kuyabemuu bukanabuku. Fésitiis li alob min kúŋalul Fool.

²⁴ Ban li aan: — Ayíiyawu Agilifa li bukuluul feh jáamimuu taate li óloli, jijuke ánayinaawu ummu, an Kusuwifaku feh kubilumuu kulobom moola Yeelusalem li taate foof, min kunaak kulob butiya koon aatut akati li buloŋ.

²⁵ Bale ínje ijukut li akila wah wajakut waate úji li amuki. Bale emmuu akila humumool aane áyiiyawu áamakawu atiibool, li een kama iboñool o’.

²⁶ Ibajut wah wata mal̥egen wan éemi li ikiic min ilob áyiiyawu áamakawu moola. Mó mújimuu, li ikaanool alob hákiluul, háŋum hákili awu áyiiyawu Agilifa, bánum li agel̥l̥enooli min íbajum tó wah wan éemi li ikiic.

²⁷ Lenseen li mal̥egen colut min an aboñ an akul̥i boot Lom, akila bakiicut min alob jak wahawu wan anawu ummu akaanumuu wajakut.